ନୂଆଦିଲ୍ଲୀ,୧।୨: ଶନିବାର ଅର୍ଥମନ୍ତ୍ରୀ ନିର୍ମଳା ସୀତାରମଣ କେନ୍ଦ୍ରୀୟ ବଜେଟ ଉପସ୍ଥାପନ କରିଛନ୍ତି। ବଜେଟରେ ଗାଁ-ଗରିବ ଚାଷୀ-ରୋଜଗାରକୁ ଗୁରୁତ୍ୱ ଦିଆଯାଇଛି। ୨୦୩୦ ସୁଦ୍ଧାରେ ଦେଶରେ ଯୁବବର୍ଗଙ୍କ ସଂଖ୍ୟା ଅନ୍ୟ ବର୍ଗଙ୍କ ତୁଳନାରେ ଅଧିକ ରହିବ। ସେମାନଙ୍କୁ ଆବଶ୍ୟକ ନିଯୁକ୍ତି ଯୋଗାଇବା ପାଇଁ ସରକାର ପ୍ରତିଶ୍ରୁତିବଦ୍ଧ ରହିଛନ୍ତି। ସାଗର ମିତ୍ର ଯୋଜନା ଦ୍ୱାରା ଯୁବବର୍ଗଙ୍କ ବିକାଶ ଲାଗି ଉଦ୍ୟମ କରାଯିବ। ସେହିପରି ସବ୍ କା ସାଥ୍ ସବ୍ କା ବିକାଶ ଅନ୍ତର୍ଗତ ପଛୁଆ ବର୍ଗଙ୍କ ପାଇଁ ସ୍ବତନ୍ତ୍ର ଯୋଜନା ଲାଗୁ ହେବ ବୋଲି ଅର୍ଥମନ୍ତ୍ରୀ କହିଛନ୍ତିି। ସେହିପରି ସ୍ବାସ୍ଥ୍ୟ ସେବାର ବିକାଶ ଲାଗି ଆୟୁଷ୍ମାନ ଯୋଜନାରେ ୨୦ ହଜାର ହସ୍ପିଟାଲକୁ ସଂଯୋଗ କରାଯିବ। ୨୦୨୫ ସୁଦ୍ଧା ଦେଶରୁ ଟିବି ରୋଗର ଅନ୍ତ ଘଟାଇବା ପାଇଁ ଯୋଜନା କରାଯାଇଛି। ଚାଷୀଙ୍କ ପାଇଁ ୧୬ ସୂତ୍ରୀ ଯୋଜନା ଲାଗୁ କରିବାକୁ ସୀତାରମଣ ସୂଚନା ଦେଇଛନ୍ତି। ଚାଷୀଙ୍କ ପାଇଁ ସ୍ବତନ୍ତ୍ର ଟ୍ରେନ୍ ଚଳାଚଳ କରିବ ବୋଲି ଅର୍ଥମନ୍ତ୍ରୀ ସୂଚନା ଦେଇଛନ୍ତି। କ୍ଷୀର, ମାଛ, ମାଂସ ସଂରକ୍ଷଣ ପାଇଁ ନୂଆ ଯୋଜନା କରାଯିବ। ଏହା ଦ୍ୱାରା ଏହି କ୍ଷେତ୍ର ସହିତ ଜଡ଼ିତ ଥିବା ଚାଷୀ ଉପକୃତ ହୋଇପାରିବେ। ସେହିପରି ୨୦୨୫ ସୁଦ୍ଧା ଦୁଗ୍ଧ ଉତ୍ପାଦନ ୨ଗୁଣା କରାଯିବାର ଲକ୍ଷ୍ୟ ଧାର୍ଯ୍ୟ ହୋଇଛି। ଏହାକୁ ୧୦୮ ନିୟୁତ ଟନ୍ରେ ପହଞ୍ଚାଇବା ଲାଗି ସରକାର ଯୋଜନା କରିଛନ୍ତି। ଏହା ସହିତ ଚାଷୀଙ୍କ ପାଇଁ ଭଣ୍ଡାର ଯୋଜନା ଲାଗୁ କରାଯିବା ନେଇ ଅର୍ଥନ୍ତ୍ରୀ ସୂଚନା ଦେଇଛନ୍ତି।
