ଶ୍ରୀନଗର,୩୧।୧୦: କେନ୍ଦ୍ରଶାସିତ ଅଞ୍ଚଳ ଜମ୍ମୁ-କଶ୍ମୀରର ପ୍ରଥମ ଉପରାଜ୍ୟପାଳ ଭାବେ ଗିରିଶଚନ୍ଦ୍ର ମୁର୍ମୁ ଶପଥ ଗ୍ରହଣ କରିଛନ୍ତି। ୧୯୮୫ ଗୁଜରାଟ କ୍ୟାଡ଼ର ଆଇଏଏସ୍ ଅଫିସର ଗିରିଶଙ୍କୁ ଜମ୍ମୁ-କଶ୍ମୀର ହାଇକୋର୍ଟ ମୁଖ୍ୟ ବିଚାରପତି ଗୀତା ମିତ୍ତଲ ଗୁରୁବାର ପଦ ଓ ଗୋପନୀୟତାର ଶପଥ ପାଠ କରାଇଛନ୍ତି। କେନ୍ଦ୍ରଶାସିତ ଅଞ୍ଚଳ ହେବା ପରେ ଏଠାରେ ଏବେ ଉର୍ଦ୍ଦୁ ବଦଳରେ ହିନ୍ଦୀ ଭାଷାରେ ସରକାରୀ କାର୍ଯ୍ୟ ସମ୍ପନ୍ନ ହେବ। ତେବେ ପୁନର୍ଗଠନ ଅଧିନିୟମ ଧାରା ୪୭ ଅନ୍ତର୍ଗତ ଜମ୍ମୁ-କଶ୍ମୀରରେ ନୂଆ ବିଧାନସଭା ଗଠନ ପରେ ସରକାର ନୂଆ ଏକାଧିକ ଭାଷା ଚୟନ କରିପାରିବେ। ଏହା ସହିତ ରାଜ୍ୟରେ ୨ଟି ନୂଆ ରେଡିଓ ଷ୍ଟେଶନ ମଧ୍ୟ ସ୍ଥାପିତ ହେବ। ପୂର୍ବରୁ ଜମ୍ମୁ-କଶ୍ମୀର ବିଧାନସଭା ସଦସ୍ୟ ସଂଖ୍ୟା ୧୦୭ ଥିବାବେଳେ ଏବେ ଏହା ୧୧୪ ହେବ। ଏବେ ଜମ୍ମୁ-କଶ୍ମୀରରେ ୨୦ଟି ଜିଲା ରହିଛି। ତେବେ ନୂଆ ବିଧାନସଭା ଗଠନ ପରେ ଜିଲା ସଂଖ୍ୟା ବଢ଼ାଯିବ ବୋଲି କୁହାଯାଉଛି।
