ସାକ୍ଷୀଗୋପାଳ, ୪।୧୦(ଡି.ଏନ୍.ଏ.): ଓଡ଼ିଆ ଭାଷା ସାହିତ୍ୟର ଉତ୍ତରୋତ୍ତର ଗବେଷଣା ଲକ୍ଷ୍ୟ ନେଇ ପୁରୀ ଜିଲା ସତ୍ୟବାଦୀର ଐତିହାସିକ ବକୁଳବନ ସଂଲଗ୍ନ ୯. ୬୦ ଏକର ଜମିରେ ଓଡିଆ ବିଶ୍ୱବିଦ୍ୟାଳୟ ସ୍ଥାପନ କରାଯିବାକୁ ସ୍ଥିର ହୋଇଛି। ସାକ୍ଷୀଗୋପାଳ ଠାକୁରଙ୍କ ମାଲିକାନାରେ ରହିଥିବା ଏହି ଭୂ-ସମ୍ପତ୍ତିି ହସ୍ତାନ୍ତର ପୂର୍ବରୁ ଗୁରୁବାର କେନ୍ଦ୍ରାଞ୍ଚଳ ରାଜସ୍ବ କମିଶନର ଅନିଲ କୁମାର ସାମଲ ଓ ପୁରୀ ଜିଲାପାଳ ବଲଓ୍ବନ୍ତ ସିଂ ପ୍ରସ୍ତାବିତ ଜମି ଅନୁଧ୍ୟାନ କରିଛନ୍ତି। ଜମିର ନକ୍ସା ସହିତ ଉଚ୍ଚ ଅଧିକାରୀ ଦ୍ୱୟ ରାଧାକୁଣ୍ଡ ପାର୍ଶ୍ୱ ଅଞ୍ଚଳ ବୁଲି ଦେଖିଥିଲେ। ଉକ୍ତଜମିକୁ ଲାଗି ରହିଥିବା ହାଇସ୍କୁଲ ଖେଳପଡ଼ିଆର ବିକାଶ, ପଞ୍ଚସଖାଙ୍କ ସ୍ମୃତି ସମାଧି ପୀଠ ଓ ପାଠାଗାର, ଦୁଇଟି ଉଚ୍ଚ ବିଦ୍ୟାଳୟ ଏବଂ ଜନବସତି ସମ୍ପର୍କରେ ଅଧିକାରମାନଙ୍କୁ ପଚାରି ବୁଝିଥିଲେ। ସତ୍ୟବାଦୀ ଗୋପୀନାଥ ଦେବଙ୍କ ମାଲିକାନାରେ ରହିଥିବା ସତ୍ୟବାଦୀ ତହସିଲ ଅଧୀନ ଫୁଲଅଳସା ମୌଜା ଖାତା ନଂ ୧୦୦ ରୁ ୨୮ ଏକର ୭୪ ଡିସିମିଲ ଜମି ପ୍ରଥମେ ଏଥିପାଇଁ ଚିହ୍ନଟ କରାଯାଇଥିଲା। ମାତ୍ର ସାକ୍ଷୀଗୋପାଳଙ୍କ ଗୁପ୍ତ ବୃନ୍ଦାବନ ଲୀଳାକ୍ଷେତ୍ର ତଥା ମହାପ୍ରଭୁ ଶ୍ରୀଜଗନ୍ନାଥଙ୍କ ସେନାପଟା ଲାଗି ନୀତି ସହିତ ଜଡିତ ବକୁଳବନକୁ ସଂରକ୍ଷିତ ରଖାଯାଇଛି। ଅବଶିଷ୍ଟ ୯.୬୦ ଏକର ଜମିର ମୂଲ୍ୟ ୧୧ କୋଟି ୩୩ ଲକ୍ଷ ୫୮ ହଜାର ଟଙ୍କା ସାକ୍ଷୀଗୋପାଳ ମନ୍ଦିରକୁ ପ୍ରଦାନ କରାଯାଇ ଜମି ହସ୍ତାନ୍ତର ପ୍ରକ୍ରିୟା ଆରମ୍ଭ ହୋଇଛି। ଏ ସଂକ୍ରାନ୍ତରେ ମନ୍ଦିର କାର୍ଯ୍ୟନିର୍ବାହୀ ଅଧିକାରୀଙ୍କ ୧୩/୨୦୧୯ ରିଭିଜନ ପିଟିଶନ, ଦେବୋତ୍ତର କମିଶନରଙ୍କ ମଞ୍ଜୁରୀ ମିଳିବା ପରେ ରାଜ୍ୟ ଆଇନ ବିଭାଗ ସ୍ବୀକୃତି ଦେଇଛନ୍ତି। ଆର୍ଡିସି ଏବଂ ଜିଲାପାଳ ପର୍ଯ୍ୟଟନ ପ୍ରକଳ୍ପ ଓ ବନ ବିଦ୍ୟାଳୟର ସ୍ମୃତି ସନ୍ତକ ବୁଲି ଦେଖିଥିଲେ। ସାକ୍ଷୀଗୋପାଳ ଠାକୁରଙ୍କୁ ଦର୍ଶନ କରି ମନ୍ଦିର ପ୍ରତ୍ନତାତ୍ୱିକ ସଂରକ୍ଷଣ ବିଷୟରେ ବୁଝିଥିଲେ। ତହସିଲଦାର କସ୍ତୁରୀ ପ୍ରଧାନ, ଅତିରିକ୍ତ ତହସିଲଦାର ଉଲ୍ଲାସ ସେଠୀ, ମନ୍ଦିର କାର୍ଯ୍ୟନିର୍ବାହୀ ଅଧିକାରୀ କୈଳାସ ଚନ୍ଦ୍ର ମିଶ୍ର ପ୍ରମୁଖ ଉପସ୍ଥିତ ଥିଲେ।
