ଖଣ୍ଡପଡା,୨୧ା୪(ସ୍ବ.ପ୍ର.) ନୟାଗଡ ସହରବାସୀଙ୍କୁ ପାନୀୟ ଜଳ ସମସ୍ୟା ଅତିଷ୍ଠ କରୁଛି। ଜଳଯୋଗାଣର ବ୍ୟବସ୍ଥା କରାଯାଇଥିଲେ ମଧ୍ୟ ତାହା ଆରମ୍ଭରୁ ସମସ୍ୟା ସୃଷ୍ଟି କରୁଛି। କଣ୍ଟିଲୋ, ବାଣପୁର ନିକଟ ମହାନଦୀରୁ ୩୦ କି.ମି ଦୂର ନୟାଗଡ ସହରକୁ ହୋଇଥିବା ପାନୀୟ ଜଳ ଯୋଗାଣ ଯୋଜନା କାର୍ଯ୍ୟ ଆରମ୍ଭରୁ ବିଭିନ୍ନ ସ୍ଥାନରେ ପାଇପ କଣା ହୋଇଛି। ଫଳରେ ପାଣି ଲିକ୍ ହୋଇ ଅପଚୟ ହେଉଛି। କୁଆଁରିଆ ସେତୁ ପାର୍ଶ୍ୱରେ ଯାଇଥିବା ମୁଖ୍ୟ ପାଇପ ସ୍ଥଳରୁ ପାଣି ଲିକ୍ ହୋଇ ମହାନଦୀର ପାଣି କୁଆଁରିଆ ନଦୀକୁ ଯାଉଛି। ଏପରି କି ପାଣି ଲିକ୍ ଯୋଗୁ ରାସ୍ତା ପାର୍ଶ୍ୱ ନଷ୍ଟ ହେଉଥିବା ଜଣା ପଡିଛି।
ପ୍ରକାଶ ଯେ, କଣ୍ଟିଲୋ-ବାଣପୁର ନିକଟ ମହାନଦୀଠାରୁ ପ୍ରାୟ ୩୦ କି.ମି ଦୂର ନୟାଗଡ ସହରାଞ୍ଚଳର ପାନୀୟ ଜଳ ସମସ୍ୟାକୁ ଦୂର କରିବା ଲକ୍ଷ୍ୟରେ ୧୯୯୩ ମସିହା ଜିଲା ଯୋଜନା ଓ ଉନ୍ନୟନ ବୋର୍ଡ ବୈଠକର ନିଷ୍ପତ୍ତି କ୍ରମେ ରାଜ୍ୟ ସରକାର ପ୍ରାୟ ୨୦ କୋଟି ୭୯ ଲକ୍ଷ ଟଙ୍କାର ଏକ ମେଗା ଜଳ ଯୋଗାଣ ପ୍ରକଳ୍ପ ପ୍ରତିଷ୍ଠା କରିଛନ୍ତି। ଏବେ ଏହି ପ୍ରକଳ୍ପ ଗତ ୨୦୧୬ ମସିହାରେ କାର୍ଯ୍ୟକାରୀ ହୋଇଥିବା ଜଣା ପଡିଛି। ମାତ୍ର ବାଣପୁର ନିକଟସ୍ଥ ମହାନଦୀ ଘାଟରୁ ବିଭିନ୍ନ ଗ୍ରାମ ମଧ୍ୟ ଦେଇ ପାଇପ ଲାଇନ ବିଛାଯାଇ ଦୀର୍ଘ ୩୦ କି.ମି ଦୂର ଅତିକ୍ରମ କରି ନୟାଗଡ ସହରାଞ୍ଚଳକୁ ପାନୀୟ ଜଳ ଯୋଗାଇବାର ବ୍ୟବସ୍ଥା କରାଯାଇଥିଲା। ଏହି ପ୍ରକଳ୍ପରୁ ଏକଶହ ଅଶ୍ୱ ଶକ୍ତି ସମ୍ପନ୍ନ ବିଦ୍ୟୁତ୍ ଚାଳିତ ମୋଟର ପମ୍ପ ସାହାଯ୍ୟରେ ପାଣି ଉଠୁଥିବାରୁ ଅଧିକ ଚାପରେ ପାଣି ନିର୍ଗତ ହୋଇ ପାଇପ ସଂଯୋଗ ସ୍ଥଳରେ ଲିକେଜ ସୃଷ୍ଟି ହୋଇ ସମସ୍ୟା ଉପୁଜୁଛି ା ବିଶେଷ କରି ଗତ ୫ ଦିନ ହେବ କଣ୍ଟିଲୋ- ବେଣାଗାଡିଆ ମୁଖ୍ୟ ପୂର୍ତ୍ତ ରାସ୍ତାର କୁଆଁରିଆ ସେତୁ ପାର୍ଶ୍ୱରେ ଯାଇଥିବା ପାଇପର ସଂଯୋଗ ସ୍ଥଳରୁ ସକାଳ ପ୍ରାୟ ୪ଟାରୁ ଅପରାହ୍ନ ୫ଟା ପର୍ଯ୍ୟନ୍ତ ଅବିଶ୍ରାନ୍ତ ପାଣି ନିର୍ଗତ ହୋଇ ଅପଚୟ ହେଉଛି। ଗ୍ରୀଷ୍ମ ପ୍ରବାହ ସମୟରେ ଲୋକେ ପାଣିମୁନ୍ଦେ ପାଇଁ ଡହଳ ବିକଳ ହେଉଥିବା ବେଳେ ଏହି ଲିକେଜ ପାଣି ନିକଟରେ ଅବସ୍ଥିତ ରାମଚଣ୍ଡୀ ମନ୍ଦିରକୁ ଆସୁଥିବା ପର୍ଯ୍ୟଟକ ଏବଂ ଭୋଜିଭାତ କରୁଥିବା ଲୋକମାନଙ୍କ ପାଇଁ ବରଦାନ ସଦୃଶ୍ୟ ପାଲଟିଛି। ସଂଯୋଗସ୍ଥଳରୁ ପ୍ରବାହିତ ପ୍ରଚୁର ପାଣି ନଦୀକୂଳ ରାସ୍ତାରୁ ମୂର୍ତ୍ତିକା କ୍ଷୟ ହୋଇ ସମସ୍ୟା ସୃଷ୍ଟି କରୁଛି । ଏ ସମ୍ପର୍କରେ ନୟାଗଡ ଜନ ସ୍ବାସ୍ଥ୍ୟ ବିଭାଗ ସହକାରୀ ଯନ୍ତ୍ରୀ ତ୍ରିଲୋଚନ ବେହେରାଙ୍କୁ ପଚାରିବାରୁ ସେ ତୁରନ୍ତ ଏ ଦିଗରେ ବ୍ୟବସ୍ଥା କରିବେ ବୋଲି ସୂଚନା ଦେଇଛନ୍ତି ।
