ଲାଠୋର, ୧୬ା୫ (ଡି.ଏନ୍.ଏ): ବଲାଙ୍ଗୀର ଜିଲା ଖପ୍ରାଖୋଲ ବ୍ଲକ ଲାଠୋର ଖଇରାପଡ଼ାର ବୁରୁଧ୍ ମନୁ ଭୋଇ(୮୦)କଁର ମୁର୍ତୁରେ ପରିବାରଟା ପୂରାପୂରି ବେସାହାରା ହେଇଯାଇଛନ୍। ସୂଚନା ଅନ୍ସାରେ ମନୁ ଭୋଇକଁର ମାଏକିନା ଗମ୍ଭାରୀ ଭୋଇ, ଝି’ କଲାବତୀ ଆର ପୁଓ ଶଙ୍କରକେ ନେଇ ତାକର ପରିବାର। ଖାଲି ଘରଡିହକେ ଛାଡିଦେଲେ ତାକର ସଁପତିବାଡ଼ି ବଲି କିଛି ନାଇଁ। ପରିବାରଟା ଆଦିବାସୀ ସମାଜର ହେଇଥିଲା ବେଲେ ଜଂଗଲରୁ ଶୁଖା କାଠ୍, ସରଗି ପତର, କାଠି ଆନି ବିକାଭଂଗା କରି ପରିବାରଟା ଚଲୁଥିଲେ। ପୁଓ ଝି’କେ ବିହାଚୁରା କଲା ଉତାରୁ ଦୁଇ ବୁଢ଼ାବୁଢ଼ି ଗୁଟେ ଝାଟିମାଟିର ଖପର ଘରେ ରହୁଥିଲେ। ହେଲେ ୮ ବଛର ତଲେ ପୁଓ କେହେନ୍ସି ଗୁଟେ ରୋଗ୍ରେ ପଡ଼ି ଆରପାରକେ ଚାଲିଗଲେ। ଏନ୍ତାଥି ବହ ବତୀ ଭୋଇ ଆର ତିନ୍ ନାତିନାତେକର ଭୋଝ୍ ବୁଢ଼ାବୁଢ଼ିର ଉପରେ ପଡ଼ିଥିଲା। ଫିଦିନ ସଖାଲୁ ବୁରୁଧ୍ ମନୁ ଜଂଗଲରୁ କାଠ୍, ପତର, କାଠି ଆନି ବିକାଭଂଗା କରୁଥିଲେ। ସେଥ୍ରେ ତାକର ପରିବାରଟା ଦୁଖେ କଷ୍ଟେ ଚଲିଯାଉଥିଲା। ସବୁଦିନର ଲେଖେଁ ଗଲା ଶୁକୁରବାର ଶନିବାର ଦୁଇଦିନ ବୁରୁଧ୍ ଜଂଗଲକେ ଯାଇ ଫିରଲା ଉତାରୁ ଦିହିପା ବିଗଡ଼ିବାର ଅନୁଭବ କରିଥିଲେ। ତା’ପରେ ସେ ଘରେ ରହି ଚିକିସତ୍ିତ ହେଉଥିଲେ, ହେଲେ ହଠାତ୍ ୧୫ ତାରିଖ୍ ବୁଧୁବାର ଦିନର ୧୦ ବଜେ ଆରପାରକେ ଚାଲିଗଲେ। ଘରର ଗୁଟେବଲି ରୁଜ୍ଗାରିଆ ଲୋକ୍ ଚାଲିଗଲାରୁ ପରିବାରଟା ଏହେଦେ ବେସାହାରା ହେଇଯାଇଛନ୍। ସରକାରୀ ସୁବିଧା ବଏଲେ ମାସିକ୍ ଶାଶ୍ ବହ ପାଉଥିବାର ୧ହଜାର ଟଁକା ଭତା ଆର ୩୦ କେ.ଜି. ଚାଉଲ। ହେଲେ ସେଟା ବି ଏଡ଼େ ବଡ଼ ପରିବାରକେ ନିହଁଟ ପଡ଼ୁଛେ। ଏନ୍ତାଥି ପରିବର ଉପରେ ଚଡ଼କ ପଡ଼ିଛେ, ପରିବାରଟା କେନ୍ଥେଇ ଚଲବା ଶାଶ୍ ବହ ସେ ଚିନ୍ତାରେ ଘାରି ହେଉଛନ୍। ପରିବାରଟା ନିହାତି ଗରିବ୍ ହେଇଥିଲେ ବି ପ୍ରଧାନମନ୍ତ୍ରୀ ଆବାସ ଯୋଜନାରୁ ବଁଚିତ୍ ହେଇ ଗୁଟେ ଭଂଗା ଦଦ୍ରା ଖପର ଘରେ ରହୁଛନ୍। ଏନ୍ତା ପରିସ୍ଥିତିରେ ଇ ଗରିବ୍ ପରିବାରକେ ସବୁପରକାର ସରକାରୀ ସୁବିଧା ସୁଯୋଗ ଯୁଗେଇ ଦେବାର ନିହାତି ଦରକାର ପଡ଼ୁଛେ। ଇ ବାବ୍ଦେ ଥାନୀୟ ସରପଁଚ୍ ପ୍ରବିଣ କୁମାର ଅଗ୍ରଓ୍ବାଲକୁଁ ପଚରାଲାରୁ ହାଲଘଡ଼ିକେ ପରିବାରକେ ହରିଶ୍ଚନ୍ଦ୍ର ଯୋଜନାର ଟଁକା ଦିଆଯିବା ଆର ଯେନ୍ଟା ସରକାରୀ ହିସାବେ ହେବା ତାହାକୁ ସୁବିଧା ସୁଯୋଗ ଯୁଗେଇ ଦେବାର ବେବସ୍ତା କରାଯିବା ବଲି ସେ କହିଥିଲେ।
