ଭଦ୍ରକ ଅଫିସ,୧୮ା୬: ସୀମାରେ ଚାଇନା-ଭାରତ ସଂଘର୍ଷ ପରେ ଦେଶବ୍ୟାପୀ ଆଲୋଡ଼ନ ଖେଳିଯାଇଛି। ସଂଘର୍ଷରେ ଭାରତର ଯବାନମାନେ ଶହୀଦ ହେବା ପରେ ଚାଇନା ବିରୋଧରେ ଅସନ୍ତୋଷ ବଢ଼ିବାରେ ଲାଗିଛି। ଏହି ପରିପ୍ରେକ୍ଷୀରେ ଭଦ୍ରକ ଜିଲାରେ ଚାଇନା ସାମଗ୍ରୀ ବିକ୍ରି ଓ ବ୍ୟବହାରଠାରୁ ଦୂରେଇ ରହିବା ପାଇଁ ଆହ୍ବାନ ଦିଆଯାଇଛି। ଜିଲା ସାମାଜିକ ସଂଗଠନ ପକ୍ଷରୁ ଏହି ଆହ୍ବାନ ଦିଆଯାଇ ଗୁରୁବାର ସହର ପରିକ୍ରମା କରାଯାଇଛି। ଆଜି ସଂଗଠନର ସଦସ୍ୟମାନେ ସହରର ବନ୍ତ ଛକରୁ ବାହାରି ବଜାର ପରିକ୍ରମା କରିବା ପରେ ଟାଉନ୍ ହଲ ଛକଠାରେ ପହଞ୍ଚିଥିଲେ। ସଂଗଠନର ସଦସ୍ୟମାନେ ବଜାର ଭିତରେ ବିଭିନ୍ନ ଦୋକାନକୁ ଯାଇ ଚାଇନା ସାମଗ୍ରୀ ବିକ୍ରି ନ କରିବା ସହ ସ୍ବଦେଶୀ ସାମଗ୍ରୀ ବିକ୍ରି କରିବା ପାଇଁ ଅନୁରୋଧ କରିଥିଲେ। ଚାଇନା କେଉଁ ଭଳି ଆମକୁ ଶୋଷଣ କରୁଛି ଓ କରୋନା ଜୀବାଣୁକୁ ସମଗ୍ର ପୃଥିବୀରେ ପ୍ରସାର କରାଇ ବାଣିଜ୍ୟକୁ କରାଗତ ଲାଗି ଉଦ୍ୟମ କରୁଥିବା ସମ୍ପର୍କରେ ଜନସାଧାରଣଙ୍କୁ ସଚେତନ କରିଥିଲେ। ପରେ ସଂଗଠନ ପକ୍ଷରୁ ଟାଉନ ହଲ୍ଠାରେ ଶହୀଦ ଭାରତୀୟ ଯବାନଙ୍କ ଅମର ଆତ୍ମା ପ୍ରତି ଶ୍ରଦ୍ଧାଞ୍ଜଳି ଅର୍ପଣ କରାଯାଇଥିଲା।
