ଯଦି ଘର ତିଆରି କରିବାର ଥାଏ ଆମେ ପ୍ରଥମେ ସେହି ଜାଗାରେ ଥିବା ଗଛ କାଟି ସଫା କରିଥାଉ। ବୃକ୍ଷ ହିଁ ଜୀବନ ଜାଣି ମଧ୍ୟ ଆମେ ଏହା କରିବାକୁ ପଛାଇ ନ ଥାଉ। କିନ୍ତୁ ଏପରି ଗୋଟେ ପରିବାର ଅଛି, ଯିଏକି ଗଛ ନ କାଟି ତା ସହ ରହିବାକୁ ପସନ୍ଦ କରିଛନ୍ତି। ଏଭଳି ଦୃଶ୍ୟ ଦେଖିବାକୁ ମିଳିଛି ମଧ୍ୟପ୍ରଦେଶର ଜବଲପୁରରେ। ଯେଉଁଠାରେ ଘର କରିବା ପାଇଁ ପରିବାର ଲୋକ ଗଛ ନ କାଟି ଗଛରେ ହିଁ ଘର କରି ରହୁଛନ୍ତି। ଘର ନର୍ମାଣ ସମୟରେ ଗଛ କାଟିବା ବଦଳରେ ତାକୁ ନିଜ ପରିବାରର ଏକ ସଦସ୍ୟ ଭାବେ ଗ୍ରହଣ କରିନେଇଛନ୍ତି।
୧୯୯୪ରୁ ଘରେ ରହିଛି ଗଛ
ଜବଲପୁରରେ ଯେ କୌଣସି ଲୋକଙ୍କୁ ଏହି ଘର ବିଷୟରେ ପଚାରିବେ ତାହା ସମସ୍ତଙ୍କୁ ଜଣାଥିବ। ସେହି ଘରକୁ ପୁରାପୁରି ଅଶ୍ୱସ୍ତ ଗଛ ଢାଙ୍କିକି ରହିଛି। ଯୋଗେସ କେସରବାନି ନାମକ ବ୍ୟକ୍ତି ପୂରା ପରିବାର ସହ ସେଠାରେ ରହୁଛନ୍ତି। ତାଙ୍କ କହିବା ଅନୁସାରେ ୧୯୯୪ରୁ ସେଠାରେ ଅଶ୍ୱସ୍ତ ଗଛ ରହିଛି। ଘର ତିଆରି କରିବା ସମୟରେ ଯୋଗେସଙ୍କ ମା ବାପା ଜଣେ ଇଞ୍ଜିନିୟରଙ୍କୁ ଡାକି ଏହି ଘର ତିଆରି କରିଥିଲେ।
ଗଛକୁ ହୋଇସାରିଛି ୧୫୦ ବର୍ଷ
ଯୋଗେସ କୁହନ୍ତି, ତାଙ୍କ ମା ବାପା ପ୍ରକୃତିକୁ ବହୁତ ଭଲ ପାଆନ୍ତି। ଘର ତିଆରି ସମୟରେ ହିଁ ତାଙ୍କ ବାପା ଗଛ ନ କାଟିବା ପାଇଁ ନିଷ୍ପତି ନେଇଥିଲେ। ଏବେ ସେହି ଗଛକୁ ୧୫୦ ବର୍ଷ ହୋଇସାରିଛି। ଗଛଟିକୁ କାଟିବା ବହୁତ ସହଜ କିନ୍ତୁ ଏହାକୁ ବଢ଼ାଇବା ବହୁତ କଷ୍ଟ ବୋଲି ସେ କୁହନ୍ତି।
ଯୋଗେଶଙ୍କ ଗଛ ଚିନ୍ତା
ଗଛ ଏବେ ଯୋଗେସଙ୍କ ପରିବାର ସଦସ୍ୟ ହୋଇଯାଇଛି। ଏହି ଗଛ ଯୋଗୁ ବିଭିନ୍ନ ପ୍ରକାର ପକ୍ଷୀ ମଧ୍ୟ ଆସି ବସା ବାନ୍ଧିଛନ୍ତି। ଏହି ଗଛ ଲୋକମାନଙ୍କୁ ଆକର୍ଷିତ କରିଥାଏ। ବାଟରେ ଯାଉଥିବା ଲୋକେ ଗଛ ସହ ସେଲଫି ମଧ୍ୟ ଉଠାଇଥାନ୍ତି। ତେବେ ଗଛ ନ କାଟି ଏଭଳି ଭାବେ ପ୍ରକୃତିକୁ ରକ୍ଷା କରାଯାଇପାରିବ ବୋଲି ଯୋଗେଶ ଭାବନ୍ତି।
ଗଛ ପାଇଁ ହୋଇନି କୌଣସି ଅସୁବିଧା
ଘର ତିଆରି ହେଲା ପରେ କିଛି ଇଞ୍ଜିନିୟରିଂ ଛାତ୍ର ସେହି ସ୍ଥାନକୁ ଆସି ଘରର ଡିଜାଇନ ବିଷୟରେ ଅଧ୍ୟୟନ କରନ୍ତି। ଏହି ଗଛ ପାଇଁ ପରିବାରକୁ କୌଣସି ଅସୁବିଧା ହୁଏ କି ବୋଲି ଛାତ୍ରମାନେ ପଚାରନ୍ତି। ଆଉ ଏହାର ଉତ୍ତରରେ ଯୋଗେସ କୁହନ୍ତି ଏଠାରେ ଗଛ ଅଛି ବୋଲି ଆମକୁ ଜଣାପଡ଼େ ନାହିଁ। ତେବେ ଜବଲପୁରରେ ଥିବା ଏହି ଘର ଏବେ ଚର୍ଚ୍ଚାର ବିଷୟ ପାଲଟିଛି।
