ବ୍ରହ୍ମପୁର ଅଫିସ,୧୬ା୬-ବ୍ରହ୍ମପୁର ରେଳଷ୍ଟେଶନ ନିକଟ ରେଳବାଇ କଲୋନୀ ଦେଇ ଜଣେ ଛାତ୍ରୀ ଶନିବାର ଅନନ୍ତ ନଗରରେ ଥିବା ତାଙ୍କ ମେସକୁ ଯାଉଥିବା ବେଳେ ୨ଜଣ ଦୁର୍ବୃତ୍ତ ବାଇକ୍ରେ ଆସି ତାଙ୍କ ମୋବାଇଲ ଫୋନ ଝାମ୍ପି ନେଇଯାଇଛନ୍ତି। ଏକ ଘରୋଇ ଇଞ୍ଜିନିୟରିଂ କଲେଜରେ ବି ଟେକ ପଢ଼ୁଥିବା ଛାତ୍ରୀ ସୁଜ୍ଞାନୀ ପଣ୍ଡା ଓ ତାଙ୍କ ଭଉଣୀ ପୂଜା ଛତ୍ରପୁରରୁ ବିଶାଖା ଏକ୍ସପ୍ରେସରେ ଆସି ବ୍ରହ୍ମପୁର ରେଳଷ୍ଟେଶନରେ ପହଞ୍ଚିଥିଲେ। ୨ ଭଉଣୀ ଚାଲି ଚାଲି ଫୋନରେ କଥାହୋଇ ଯାଉଥିଲେ। ଦୁର୍ବୃତ୍ତମାନେ ବାଇକ୍ରେ ତାଙ୍କ ପଛପଟୁ ଆସି ଛାତ୍ରୀଙ୍କ ମୋବାଇଲ ଫୋନ ଝାମ୍ପି ନେଇଯାଇଥିଲେ। ପରେ ଛାତ୍ରୀଦ୍ୱୟ ରେଳବାଇ ଥାନାରେ ପହଞ୍ଚି ଘଟଣା ସମ୍ପର୍କରେ ଅଭିଯୋଗ କରିଥିଲେ। ଏସ୍ଆଇ ଗଣପତି ବେହେରା ଅଭିଯୋଗକାରୀ ଛାତ୍ରୀ ସୁଜ୍ଞାନୀଙ୍କ ସହ ଘଟଣାସ୍ଥଳକୁ ଯାଇ ସ୍ଥାନୀୟ ଲୋକଙ୍କୁ ପଚରାଉଚରା କରିଥିଲେ ।
ରାମନଗରର ସୁମତି ଜେନା ରେଳଷ୍ଟେଶନ ଦେଇ ଯାଉଥିବା ବେଳେ ଦୁର୍ବୃତ୍ତମାନେ ତାଙ୍କର ମଧ୍ୟ ଏକ ମୋବାଇଲ ଫୋନ ଝାମ୍ପି ନେଇଥିଲେ। ପୋଲିସ ପାଟ୍ରୋଲିଂ ଠିକ୍ଭାବେ ହେଉ ନ ଥିବାରୁ ଦୁର୍ବୃତ୍ତମାନେ ଏଭଳି ଘଟଣା ଘଟାଉଛନ୍ତି।
