ମିରଟ,୧।୭: ଉତ୍ତରପ୍ରଦେଶରେ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ସରକାରଙ୍କ ପକ୍ଷରୁ ଏବେ ଟ୍ରାଫିକ୍ ନିୟମ କଡ଼ାକଡ଼ି କରାଯାଇଛି। ରାସ୍ତାରେ ଗାଡ଼ି ଚଳାଇବା ସମୟରେ ହେଲମେଟ୍ ପିନ୍ଧିବାକୁ ସରକାର ବାଧ୍ୟତାମୂଳକ କରିଛନ୍ତି। ଏନେଇ ସଚେତନତା ବାର୍ତ୍ତା ଘରେ ଘରେ ପହଞ୍ଚିଥିବା ପରି ମନେହେଉଛି। ଏହାର ସଦ୍ୟତମ ଉଦାହରଣ ମିରଟର ଏକ ବିବାହ ଉତ୍ସବରେ ଦେଖିବାକୁ ମିଳିଛି। ମୁଖ୍ୟମନ୍ତ୍ରୀ ସାମୁହିକ ବିବାହ ଯୋଜନାରେ ଜଣେ ଝିଅ ବାଇକ୍ରେ ବିଦାହୋଇଛନ୍ତି। ତେବେ ବିଦା ହେବା ପୂର୍ବରୁ ନବବିବାହିତା କନ୍ୟା ବରଙ୍କୁ ହେଲମେଟ୍ ପିନ୍ଧାଇବା ପରେ ଗାଡ଼ିରେ ବସିଛନ୍ତି। ଏହି ଭିଡ଼ିଓ ଏବେ ସୋସିଆଲ୍ ମିଡ଼ିଆରେ ବେଶ୍ ଭାଇରାଲ ହେବାରେ ଲାଗିଛି। ସ୍ଥାନୀୟ ଆଶୀର୍ବାଦ ରିସୋର୍ଟରେ ଏକ ସାମୁହିକ ବିବାହରେ କନ୍ୟା ନଜମାଙ୍କ ବିବାହ ବର ନଦିମ୍ଙ୍କ ସହିତ ହୋଇଥିଲା। ବିବାହ ପରେ ନଦିମ୍ ନଜ୍ମାଙ୍କୁ ନେବାକୁ ବାଇକ୍ ଧରି ପହଞ୍ଚିଥିଲେ। ତେବେ ନଜ୍ମା ବାଇକ୍ରେ ବସିବା ପୂର୍ବରୁ ନଦିମ୍ଙ୍କୁ ହେଲମେଟ୍ ପିନ୍ଧାଇଥିଲେ।
