ହାଇଦ୍ରାବାଦ୍,୩୦।୧୦: ତେଲେଙ୍ଗାନା ମୁଖ୍ୟମନ୍ତ୍ରୀ କେ ଚନ୍ଦ୍ରଶେଖର ରାଓ ଟିଆରଏସ ବିଧାୟକ କିଣିବାକୁ ଭାଜପା ଚେଷ୍ଟା କରୁଥିବା ରବିବାର ଅଭିଯୋଗ କରିଛନ୍ତି। ମୁନୁଗୋଡେ ବିଧାନସଭା ଆସନରେ ଉପନିର୍ବାଚନ ପାଇଁ ଏକ ରାଲିକୁ ସମ୍ବୋଧିତ କରି କେସିଆର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ମଧ୍ୟ ଟାର୍ଗେଟ କରିଛନ୍ତି। କେସିଆର କହିଛନ୍ତି, ଭାଜପା ୨୦-୩୦ଜଣ ଟିଆରଏସ ବିଧାୟକଙ୍କୁ ୧୦୦ କୋଟି ଲେଖାଏ ଟଙ୍କା ଦେଇ କିଣିବାକୁ ଚେଷ୍ଟା କରୁଛି। ମୁଁ ନରେନ୍ଦ୍ର ମୋଦି ଜୀଙ୍କୁ ପଚାରୁଛି, ଏତେ ନିଷ୍ଠୁରତା କାହିଁକି, ଆପଣ କେତେ ଶକ୍ତି ଚାହୁଁଛନ୍ତି? ଆପଣ ପୂର୍ବରୁ ଦୁଇଥର ନିର୍ବାଚିତ ହୋଇସାରିଛନ୍ତି, ତେବେ କାହିଁକି ଅନ୍ୟ ରାଜ୍ୟର ସରକାରଙ୍କୁ ଭାଙ୍ଗୁଛନ୍ତି। କିନ୍ତୁ ଟିଆରଏସ୍ ବିଧାୟକ ଟଙ୍କା ଲୋଭରେ ଭାଜପାକୁ ଯିବାକୁ ଚାହାନ୍ତି ନାହାନ୍ତି। ମୋଦି ଜୀ ଜଣେ ବିଶ୍ୱଗୁରୁ ନୁହଁନ୍ତି, ସେ ଜଣେ ବିଷ ଗୁରୁ।
ସୂଚନାଯୋଗ୍ୟ, ନିକଟରେ ଚାରି ଜଣ ଟିଆରଏସ ବିଧାୟକଙ୍କୁ ପ୍ରଲୋଭନ ଦେଖାଇବାକୁ ଚେଷ୍ଟା କରିଥିବା ତିନି ଜଣ ବ୍ୟକ୍ତିଙ୍କୁ ଗିରଫ କରାଯାଇ ନ୍ୟାୟିକ ହେପାଜତକୁ ପଠାଯାଇଛି। ଏହାର ଗୋଟିଏ ଦିନ ପରେ ତେଲେଙ୍ଗାନା ସିଏମ କେସିଆର ଭାଜପାକୁ ଟାର୍ଗେଟ କରିଛି।
