ଗୁଣପୁର,୩ା୫(ଡି.ଏନ୍.ଏ.): କେରଳରୁ ୩୨ ଜଣ ଶ୍ରମିକ ରବିବାର ରାୟଗଡ଼ା ଜିଲାର ଗୁଣପୁର ଅଞ୍ଚଳକୁ ଫେରିଛନ୍ତି। ସେମାନଙ୍କ ମଧ୍ୟରେ ନବରଙ୍ଗପୁର ଜିଲା କୋଷାଗୁମୁଡ଼ା ଅଞ୍ଚଳର ୬ ଜଣ ରହିଛନ୍ତି। ସମସ୍ତ ଶ୍ରମିକ ସ୍ବତନ୍ତ୍ର ଟ୍ରେନ୍ ଯୋଗେ ଆସି ରବିବାର ସକାଳେ ଗଞ୍ଜାମ ଜିଲାର ଜଗନ୍ନାଥପୁରରେ ପହଞ୍ଚିଥିଲେ। ଗୁଣପୁରରୁ ଯାଇଥିବା ଏକ ବସ୍ରେ ଅତିରିକ୍ତ ତହସିଲଦାର ସେମାନଙ୍କୁ ଗୁଣପୁର କଲେଜସ୍ଥିତ ସଙ୍ଗରୋଧ କେନ୍ଦ୍ର ନିକଟକୁ ଆଣିଥିଲେ। ସେଠାରୁ ୬ ଶ୍ରମିକଙ୍କୁ ନବରଙ୍ଗପୁର ପଠାଇ ଦିଆଯାଇଥିଲା। ତେବେ ରାୟଗଡ଼ା ଜିଲାର ୨୬ ଜଣଙ୍କ ମଧ୍ୟରୁ ୨ ଜଣଙ୍କୁ ଜ୍ୱର ହେଉଥିବାରୁ ଉଭୟଙ୍କୁ ଗୁଣପୁର ଆଦର୍ଶ ବିଦ୍ୟାଳୟସ୍ଥିତ କୋଭିଡ୍ ସ୍ବାସ୍ଥ୍ୟକେନ୍ଦ୍ରରେ ରଖାଯାଇଛି। ଅନ୍ୟମାନଙ୍କୁ ନିଜ ଅଞ୍ଚଳ ଚନ୍ଦ୍ରପୁର, ପଦ୍ମପୁର, ବିଷମକଟକ, ମୁନିଗୁଡ଼ା, ଗୁଡାରୀସ୍ଥିତ ସଙ୍ଗରୋଧ କେନ୍ଦ୍ରକୁ ପଠାଇ ଦିଆଯାଇଥିବା ସୂଚନା ମିଳିଛି।
