ଅନୁଗୋଳ ଅଫିସ, ୩୦।୮-ଅନୁଗୋଳ ପୌର ସଂସ୍ଥାକୁ ଛାଡ଼ୁନି ଅଳିଆ ବିବାଦ। ସହରର ଅଳିଆ ଯେଉଁଠି ପକାଯିବାକୁ ସ୍ଥାନ ଚିହ୍ନଟ ହେଉଛି ସେଠାରେ ବିରୋଧର ସ୍ବର ଦେଖିବାକୁ ମିଳୁଛି। ଗୁରୁବାର ଏପରି ଏକ ବିରୋଧ ଘଟଣା ଯୋଗୁ ଅଳିଆ ପକାଇବାକୁ ସକାଳୁ ଯାଇଥିବା ଟ୍ରାକ୍ଟର ସନ୍ଧ୍ୟାରେ ସେହି ଅଳିଆ ଧରି ପୁଣି ସହରକୁ ଫେରିଆସିଛି। ତେବେ ଏଥର ଗ୍ରାମବାସୀ ନୁହନ୍ତି ବରଂ ଏକ ଘରୋଇ ବିଦ୍ୟାଳୟର ଶିକ୍ଷୟିତ୍ରୀ ଶିକ୍ଷକ ଏବଂ ଛାତ୍ରୀଛାତ୍ରମାନେ ଏପରି ବିରୋଧ କରିଛନ୍ତି। ସେମାନେ ରାସ୍ତାରେ କାଠଗଣ୍ଡି ପକାଇ ଅବରୋଧ କରିବାରୁ ପୌର ସଂସ୍ଥାର ଅଡ଼ୁଆ ବଢ଼ିବାରେ ଲାଗିଛି।
ଅନୁଗୋଳ ସହରର ଅଳିଆ ପଞ୍ଚମହଲା ଠାରେ ଥିବା ଲିକୁଇଡ୍ ଟ୍ରିଟମେଣ୍ଟ ପ୍ଲାଣ୍ଟ ପାଖରେ ପକାଯିବାକୁ ଜିଲା ପ୍ରଶାସନ ଜାଗା ଚିହ୍ନଟ କରିଥିଲା। ଗତ ୧ ତାରିଖରୁ ଉକ୍ତ ଚିହ୍ନଟ ଜାଗାରେ ପୌର ପ୍ରଶାସନ ପକ୍ଷରୁ ଅଳିଆ ପକାଯାଉଥିଲା। କିନ୍ତୁ ଗୁରୁବାର ସକାଳୁ ଅଳିଆ ଗାଡ଼ି ସେଠାକୁ ଯିବାବେଳେ ଉକ୍ତ ଘରୋଇ ବିଦ୍ୟାଳୟ ଶିକ୍ଷୟିତ୍ରୀ ଓ ଶିକ୍ଷକଙ୍କ ସହ ଛାତ୍ରୀଛାତ୍ରମାନେ ଏହାକୁ ବିରୋଧ କରିଥିଲେ। ଅଳିଆ ପକାଯିବାରୁ ସେଠାରେ ଦୁର୍ଗନ୍ଧ ହେବା ସହ ଅସ୍ବାସ୍ଥ୍ୟକର ପରିବେଶ ସୃଷ୍ଟି ହେଉଛି। ତେଣୁ ଏଠାରେ ଅଳିଆ ନ ପକାଇ ବାକୁ ସେମାନେ ଦାବି କରିଥିଲେ। ଏପରି କି ଅଳିଆ ନେଇ ଟ୍ରାକ୍ଟର ଯାଉଥିବା ରାସ୍ତାକୁ ମଧ୍ୟ ଅବରୋଧ କରିଥିଲେ। ଫଳରେ ସେଠାରେ ଅଳିଆ ବୋଝେଇ ଟ୍ରାକ୍ଟର ସକାଳୁ ସନ୍ଧ୍ୟା ପର୍ଯ୍ୟନ୍ତ ଛିଡ଼ା ହେବା ପରେ ସନ୍ଧ୍ୟାରେ ପୁଣି ସହରକୁ ଫେରି ଆସିଥିଲା। ଏ ନେଇ ନିର୍ବାହୀ ଅଧିକାରୀ ଶୁଭେନ୍ଦୁ କୁମାର ଜେନା କହିଛନ୍ତି, ସେଠାରେ ଅଳିଆ ପକାଗଲେ କୌଣସି ସମସ୍ୟା ନାହିଁ। ବିଦ୍ୟାଳୟ ଶିକ୍ଷୟିତ୍ରୀ ଓ ଶିକ୍ଷକଙ୍କ ସହ ଛାତ୍ରୀଛାତ୍ର କହିଁକି ବିରୋଧ କରୁଛନ୍ତି ତାହା ସେ ଜାଣି ନାହାନ୍ତି। ଏ ନେଇ ଜିଲା ପ୍ରଶାସନକୁ ଅବଗତ କରାଯିବ। ବିଦ୍ୟାଳୟ କର୍ତ୍ତୃପକ୍ଷଙ୍କୁ ଡାକି ଆଲୋଚନା କରାଯିବ ବୋଲି ନିର୍ବାହୀ ଅଧିକାରୀ କହିଛନ୍ତି।
