ଅନୁଗୋଳ ଅଫିସ, ୨୫।୮ – ଅଗଷ୍ଟ ମାସର ଚତୁର୍ଥ ଶନିବାରରେ ଅନୁଗୋଳ ଜିଲାପାଳ ବିଭିନ୍ନ ବିଭାଗର ଉନ୍ନୟନ କାର୍ଯ୍ୟର ସମୀକ୍ଷା କରିଛନ୍ତି। ସମସ୍ତ ଅଧିକାରୀଙ୍କୁ ଜିଲାପାଳ ମନୋଜ କୁମାର ମହାନ୍ତି ୫-ଟି (ଟ୍ରାନ୍ସପରେନ୍ସି, ଟିମ୍ୱର୍କ, ଟେକ୍ନୋଲୋଜି, ଟ୍ରାନ୍ସଫର୍ମେଶନ ଓ ଟାଇମ୍୍)ର ଗୁରୁମନ୍ତ୍ର ଜଣାଇବା ସହ ବିଭିନ୍ନ ଉନ୍ନୟନ କାର୍ଯ୍ୟର ଅଗ୍ରଗତି ବିଷୟରେ ଅବଗତ କରାଇଛନ୍ତି।
ଶେଷ ଶନିବାର ଛୁଟି ଥିଲେ ବି ଜିଲାପାଳଙ୍କ କାର୍ଯ୍ୟାଳୟ ଚଳଚଞ୍ଚଳ ରହିଥିଲା। ଜିଲାରେ ଥିବା ବିଭିନ୍ନ ପଦାଧିକାରୀମାନେ ଆସି ଜିଲାପାଳଙ୍କ କାର୍ଯ୍ୟାଳୟରେ ପହଞ୍ଚତ୍ଥିଲେ। ଜିଲାପାଳ ରାଜ୍ୟ ସରକାର ପ୍ରଧାନ୍ୟ ଦେଉଥିବା ୫-ଟି ମନ୍ତ୍ର ଉପରେ ବିସ୍ତୁତ ଭାବେ ଆଲୋଚନା କରିଥିଲେ। ପୂର୍ବାହ୍ନ ୧୦ଟାରୁ ଆରମ୍ଭ ହୋଇଥିବା ବୈଠକର ପ୍ରଥମ ଭାଗରେ ସମସ୍ତ ବିଭାଗୀୟ ଅଧିକାରୀଙ୍କ ସହ ଜିଲାପାଳ ମହାନ୍ତି ବିଭିନ୍ନ କାର୍ଯ୍ୟର ସମୀକ୍ଷା କରିଥିଲେ। ବିଭିନ୍ନ ଉପଖଣ୍ଡ ଅଧିକାରୀମାନେ ସେମାନଙ୍କ ଅଞ୍ଚଳ ଗସ୍ତବେଳେ ଅବଗତ ହୋଇଥିବା ସମସ୍ୟାଗୁଡିକର ସମାଧାନ ସମ୍ପର୍କରେ ଆଲୋଚନା ହୋଇଥିଲା। ଏପରି କି ପ୍ରତି ସପ୍ତାହରେ ବିଭାଗୀୟ ଅଧିକାରୀମାନେ ନିଜ ନିଜର କ୍ଷେତ୍ର ପରିଦର୍ଶନ କରିବା ସହ ଲୋକଙ୍କଠାରୁ ସିଧାସଳଖ ସମସ୍ୟା ବୁଝି ସମାଧାନ କରିବାକୁ ଜିଲାପାଳ ବିଭାଗୀୟ ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି। ଜିଲାସ୍ତରୀୟ ଅଧିକାରୀମାନଙ୍କ ସମୂହ ବୈଠକ ପରେ ପ୍ରତି ବିଭାଗର ଅଧିକାରୀଙ୍କୁ ଡାକି ଜିଲାପାଳ ବିଭିନ୍ନ କାର୍ଯ୍ୟର ସମୀକ୍ଷା କରିଥିଲେ। ସ୍ବାସ୍ଥ୍ୟ ଓ ଶିକ୍ଷା ବିଭାଗ ଅଧିକାରୀଙ୍କୁ ଜିଲାପାଳ ବିଭିନ୍ନ ପ୍ରସଙ୍ଗ ପଚାରି ବୁଝିଥିଲେ। ଆସନ୍ତା ଗାନ୍ଧୀ ଜୟନ୍ତୀଠାରୁ ରାଜ୍ୟ ସରକାର ପ୍ରତିମାସରେ ସିଧାସଳଖ ପ୍ରତି ଜିଲାରୁ ୫ ଜଣ ଲୋକଙ୍କୁ ସ୍ବାସ୍ଥ୍ୟ ଓ ଶିକ୍ଷା ବିଭାଗ ସମ୍ବନ୍ଧୀୟ ୧୦ଟି ପ୍ରଶ୍ନ କରିବେ ବୋଲି ସ୍ଥିର ହୋଇଛି। ତେଣୁ ଏହି ଦୁଇଟି ବିଭାଗକୁ ପ୍ରଶାସନ ଗୁରୁତ୍ୱ ଦେଇଥିଲା। ପ୍ରତି ମାସ ଶେଷ ଶନିବାର ଜିଲାପାଳ ୫-ଟି ମନ୍ତ୍ର ଉପରେ ବିଭାଗୀୟ ଅଧିକାରୀଙ୍କ ସହ ଆଲୋଚନା କରିବେ। ଏହି ବୈଠକରେ ଅତିରିକ୍ତ ଜିଲାପାଳ ତପନ କୁମାର ଶତପଥୀ, ଜିଲା ଗ୍ରାମ୍ୟ ଉନ୍ନୟନ ପ୍ରକଳ୍ପ ଅଧିକାରୀ ଅତୁଲ୍ୟ କୁମାର ଚମ୍ପତ୍ତିରାୟ, ଅନୁଗୋଳ ଉପଜିଲାପାଳ ବାସୁଦେବ ଶତପଥୀ, ତାଳଚେର ଉପଜିଲାପାଳ, ଆଠମଲ୍ଲିକ ଉପଜିଲାପାଳ, ଜିଲା ଶିକ୍ଷା ଅଧିକାରୀ ସଚ୍ଚିଦାନନ୍ଦ ବେହେରା, ଡେପୁଟି କଲେକ୍ଟର ବଇତୁରା ଦୀପ ପ୍ରମୁଖଙ୍କ ସହ ଜିଲାସ୍ତରୀୟ ଅଧିକାରୀମାନେ ଉପସ୍ଥିତ ଥିଲେ।
