ମୁମ୍ବାଇ,୨।୮- ଭାରତୀୟ କ୍ରିକେଟ ଦଳର ବିଭିନ୍ନ କୋଚିଂ ଷ୍ଟାଫ ପଦ ଲାଗି ୨ ହଜାର ଆବେଦନ ଦାଖଲ ହୋଇଛି। ଏ ନେଇ ଇଂଲିଶ ଖବରକାଗଜ ମୁମ୍ବାଇ ମିରରରେ ଏକ ରିପୋର୍ଟ ପ୍ରକାଶ ପାଇଛି। କିନ୍ତୁ ଏମାନଙ୍କ ମଧ୍ୟରେ ଖୁବ୍କମ ବଡ଼ ନାମ ରହିଛି। ରବି ଶାସ୍ତ୍ରୀଙ୍କ ନେତୃତ୍ୱାଧୀନ କୋଚିଂ ଟିମ୍ର କାର୍ଯ୍ୟକାଳ ୨୦୧୯ ଆଇସିସି ବିଶ୍ୱକପ୍ରେ ଶେଷ ହେଉଥିଲା। କିନ୍ତୁ ନୂଆ କୋଚ୍ ନିଯୁକ୍ତି ପ୍ରକ୍ରିୟା ଲାଗି କିଛି ସମୟ ଦରକାର ଥିବାରୁ ଶାସ୍ତ୍ରୀଙ୍କ ଟିମ୍ର କାର୍ଯ୍ୟକାଳ ବୃଦ୍ଧି କରାଯାଇଥିଲା। ବ୍ୟାଟିଂ କୋଚ୍ ସଞ୍ଜୟ ବାଙ୍ଗର, ବୋଲିଂ କୋଚ୍ ଭରତ ଅରୁନ ଓ ଫିଲ୍ଡିଂ କୋଚ୍ ଏସ୍. ଶ୍ରୀଧର ଓ୍ବେଷ୍ଟଇଣ୍ଡିଜ ବିପକ୍ଷ ସିରିଜ୍ ଶେଷ ହେବା ପରେ ପଦ ଛାଡ଼ିବେ। ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ଜୁଲାଇ ୧୬ ତାରିଖରେ କୋଚ୍ ଓ ସପୋର୍ଟ ଷ୍ଟାଫ୍ଙ୍କ ପଦ ଲାଗି ବିଜ୍ଞାପନ ଦେଇଥିଲା। ଆବେଦନ ପାଇଁ ୩୦ ତାରିଖକୁ ଶେଷ ଦିନ ବୋଲି ଧାର୍ଯ୍ୟ କରାଯାଇଥିଲା। ମୁମ୍ବାଇ ମିରରରେ ପ୍ରକାଶ ପାଇଥିବା ରିପୋର୍ଟ ଅନୁଯାୟୀ ବହୁ ଅନ୍ତର୍ଜାତୀୟ ଆବେଦକ ରହିଛନ୍ତି। ଏଣୁ ବିସିସିଆଇକୁ ଆବେଦକଙ୍କ ମୂଲ୍ୟାଙ୍କନ ଲାଗି ଅଧିକ ସମୟ ଲାଗିପାରେ। ଗୁରୁତ୍ୱପୂର୍ଣ୍ଣ ମୁଖ୍ୟ କୋଚ୍ ପଦ ପାଇଁ ୨୦୦୫ରେ ଗ୍ରେଗ୍ ଚାପେଲଙ୍କଠାରୁ ହାରିଥିବା ଅଷ୍ଟ୍ରେଲିଆର ଟମ୍ ମୁଡି, ସର୍ବାଧିକ ସମୟ ପର୍ଯ୍ୟନ୍ତ ନ୍ୟୁଜିଲାଣ୍ଡ ଦଳର କୋଚ୍ ପଦ ସମ୍ଭାଳିଥିବା ମାଇକ ହାସନ, ପୂର୍ବତନ ଭାରତୀୟ ଓପନର ଲାଲଚାନ୍ଦ ରାଜପୁତ ଓ ରବିନ ସିଂ ରହିଛନ୍ତି। ପୂର୍ବରୁ ଏହି ପଦ ଲାଗି ଇଚ୍ଛା ପ୍ରକାଶ କରିଥିବା ମାହେଲା ଜୟବର୍ଦ୍ଧନେ ଆବେଦନ କରିନାହାନ୍ତି। ୧୯୮୩ ବିଶ୍ୱକପ୍ ଚାମ୍ପିୟନ ଦଳର ଅଧିନାୟକ କପିଳ ଦେବଙ୍କ ନେତୃତ୍ୱାଧୀନ ଉପଦେଷ୍ଟା କମିଟି (ସିଏସି) ମୁଖ୍ୟ କୋଚ୍ ଚୟନ କରିବ। ସିଏସି ଆବେଦକଙ୍କ ତାଲିକାରୁ ଚିହ୍ନଟ ପ୍ରାର୍ଥୀମାନଙ୍କର ଚଳିତ ୧୪ ଓ ୧୫ ତାରିଖରେ ସାକ୍ଷାତକାର ନେବ।
