ଭୁବନେଶ୍ୱର,୨୨ା୧୦:(ବ୍ୟୁରୋ) କନ୍ଧମାଳ ଜିଲା ଗୁମୁଡ଼ୁମାହାରେ ପୋଲିସ ଗୁଳିରେ ମୃତ ବ୍ୟକ୍ତିଙ୍କ ପରିବାର ଓ ଆହତଙ୍କୁ ଏଯାଏ ମିଳିନି ନ୍ୟାୟ। ରାଜ୍ୟ ମାନବାଧିକାର କମିଶନ (ଓଏଚ୍ଆର୍ସି)ଙ୍କ ନିର୍ଦ୍ଦେଶ ସତ୍ତ୍ୱେ ମୃତକଙ୍କ ପରିବାରକୁ ଅତିରିକ୍ତ ୨ଲକ୍ଷ ଟଙ୍କା କ୍ଷତିପୂରଣ ଦିଆଯାଇନାହିଁ। ବିଭିନ୍ନ ଆଳ ଦେଖାଇ ସମୟ ଗଡ଼ାଉଛି ପ୍ରଶାସନ। ଶେଷରେ ନ୍ୟାୟ ପାଇଁ ମୃତକଙ୍କ ପରିବାର ପୁଣି ସୋମବାର ଓଏଚ୍ଆର୍ସିଙ୍କ ଦ୍ୱାରସ୍ଥ ହୋଇଛନ୍ତି। ସେମାନେ କମିଶନଙ୍କୁ ଭେଟି ଏକ ସ୍ମାରକପତ୍ର ପ୍ରଦାନ କରିଛନ୍ତି।
ପୋଲିସ ଗୁଳିରେ ଦେଢ଼ ବର୍ଷର ପୁଅ ଓ ସ୍ତ୍ରୀକୁ ହରାଇ ନିଜେ ଗୁରୁତର ଆହତ ହୋଇଥିବା ଲୁଟ୍ ଦିଗଲଙ୍କ ସମେତ ବବି ମଳିକ, ବନମାଳୀ ମଳିକ, ଡୁଲାର ଦିଗଲ, ରୀନା ରାଣୀ ଓ ଅନ୍ୟ କେତେଜଣ ମିଳିତ ଭାବେ କମିଶନଙ୍କୁ ଭେଟିଥିଲେ। କୋଳରେ ଛୋଟ ଶିଶୁକୁ ଧରି ଆସିଥିବା ରୀନା କହିଛନ୍ତି, ପୋଲିସ ଗୁଳିଲେ ମୋ ମା’ ଆରପାରିକୁ ଚାଲିଗଲେ। ପରେ ବାପା ବି ଆଖି ବୁଝିଲେ। କେମିତି ଚଳିବୁ ବୋଲି କହି ଭୋ ଭୋ ହୋଇ କାନ୍ଦି ପକାଇଥିଲେ। ଗତ ୧୨ ତାରିଖରେ ସେମାନେ ଏହି ଘଟଣା ବିଷୟରେ କମିଶନଙ୍କୁ ଜଣାଇବା ପାଇଁ ଆସିଥିଲେ। କିନ୍ତୁ କାର୍ଯ୍ୟାଳୟ ଛୁଟି ଥିବାରୁ ସେମାନେ ଫେରିଯାଇଥିଲେ। ଗୁଳିକାଣ୍ଡ ଘଟଣାରେ ଦୋଷୀ ପୋଲିସ ବିରୋଧରେ କାର୍ଯ୍ୟାନୁଷ୍ଠାନ, ପ୍ରତ୍ୟେକ ମୃତକଙ୍କ ପରିବାରକୁ ୫୦ ଲକ୍ଷ ଓ ଆହତଙ୍କୁ ୨୫ ଲକ୍ଷ ଟଙ୍କା କ୍ଷତିପୂରଣ ଦେବା ସହ ସ୍ଥାୟୀ ନିୟୁକ୍ତି, ଗ୍ରାମକୁ ପକ୍କା ରାସ୍ତା, ବିଜୁଳି, ପାଣି, ସ୍ବାସ୍ଥ୍ୟକେନ୍ଦ୍ର, ମୋବାଇଲ୍ ଟାଓ୍ବାର ଆଦି ବ୍ୟବସ୍ଥା କରିବା ପାଇଁ ସେମାନେ କମିଶନଙ୍କ ଦୃଷ୍ଟି ଆକର୍ଷଣ କରିଛନ୍ତି। ୨୦୧୮ ଅଗଷ୍ଟ ୨୪ରେ ମୃତକଙ୍କ ପରିବାରକୁ ଦୁଇମାସ ମଧ୍ୟରେ ଅଧିକ ୨ ଲକ୍ଷ ଟଙ୍କା କ୍ଷତିପୂରଣ ଦେବାକୁ କମିଶନ ଯେଉଁ ଆଦେଶ ଦେଇଥିଲେ ସରକାର ତାହା କାର୍ଯ୍ୟକାରୀ କରି ନ ଥିବା ନେଇ କମିଶନଙ୍କ ଦୃଷ୍ଟି ଆକର୍ଷଣ କରିଥିଲେ। ସେମାନଙ୍କ ସହ ଆସିଥିବା ଦୁଇ ମାନବାଧିକାରୀ କର୍ମୀ ବିଶ୍ୱପ୍ରିୟ କାନୁନ୍ଗୋ ଓ ନରେନ୍ଦ୍ର ମହାନ୍ତି ମଧ୍ୟ ଆଉଏକ ପୃଥକ୍ ଅଭିଯୋଗ ଦାଖଲ କରିଛନ୍ତି। ପ୍ରତ୍ୟେକ ପରିବାରଙ୍କୁ ଜଙ୍ଗଲ ଅଧିକାର ଆଇନ ଅନୁସାରେ ଜମି ଯୋଗାଇ ଦେବା ପାଇଁ ସେମାନେ ଅନୁରୋଧ କରିଛନ୍ତି।
୨୦୧୬ ଜୁଲାଇ ୮ରେ ଏକ ଅଟୋରେ ଗ୍ରାମର କେତେଜଣ ଲୋକ ଯାଉଥିବାବେଳେ କାଦୁଅ ରାସ୍ତାରେ ଫସି ଯାଇଥିଲେ। ସେମାନେ ଅଟୋକୁ କାଦୁଅରୁ ବାହାର କରିବା ପାଇଁ ପଛରୁ ଠେଲୁଥିବାବେଳେ ପୋଲିସ ମାଓବାଦୀ ସନ୍ଦେହ କରି ଆଖିବୁଜା ଗୁଳି ଚଳାଇବାରୁ ୫ଜଣ ନିରୀହ ଆଦିବାସୀଙ୍କ ମୃତ୍ୟୁ ଘଟିଥିଲା ଓ ୮ଜଣ ଗୁରୁତର ଆହତ ହୋଇଥିଲେ। କନ୍ଧମାଳ ଜିଲା ଜଜ୍ ଘଟଣାର ତଦନ୍ତ କରିଥିଲେ ମଧ୍ୟ ଦୋଷୀ ପୋଲିସକୁ ଘଣ୍ଟଘୋଡ଼ାଇବା ପାଇଁ ପରବର୍ତ୍ତୀ ସମୟରେ ରିପୋର୍ଟକୁ ଚାପି ଦିଆଯାଇଥିବା ଅଭିଯୋଗ ହୋଇଥିଲା।
