ଦିଗପହଣ୍ଡି,୨୨ା୪(ଡି.ଏନ.ଏ.)- ଗଞ୍ଜାମ-ଗଜପତି ଜିଲା ସୀମାନ୍ତ ଘଞ୍ଚ ଜଙ୍ଗଲରେ ମଙ୍ଗଳବାର ଅବକାରୀ ଓ ପୋଲିସ ଟିମ୍ ମିଳିତ ଭାବେ ଚଢାଉ କରି ୮୦ ଲିଟର ରନ୍ଧା ଦେଶୀମଦ ଜବତ କରିଛି। ଏଥିସହ ୧୬୮୦୦ ଲିଟର ପୋଚ ନଷ୍ଟ କରି ମଦ ରନ୍ଧା ସରଞ୍ଜାମ ଜବତ କରାଯାଇଛି। ମଙ୍ଗଳବାର ପୂର୍ବାହ୍ନ ପ୍ରାୟ ୮ ଟାରେ ଏକ୍ଜିକ୍ୟୁଟିଭ ମାଜିଷ୍ଟ୍ରେଟ ତଥା ଦିଗପହଣ୍ଡି ବିଡ଼ିଓ ହଳଧର ଶବରଙ୍କ ଉପସ୍ଥିତିରେ ଦିଗପହଣ୍ଡି ଅବକାରୀ ବିଭାଗ, ବ୍ରହ୍ମପୁର ଅବକାରୀ ଷ୍ଟ୍ରାଇକିଂ ଫୋର୍ସ, ପାଟପୁର ଓ କେ.ନୂଆ ଗାଁ ଥାନା ସମେତ ଗଜପତି ଜିଲା ମୋହନା ପୋଲିସ ମିଳିତ ଭାବେ ଗଞ୍ଜାମ-ଗଜପତି ଜିଲା ସୀମାନ୍ତ ଲଖାରି ଜଙ୍ଗଲର ବିଭିନ୍ନ ସ୍ଥାନରେ ଥିବା ଚୋରା ମଦ କାରଖାନା ଉପରେ ଅତର୍କିତ ଚଢାଉ କରିଥିଲେ। ଲଖାରୀ ଜଙ୍ଗଲ ସଂଲଗ୍ନ ରଙ୍ଗୀଆମ୍ବ, ତୁଳସୀ ନଗର, ଜୁଆଣୀପଲ୍ଲୀ, ଶ୍ୟାମସୁନ୍ଦରପୁରପଲ୍ଲୀ, ବଡପଦା ଆଦି ବିଭିନ୍ନ ଗାଁ ନିକଟରେ ଦେଶୀ ମଦ ପ୍ରସ୍ତୁତ କରି ବାହାର ଅଞ୍ଚଳମାନଙ୍କୁ ଚାଲାଣ କରାଯାଉଥିବା ନେଇ ଅବକାରୀ ଗୋଇନ୍ଦା ସୂଚନାକୁ ଭିତ୍ତିକରି ଏହି ଚଢାଉ କରାଯାଇଥିଲା। ଚଢାଉ ପୂର୍ବରୁ ମଦ ମାଫିଆ ଫେରାର ହୋଇଯାଇଥିଲେ। ନଂ-୫/୨୦-୨୧ରେ ମାମଲା ରୁଜୁ କରାଯାଇଛି। ଦକ୍ଷିଣାଞ୍ଚଳ ଅବକାରୀ ଗୋଇନ୍ଦା ନିରୀକ୍ଷକ ଧିରେନ କୁମାର ବେହେରା, ବ୍ରହ୍ମପୁର ଅବକାରୀ ଷ୍ଟ୍ରାଇକିଂ ଫୋର୍ସ ଉପ ନିରୀକ୍ଷକ ଶ୍ରୀଧର ମହାନ୍ତି, କେ. ନୂଆଗାଁ ଥାନା ଅଧିକାରୀ ମାଧବାନନ୍ଦ ନାୟକ, ଦିଗପହଣ୍ଡି ଅବକାରୀ ଏସ୍.ଆଇ ଅଭିରାମ ସାହୁ ପ୍ରମୁଖ ଚଢାଉରେ ସାମିଲ ଥିଲେ।
