ଅନୁଗୋଳ ଅଫିସ୍, ୧୩।୩ – ଅନୁଗୋଳ ଜିଲା କାର୍ଯ୍ୟାଳୟରେ ଲାଗୁ ହେବ ଇ-କାର୍ଯ୍ୟାଳୟ। ଏହି ବ୍ୟବସ୍ଥା ଫଳରେ ୪ର୍ଥ ଶ୍ରେଣୀ କର୍ମଚାରୀଙ୍କୁ ଚିଠି ଧରି ଆଉ ଏ ବିଭାଗରୁ ସେ ବିଭାଗ ବୁଲିବାକୁ ପଡ଼ିବ ନାହିଁ। ଫାଇଲ ବି ନାଲି ଫିତା ତଳେ ବର୍ଷ ବର୍ଷ ଧରି ପଡ଼ି ରହିବ ନାହିଁ। ଜିଲାରେ ପ୍ରଥମ ପର୍ଯ୍ୟାୟରେ ୨୫ଟି ବିଭାଗକୁ ଏହି ଇ- କାର୍ଯ୍ୟାଳୟରେ ସାମିଲ କରାଯିବା ଯୋଜନା ରହିଛି।
ସରକାରଙ୍କ ୫-ଟିର କାର୍ଯ୍ୟକାରିତାକୁ ନେଇ ପ୍ରଶାସନିକ କାର୍ଯ୍ୟରେ ସ୍ବଚ୍ଛତା ଆଣିବା ପାଇଁ ଅନ୍ଲାଇନରେ କାର୍ଯ୍ୟାଳୟର ଦୈନନ୍ଦିନ କାର୍ଯ୍ୟ ଚାଲିବ। ଆସନ୍ତା ଜୁନରୁ ଅନୁଗୋଳ ଜିଲା କାର୍ଯ୍ୟାଳୟର ୨୫ଟି ବିଭାଗକୁ ନେଇ ଉକ୍ତ ପ୍ରକଳ୍ପ ଆରମ୍ଭ ହେବ। ଏଥିପାଇଁ ସମ୍ପୃକ୍ତ ବିଭାଗ ଗୁଡ଼ିକରେ ଉପଲବ୍ଧ ଥିବା ଭିତ୍ତିଭୂମି ଓ ସମ୍ବଳକୁ ନେଇ ଜିଲାପାଳ ମନୋଜ କୁମାର ମହାନ୍ତିଙ୍କ ଅଧ୍ୟକ୍ଷତାରେ ଗୁରୁବାର ଏକ ବୈଠକ ଅନୁଷ୍ଠିତ ହୋଇଯାଇଛି। ଏହି ବୈଠକରେ ଜିଲାପାଳ କହିଥିଲେ ଯେ, ସମସ୍ତ ବିଭାଗରେ କାର୍ଯ୍ୟରତ କିରାଣି ଓ ଅଧିକାରୀଙ୍କ ପାଖରେ କମ୍ପ୍ୟୁଟର ସହ ଆନୁସଙ୍ଗିକ ବ୍ୟବସ୍ଥା ରହିବ। ଏପରି କି ଇଣ୍ଟରନେଟ୍ ସଂଯୋଗ ସହ ୟୁପିଏସ୍ ଓ ପ୍ରିଣ୍ଟର ଯୋଗାଇ ଦିଆଯିବ। ଏହାଦ୍ୱାରା ସମସ୍ତ ପ୍ରକାର ଚିଠିପତ୍ରର ଆଦାନ ପ୍ରଦାନ ଅନ୍ଲାଇନରେ ହୋଇପାରିବ। କୌଣସି ବିଭାଗରେ ଚିଠି ପଡ଼ି ରହିବ ନାହିଁ କି ଆଦାନ ପ୍ରଦାନରେ ବିଳମ୍ବ ହେବନାହିଁ। ଜିଲା କାର୍ଯ୍ୟାଳୟରେ ସମସ୍ତ ବିଭାଗର ଚିଠିର ଆଦାନ ପ୍ରଦାନ ବ୍ୟବସ୍ଥା ସହିତ ସେଣ୍ଟ୍ରାଲ ଡାଏରୀ ବିଭାଗ କାର୍ଯ୍ୟ କରିବ। କେଉଁ ବିଭାଗରେ କେତେ କମ୍ପ୍ୟୁଟର ଓ କର୍ମଚାରୀ ଅଛନ୍ତି ସେ ସମ୍ପର୍କରେ ଜିଲାପାଳ ସମୀକ୍ଷା କରିଥିଲେ। ବୈଠକରେ ଅତିରିକ୍ତ ଜିଲାପାଳ ତପନ କୁମାର ଶତପଥୀଙ୍କ ସମେତ ଜିଲା କାର୍ଯ୍ୟାଳୟର ବିଭିନ୍ନ ବିଭାଗର ଅଧିକାରୀ ଓ କର୍ମଚାରୀମାନେ ଉପସ୍ଥିତ ଥିଲେ। ଏନ୍ଆଇସିର ଡିଆଇଓ ସୁବ୍ରତ କୁମାର ଚାଟାର୍ଜୀ ଇ-କାର୍ଯ୍ୟାଳୟର କାର୍ଯ୍ୟକାରିତା ସମ୍ପର୍କରେ ଆଲୋକପାତ କରିଥିଲେ।
