ନୂଆଦିଲ୍ଳୀ,୨୪।୯(ପି.ଟି.)- ବହୁ ପ୍ରତିକ୍ଷୀତ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ନିର୍ବାଚନ ତାରିଖରେ ଗୋଟିଏ ଦିନ ଅଦଳବଦଳ ହୋଇଛି। ପୂର୍ବରୁ ଏହି ନିର୍ବାଚନ ଅକ୍ଟୋବର ୨୨ ତାରିଖରେ ହେବାର ଥିଲା। ତେବେ ବର୍ତ୍ତମାନ ଏହାକୁ ୨୩ ତାରିଖରେ ଆୟୋଜନ କରାଯିବ ବୋଳି ପ୍ରଶାସକ କମିଟି (ସିଓଏ) ମୁଖ୍ୟ ବିନୋଦ ରାୟ କହିଛନ୍ତି। ହରିୟାଣା ଓ ମହାରାଷ୍ଟ୍ରରେ ନିର୍ବାଚନ ହେବାକୁ ଯାଉଥିବାରୁ ଏପରି ପରିବର୍ତ୍ତନ କରିବାକୁ ହେଲା ବୋଲି ବିନୋଦ କହିଛନ୍ତି। ଉଭୟ ରାଜ୍ୟର ନିର୍ବାଚନ ଗୋଟିଏ ପର୍ଯ୍ୟାୟରେ ଅକ୍ଟୋବର ୨୧ ତାରିଖରେ ହେବ। ଦୁଇ ୟୁନିଟ୍ର ଭୋଟର ମେମ୍ବର ବୋର୍ଡ ନିର୍ବାଚନ ପ୍ରକ୍ରିୟାରେ ସାମିଲ ହେବା ନେଇ ସମସ୍ୟାର ସମ୍ମୁଖୀନ ହେବେ। ଫଳରେ ନିର୍ବାଚନ ତାରିଖକୁ ଗୋଟିଏ ଦିନ ଘୁଞ୍ଚାଇବାକୁ ନିଷ୍ପତ୍ତି ନିଆଗଲା ବୋଲି ସେ କହିଛନ୍ତି। ନିର୍ବାଚନକୁ ଘୁଞ୍ଚାଇବା ସପକ୍ଷରେ ନ ଥିଲେ ମଧ୍ୟ ଦୁଇଟି ରାଜ୍ୟର ନିର୍ବାଚନ ପାଇଁ ଏପରି ନିଷ୍ପତ୍ତି ନେବାକୁ ହେଲା ବୋଲି ସିଓଏର ଅନ୍ୟତମ ସଦସ୍ୟା ଡାଏନା ଇଦୁଜୀ କହିଛନ୍ତି।
ସେପ୍ଟେମ୍ବର ୨୦ ତାରିଖରେ ସୁପ୍ରିମକୋର୍ଟ ଦେଇଥିବା ରାୟ ଅନୁସାରେ ବିସିସିଆଇ ନିର୍ବାଚନ ଏକାଥରକେ ଗୋଟିଏ ଦିନରେ ଆୟୋଜନ ହେବ। ତେବେ ରାଜ୍ୟ ଆସୋସିଏଶନ ନିର୍ବାଚନଗୁଡିକୁ ନିର୍ବାଚନ ପାଇଁ କିଛି ଦିନ ଅଧିକ ଦିଆଯାଇପାରେ ବୋଲି କୁହାଯାଇଥିଲା। ଗତ ମଙ୍ଗଳବାର ହୋଇଥିବା ସୁପ୍ରିମକୋର୍ଟ ଶୁଣାଣିରେ ତାମିଲନାଡୁ କ୍ରିକେଟ ଆସୋସିଏଶନ (ଟିଏନ୍ସିଏ) ନିର୍ବାଚନକୁ ସ୍ଥଗିତ ରଖିବାକୁ ନିଷ୍ପତ୍ତି ନିଆଯାଇଥିଲା। ଏ ନେଇ ବିନୋଦ ସନ୍ତୋଷ ପ୍ରକଟ କରିଛନ୍ତି। ଉଲ୍ଲେଖଥାଉ କି, ୨୦୧୭ଠାରୁ ସିଓଏ ଭାରତୀୟ କ୍ରିକେଟର ପରିଚାଳନା କରୁଛନ୍ତି। ପ୍ରଶାସନରେ ସଂସ୍କାର ଆଣିବା ପାଇଁ ସୁପ୍ରିମକୋର୍ଟ ଦ୍ୱାରା ନିଯୁକ୍ତ ଜଷ୍ଟିସ ଆରଏମ୍ ଲୋଧା କମିଟି ସିଓଏକୁ ନିର୍ଦ୍ଦେଶ ଦେଇଛି।
