ଓ୍ବାଶିଂଟନ,୨୭।୪: ଗ୍ଲୋବାଲ ଓ୍ବାର୍ମିଂର ପ୍ରଭାବରେ ଜଳଜୀବ ପ୍ରଜାତି ସମେତ ପେଙ୍ଗୁଇନ୍ ବଂଶ ଏବେ ବିଳୁପ୍ତି ଦ୍ୱାରା ଦେଶରେ ପହଞ୍ଚିଛି। ଇତିମଧ୍ୟରେ କେତେକ ପ୍ରଜାତିର ଜଳଜୀବ ଏବଂ ଉଦ୍ଭିଦ ଲୋପ ମଧ୍ୟ ହୋଇସାରିଛନ୍ତି। ୨୦୧୬ରେ ଅଣ୍ଟାର୍କଟିକାରେ ଜଳବାୟୁ ପରିବର୍ତ୍ତନର ପ୍ରଭାବରେ ଝଡ଼ ସୃଷ୍ଟି ହୋଇଥିଲା। ଏହାଯୋଗୁ ହିମ ପାହାଡ଼ ତରଳିବାରେ ଲାଗିଥିଲା। ୨୦୧୭ ଏବଂ ୨୦୧୮ରେ ଏଠାରେ ଏହି ଧାରା ଜାରି ରହିଛି। ଫଳରେ ଏଠାରେ ବାସ କରୁଥିବା ପେଙ୍ଗୁଇନ୍ ବଂଶ ଅନ୍ୟ ଅଞ୍ଚଳକୁ ସ୍ଥାନାନ୍ତରିତ ହେବାରେ ଲାଗିଛନ୍ତି। କେତେକ ପେଙ୍ଗୁଇନ୍ ପରିବର୍ତ୍ତିତ ପରିବେଶରେ ଖାପଖୁଆଇ ନ ଚଳିପାରି ମରି ଯାଇଥିବା ବିଶେଷଜ୍ଞ ସୂଚନା ଦେଇଛନ୍ତି। ଉପଗ୍ରହରୁ ମିଳିଥିବା ଚିତ୍ରରୁ ଜଣାପଡ଼ିଛି ଯେ, ପେଙ୍ଗୁଇନ୍ ଏବେ ଅନ୍ୟ ଉପଯୁକ୍ତ ସ୍ଥାନ ସନ୍ଧାନରେ ଅଛନ୍ତି। ଯଦି ସେମାନଙ୍କୁ ଉପଯୋଗୀ ଆଶ୍ରୟ ସ୍ଥଳ ନ ମିଳେ ତେବେ ଏହି ପ୍ରଜାତି ପାଇଁ ବିପଦ ସୃଷ୍ଟି ହେବ ବୋଲି ବ୍ରିଟିଶ୍ ଅଣ୍ଟାର୍କଟିକା ସର୍ଭେ(ବିଏଏସ୍) ପକ୍ଷରୁ କୁହାଯାଇଛି। ଏଠାରେ ପୂର୍ବରୁ ୨୫ ହଜାରୁ ଅଧିକ ପେଙ୍ଗୁଇନ୍ ଥିଲେ। ମାତ୍ର ବର୍ତ୍ତମାନ ସେମାନଙ୍କ ସଂଖ୍ୟା ଧୀରେଧୀରେ କମିବାରେ ଲାଗିଥିବା ବିଏଏସ୍ ସାଟେଲାଇଟ୍ ଚିତ୍ରରୁ ଜଣାପଡ଼ିଛି।
