ବ୍ରହ୍ମପୁର ଅଫିସ୍,୩ା୬-ରାମଲିଙ୍ଗମ୍ ପୋଖରୀର ସୌନ୍ଦର୍ଯ୍ୟକରଣ କାର୍ଯ୍ୟ ମନ୍ଥରଗତିରେ ଚାଲିଛି। ଫଳରେ ଏହି ପୋଖରୀର ତିନି ପାଖରେ ଥିବା ରାସ୍ତାରେ ଯାତାୟାତରେ ଅସୁବିଧା ହେଉଛି। ରାସ୍ତା କାର୍ଯ୍ୟ ଅଧାପନ୍ତରିଆ ରହିବା ଫଳରେ ଲୁହା ଛଡ଼ ପଦାକୁ ବାହାରିଛି। ଅନେକ ସ୍ଥାନରେ ଲମ୍ବା ଲୁହା ଛଡ଼ ରାସ୍ତା ଉପରେ ରହିଛି । ବାଇକ୍ରେ ଯାତାୟାତ ବେଳେ ସାମାନ୍ୟ ଅସାବଧାନତା ହେଲେ ଲୁହା ଛଡ଼ ବାଜିବାର ଆଶଙ୍କା ସୃଷ୍ଟି ହୋଇଛି। ବିଶେଷକରି ରାତିରେ ଏହି ରାସ୍ତାରେ ଯିବା କଷ୍ଟକର ହୋଇପଡ଼ୁଛି । ନିର୍ମାଣ କାର୍ଯ୍ୟ ଚାଲିଥିବା ବେଳେ ଲୁହା ଛଡ଼ଗୁଡ଼ିକ ନ କାଟି, ଖୋଲା ଛାଡ଼ି ଦିଆଯାଇଛି। ରାସ୍ତାରେ ଭିଡ଼ ରହୁଥିବା ବେଳେ ଅନେକ ସମୟରେ କାର୍ ଏବଂ ବସ୍ ଏହି ଲୁହା ଛଡ଼କୁ ଧକ୍କା ଦେଉଛି ।
ପ୍ରାୟ ୪ବର୍ଷ ହେଲା ବ୍ରହ୍ମପୁର ମହାନଗର ନିଗମ(ବିଏମ୍ସି) ଏହି ପୋଖରୀକୁ ଘରୋଇ ମାଲିକାନାରୁ ଦଖଲକୁ ନେଇଛି। ଦୁଇଟି ପର୍ଯ୍ୟାୟରେ ୧୮କୋଟି ଟଙ୍କାରେ ଏହି ପୋଖରୀର ସୌନ୍ଦର୍ଯ୍ୟକରଣ ପାଇଁ ଯୋଜନା ରହିଛି। ଏପରିକି ପ୍ରଥମ ପର୍ଯ୍ୟାୟରେ ରାଜ୍ୟ ନଗର ଉନ୍ନୟନ ବିଭାଗ ସହରାଞ୍ଚଳ ଭିତ୍ତିଭୂମି ବିକାଶ ପାଣ୍ଠିରୁ ୮କୋଟି ଟଙ୍କା ଋଣ ମିଳିସାରିଛି। ୨୦୧୬ ଫେବୃୟାରୀ ୨ତାରିଖରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବ୍ରହ୍ମପୁର ଗସ୍ତ ବେଳେ ସୌନ୍ଦର୍ଯ୍ୟକରଣ କାର୍ଯ୍ୟର ଶିଳାନ୍ୟାସ କରିଥିଲେ। କିନ୍ତୁ ଏହା ପରଠୁ ନିର୍ମାଣ କାର୍ଯ୍ୟରେ ଅହେତୁକ ବିଳମ୍ବ ଦେଖିବାକୁ ମିଳିଛି। ବହୁ ଥର ସରକାରୀସ୍ତରରେ ସମୀକ୍ଷା ବୈଠକ ବସୁଛି। ନିର୍ମାଣ ଶେଷ ପାଇଁ ତାରିଖ ଧାର୍ଯ୍ୟ ହେଉଛି, ହେଲେ କାମ ଶେଷ ହେଉନି। ଅନ୍ୟପଟେ ଅଧାପନ୍ତରିଆ କାର୍ଯ୍ୟ ଯୋଗୁ ଏବେ ପୋଖରୀ ରାସ୍ତାଦେଇ ଯାତାୟାତ କରିବା କଷ୍ଟକର ହୋଇ ପଡ଼ିଲାଣି ।
