ଲଖନପୁର,୨୧ା୫(ଡି.ଏନ୍.ଏ.): ଗୁଜରାଟରୁ ପ୍ରବାସୀ ଓଡ଼ିଆଙ୍କୁ ଧରି ଏକ ବସ୍ ଆସିକା ଅଭିମୁଖେ ଆସୁଥିବାବେଳେ ଝାରସୁଗୁଡ଼ା ଜିଲା ଲଖନପୁର ୪୯ ନମ୍ବର ଜାତୀୟ ରାଜପଥରେ ବସ୍ ଭିତରେ ଜଣେ ପ୍ରବାସୀ ଓଡ଼ିଆଙ୍କ ମୃତ୍ୟୁ ଘଟିଛି। ମୃତ ପ୍ରବାସୀ ଓଡ଼ିଆ ଜଣକ ଆସିକା ଅଞ୍ଚଳର ଭାସ୍କର ନାହାକ(୬୦) ବୋଲି ଜଣାପଡ଼ିଛି। ଏ ସମ୍ପର୍କରେ ଖବରପାଇ ଝାରସୁଗୁଡ଼ା ଜିଲା ପ୍ରଶାସନ ଓ ପୋଲିସ ପ୍ରଶାସନ ବୁଧବାର ସନ୍ଧ୍ୟାରେ ବସ୍କୁ ଝାରସୁଗୁଡ଼ାରେ ଅଟକାଇ ବସ୍ ଭିତରୁ ମୃତଦେହ ଜବତ କରିଥିଲା। ଜବତ ମୃତଦେହକୁ ତାଙ୍କ ସମ୍ପର୍କୀୟଙ୍କ ଉପସ୍ଥିତିରେ ଜିଲା ପ୍ରଶାସନ ଝାରସୁଗୁଡ଼ାରେ ହିଁ ସଂସ୍କାର କରିଦେଇଛି। ମୃତ ବ୍ୟକ୍ତିଙ୍କ ସମ୍ପର୍କୀୟମାନେ ଝାରସୁଗୁଡ଼ାରେ ଓହ୍ଲାଇ ପଡ଼ିଥିବାବେଳେ ବସ୍ ରାତିରେ ଅନ୍ୟ ପ୍ରବାସୀ ଓଡ଼ିଆମାନଙ୍କୁ ନେଇ ଆସିକା ଅଭିମୁଖେ ବାହାରି ଯାଇଛି ବୋଲି ଏସ୍ପି ରାହୁଲ ପିଆର୍ କହିଛନ୍ତି ା
ସୂଚନାଯୋଗ୍ୟ, ପ୍ରବାସୀ ଓଡ଼ିଆମାନଙ୍କୁ ଧରି ଏକ ବସ୍ ଓଡ଼ିଶା ଅଭିମୁଖେ ବାହାରିଥିଲା ା ଲଖନପୁର ରାସ୍ତାରେ ପ୍ରବାସୀ ଶ୍ରମିକ ଭାସ୍କରଙ୍କ ଦେହ ଅସୁସ୍ଥ ହୋଇଥିଲା। ଫଳରେ ବସ୍ ଭିତରେ ତାଙ୍କର ମୃତ୍ୟୁ ଘଟିଥିଲା। ଏ ସମ୍ପର୍କରେ ବସ୍ରେ ଥିବା ସହଯୋଗୀ ପ୍ରବାସୀ ଓଡ଼ିଆମାନେ ଆସିକା ଅଞ୍ଚଳର ସ୍ଥାନୀୟ ସରପଞ୍ଚଙ୍କୁ ଜଣାଇବା ପରେ ସରପଞ୍ଚ ଆସିକା ବିଡିଓଙ୍କୁ ଜଣାଇଥିଲେ। ବିଡିଓ ପରେ ଗଞ୍ଜାମ ଜିଲାପାଳଙ୍କୁ ଜଣାଇବାରୁ ଜିଲାପାଳ ଘଟଣା ସମ୍ପର୍କରେ ଝାରସୁଗୁଡ଼ା ଜିଲାପାଳଙ୍କୁ ଜଣାଇଥିଲେ। ଏସମ୍ପର୍କରେ ଖବର ପାଇବା ପରେ ଝାରସୁଗୁଡ଼ା ଜିଲାପାଳ ସରୋଜ କୁମାର ସାମଲ ଝାରସୁଗୁଡ଼ାରେ ବସ୍କୁ ଅଟକାଇଥିଲେ।
