ନୂଆଦିଲ୍ଲୀ, ୫ା୮(ପି.ଟି.): କଂଗ୍ରେସ କାର୍ଯ୍ୟକାରୀ କମିଟି(ସିଡବ୍ଲ୍ୟୁସି) ବୈଠକ ଅଗଷ୍ଟ ୧୦ରେ ବସିବାକୁ ଯାଉଛି। ଏହି ବୈଠକରେ ଦଳର ନେତା କିଏ ହେବ, ସେନେଇ ଚୂଡ଼ାନ୍ତ ନିଷ୍ପତ୍ତି ନିଆଯିବାର ସମ୍ଭାବନା ରହିଛି। ସାଧାରଣ ନିର୍ବାଚନରେ ଦଳର ଶୋଚନୀୟ ପରାଜୟ ପରେ ଗତ ମେ ୨୫ରେ ଅଧ୍ୟକ୍ଷ ପଦରୁ ରାହୁଲ ଗାନ୍ଧୀ ଇସ୍ତଫା ଦେଇଥିଲେ। ଦଳରେ ନେତୃତ୍ୱ ସଙ୍କଟକୁ ନେଇ ବରିଷ୍ଠ ନେତା ଶଶୀ ଥରୁର୍, କରନ୍ ସିଂ, ଅମରିନ୍ଦର ସିଂ ପ୍ରମୁଖ ସ୍ବର ଉଠାଇଥିଲେ ହେଁ କିଛି ସୁଫଳ ମିଳିପାରି ନାହିଁ। ୟୁପିଏ ଅଧ୍ୟକ୍ଷା ସୋନିଆ ଗାନ୍ଧୀ ଦଳର ଅଧ୍ୟକ୍ଷ ପଦ ଲଗି ଅନିଚ୍ଛା ପ୍ରକାଶ କରିଛନ୍ତି। ଗାନ୍ଧୀ ପରିବାରରୁ କେହି ଦଳର ଅଧ୍ୟକ୍ଷ ହେବେ ନାହିଁ ବୋଲି ମଧ୍ୟ ସେ ସ୍ପଷ୍ଟ କରିଛନ୍ତି। ୧୦ ତାରିଖ ପୂର୍ବାହ୍ନ ୧୧ଟାରେ ସିଡବ୍ଲ୍ୟୁସି ବୈଠକ ଅନୁଷ୍ଠିତ ହେବ ବୋଲି ଦଳର ସାଙ୍ଗଠନିକ ସମ୍ପାଦକ କେ.ସି. ବେଣୁଗୋପାଳ ଟୁଇଟ୍ କରିଛନ୍ତି। ପାର୍ଲାମେଣ୍ଟ ଅଧିବେଶନ ୭ରେ ଶେଷ ହେବ। ତେଣୁ ୧୦ରେ ହେବାକୁ ଥିବା ବୈଠକରେ କଂଗ୍ରେସ ନେତୃତ୍ୱ କାହାକୁ ଦିଆଯିବ, ସେନେଇ ଚୂଡ଼ାନ୍ତ ନିଷ୍ପତ୍ତି ଗ୍ରହଣ କରାଯିବ ବୋଲି ଜଣାପଡ଼ିଛି।
ସିଡବ୍ଲ୍ୟୁସି ବୈଠକ ୧୦ରେ ବସିବାକୁ ଥିବାବେଳେ କଂଗ୍ରେସ ଅଧ୍ୟକ୍ଷ ପଦ ଲାଗି ସବୁଠାରୁ ଚର୍ଚ୍ଚାରେ ଅଛନ୍ତି ଦଳର ବରିଷ୍ଠ ନେତା ସଚିନ୍ ପାଇଲଟ୍ ଓ ଜ୍ୟୋତିରାଦିତ୍ୟ ସିନ୍ଧିଆ। ମୁମ୍ବାଇ କଂଗ୍ରେସ ମୁଖ୍ୟ ମିଲିନ୍ଦ ଦେଓରା ମଧ୍ୟ ଏହି ଦୁଇ ନେତାଙ୍କ ନାମ ରବିବାର ପ୍ରସ୍ତାବ ଦେଇଛନ୍ତି। ପଞ୍ଜାବ ମୁଖ୍ୟମନ୍ତ୍ରୀ ଅମରିନ୍ଦର ସିଂ ଦଳର ମୁଖ୍ୟ ପଦରେ ଜଣେ ଯୁବ, ଅଭିଜ୍ଞ, ଦକ୍ଷ ଓ ସାଙ୍ଗଠନିକ ଅଭିଜ୍ଞତା ସମ୍ପନ୍ନ ନେତାଙ୍କୁ ବସାଇବା ଲାଗି ପ୍ରସ୍ତାବ ଦେଇଥିବାବେଳେ ଏ ଦୁହିଙ୍କ ପାଖରେ ଏଭଳି ଦକ୍ଷତା ରହିଥିବା ଦେଓରା ପ୍ରକାଶ କରିଛନ୍ତି। ଦଳକୁ ଆଗେଇ ନେବାରେ ଏମାନେ ସକ୍ଷମ ହୋବେ ବୋଲି ସେ ମତବ୍ୟକ୍ତ କରିଛନ୍ତି। ଏ ଦୁହି ନେତାଙ୍କ ମଧ୍ୟରୁ ଜଣଙ୍କୁ ମଧ୍ୟବର୍ତ୍ତିକାଳୀନ ଅଧ୍ୟକ୍ଷ ପଦ ମିଳିବା ଦରକାର। ପରେ ଦଳରେ ନିର୍ବାଚନ କରାଯାଇ ଅଧ୍ୟକ୍ଷ ନିଯୁକ୍ତି କରାଯିବା ସପକ୍ଷରେ ସେ ମତ ଦେଇଛନ୍ତି। ଅଧ୍ୟକ୍ଷ ପଦ ବାଛିବାରେ ବିଳମ୍ବ ହେଲେ ଦଳ ବହୁ କ୍ଷତି ସହିବ ବୋଲି ସେ ପ୍ରକାଶ କରିଛନ୍ତି।
