ଭୁବନ, ୨୦।୭(ଡି.ଏନ.ଏ.) – ଗ୍ରାମାଞ୍ଚଳବାସୀଙ୍କୁ ବିଶୁଦ୍ଧ ପାନୀୟ ଜଳ ଯୋଗାଇ ଦେବାକୁ ବେଶ୍ ତତ୍ପରତା ଦେଖାଉଛନ୍ତି ସରକାର। ଏଥିପାଇଁ ଆରମ୍ଭ ହୋଇଛି ‘ବସୁଧା’। ଏହି ଯୋଜନା ଆନୁକୂଲ୍ୟରେ ଡିପ୍ ବୋରଓ୍ବେଲ ମାଧ୍ୟମରେ ଓଭରହେଡ୍ ପାଣିଟାଙ୍କି କରି ଯୋଗାଣ କରାଯାଉଛି ଶୁଦ୍ଧ ଜଳ। ହେଲେ ପ୍ରଶାସନିକ ଉଦାସୀନତାରୁ ମାତ୍ର ଦିନ କେଇଟାରେ ଲକ୍ଷ୍ୟଚ୍ୟୁତ ହୋଇପଡୁଛି ଏପରି ବହୁମୁଖୀ ଯୋଜନା। ଏହାର ସଦ୍ୟତମ ଉଦାହରଣ ଦେଖିବାକୁ ମିଳିଛି ଢେଙ୍କାନାଳ ଜିଲା ଭୁବନ ବ୍ଲକ ବାଲିବୋ ଗ୍ରାମରେ। ୫୦ ଲକ୍ଷରୁ ଊର୍ଦ୍ଧ୍ୱ ଟଙ୍କାରେ ତିଆରି ହୋଇଥିବା ପାନୀୟ ଜଳ ପ୍ରକଳ୍ପ କାର୍ଯ୍ୟକ୍ଷମ ହେବାର କିଛି ଦିନ ମଧ୍ୟରେ ସ୍ଥାଣୁ ପାଲଟିଛି। ହାତପାହାନ୍ତାରେ ଟାଙ୍କି ଥାଇ ଦୂଷିତ ଜଳ ବ୍ୟବହାର କରିବାକୁ ବାଧ୍ୟ ହେଉଛନ୍ତି ଲୋକେ, ଯାହା ସରକାରୀ କଳର ଅବହେଳାକୁ ଅଙ୍ଗୁଳି ନିର୍ଦ୍ଦେଶ କରିଛି।
ବର୍ଷ ତମାମ ଜଳକଷ୍ଟ ଭୋଗୁଥିବା ବାଲିବୋ, କେଶରପୁର, ନୂଆ ବାଲିବୋ ଅଞ୍ଚଳର ୨୦୦୦ରୁ ଊର୍ଦ୍ଧ୍ୱ ଲୋକଙ୍କୁ ବିଶୁଦ୍ଧ ପାଣି ଯୋଗାଇ ଦେବାକୁ ୨୦୧୨ରେ ଗ୍ରାମ୍ୟ ଜଳ ଯୋଗାଣ ଓ ପରିମଳ ବିଭାଗ ପକ୍ଷରୁ ଡିପ୍ ବୋରଓ୍ବେଲ ଖୋଳାଯାଇଥିଲା। ଏହି ପ୍ରକଳ୍ପ ମାଧ୍ୟମରେ ପାଇପ୍ ବିଛାଯାଇ ସିଧାସଳଖ ହେଉଥିଲା ଜଳ ଯୋଗାଣ। ହେଲେ କ୍ରମବର୍ଦ୍ଧିଷ୍ଣୁ ଜନସଂଖ୍ୟାକୁ ନଜରରେ ରଖି ପାନୀୟ ଜଳ ପ୍ରକଳ୍ପର କଳେବର ବୃଦ୍ଧି କରିବାକୁ ଯୋଜନା ପ୍ରସ୍ତୁତ କରାଗଲା। ଫଳସ୍ବରୂପ ୨୦୧୭ରେ ନିର୍ମିତ ହେଲା ୧ ଲକ୍ଷ ଲିଟର କ୍ଷମତା ବିଶିଷ୍ଟ ଓଭରହେଡ୍ ପାଣିଟାଙ୍ଗି । ଏଥିରେ ଖର୍ଚ୍ଚ ହେଲା ୫୦ ଲକ୍ଷରୁ ଊର୍ଦ୍ଧ୍ୱ ଟଙ୍କା। ଲୋକାର୍ପଣ ହେବାର କିଛିଦିନ ଯାଏ ପ୍ରକଳ୍ପରୁ ଜଳ ଯୋଗାଣ ସ୍ବାଭାବିକ ଭାବେ ଚାଲିଥିଲା। ଗତ ମାର୍ଚ୍ଚରେ ପୂର୍ତ୍ତ ବିଭାଗ ପକ୍ଷରୁ ରାସ୍ତା ସମ୍ପ୍ରସାରଣ କାମ କରାଯିବାବେଳେ ଠିକାଦାରଙ୍କ ଦାୟିତ୍ୱହୀନତାରୁ ବିଛାଯାଇଥିବା ପାଇପ ନଷ୍ଟ ହୋଇଯାଇଛି। ମୁଖ୍ୟ ପାଇପ୍କୁ ବାଦ୍ ଦେଲେ ଗ୍ରାମାଞ୍ଚଳକୁ ସଂଯୋଗ ହୋଇଥିବା ପାଇପ୍ଗୁଡ଼ିକ ବିଶେଷ ଭାବେ କ୍ଷତିଗ୍ରସ୍ତ ହୋଇଛି। ସେବେଠାରୁ ପାଣି ଯୋଗାଣ ସମ୍ପୂର୍ଣ୍ଣ ବନ୍ଦ ରହିଛି। ବାରମ୍ବାର ଅଭିଯୋଗ ସତ୍ତ୍ୱେ ଏହାକୁ ମରାମତି କରିବା ଦିଗରେ ବିଭାଗୀୟ ଅଧିକାରୀ ଧ୍ୟାନ ଦେଉନାହାନ୍ତି। ଫଳରେ ବାଲିବୋ, କେଶରପୁର, ନୂଆ ବାଲିବୋ ଅଞ୍ଚଳର ହଜାର ହଜାର ଲୋକମାନେ ନାହିଁ ନ ଥିବା ହୀନସ୍ତା ହେଉଛନ୍ତି। ଅନ୍ୟ ଉପାୟ ନ ଥିବାରୁ ସେମାନେ ବାଧ୍ୟହୋଇ ଖୋଲାକୂଅର ଦୂଷିତ ଜଳ ବ୍ୟବହାର କରୁଛନ୍ତି। ପ୍ରକଳ୍ପ ଥିବା ସତ୍ତ୍ୱେ ପାଣି ନ ମିଳିବା ପରିତାପର ବିଷୟ ବୋଲି ଅଞ୍ଚଳବାସୀ ଅଭିଯୋଗ କରିଛନ୍ତି।
ଏ ନେଇ ସରପଞ୍ଚ ସନ୍ତୋଷ କୁମାର ଖୁଣ୍ଟିଆ କୁହନ୍ତି, ଆର୍ଡବ୍ଲ୍ୟୁଏସ୍ଏସ୍ ବିଭାଗ ପାଇପ୍ ବିଛାଇବା କାମରେ ବିଳମ୍ବ କରୁଛି। ଏହାର ତୁରନ୍ତ ପ୍ରତିକାର କରିବାକୁ ପଞ୍ଚାୟତ ପକ୍ଷରୁ ଉଦ୍ୟମ କରାଯାଉଛି। ଏଥିପାଇଁ ସେଣ୍ଟ୍ରାଲ ଫଣ୍ଡରୁ ୩ଲକ୍ଷ ଟଙ୍କା ଅର୍ଥ ବ୍ୟୟ କରି କ୍ଷତିଗ୍ରସ୍ତ ପାଇପ୍ ଲାଇନ୍ ମରାମତି କରିବାକୁ ଯୋଜନା ପ୍ରସ୍ତୁତ କରାଯାଇଛି। ଏହା ପରେ ଗ୍ରାମାଞ୍ଚଳକୁ ଜଳଯୋଗାଣ ସ୍ବାଭାବିକ ହୋଇପାରିବ। ଏ ସଂକ୍ରାନ୍ତରେ ବିଭାଗୀୟ ସହକାରୀ ଯନ୍ତ୍ରୀ ସରଫରାଜ୍ ଖଁା କୁହନ୍ତି, ବିନା ସୂଚନାରେ ଠିକାଦାର ମନଇଚ୍ଛା ରାସ୍ତା ଖୋଳିଦେବା ଯୋଗୁ ପାଇପ୍ ଫାଟିଯାଇଛି। ନୂତନ ପାଇପ୍ ବିଛାଇବା ପାଇଁ ୧୦ ଲକ୍ଷ ଟଙ୍କାର ବଜେଟ କରାଯାଇଛି। ଖୁବଶୀଘ୍ର ଏହି କାମ ଆରମ୍ଭ ହେବ ଏବଂ ସମସ୍ୟାର ସମାଧାନ ହେବ ବୋଲି ଆଶା କରାଯାଉଛି।
