ଭୁବନେଶ୍ୱର, ୨୮।୫(ବ୍ୟୁରୋ): କରୋନା ସଂକ୍ରମଣ ରୋକିବା ନିମନ୍ତେ ସାରା ରାଜ୍ୟରେ ଲକ୍ଡାଉନ୍ ଜାରି କରାଯାଇଥିବା ବେଳେ ଚାଷୀଙ୍କଠାରୁ ରବିଧାନ ସଂଗ୍ରହ ପ୍ରକ୍ରିୟାକୁ ତ୍ବରାନ୍ବିତ କରାଯାଇଛି। ଗତବର୍ଷ ଅପେକ୍ଷା ଏଥର ୪୭ ପ୍ରତିଶତ ଅଧିକ ଧାନ ସଂଗ୍ରହ ହୋଇପାରିଛି ବୋଲି ଖାଦ୍ୟ ଯୋଗାଣ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ବାଇଁ କହିଛନ୍ତି। ମନ୍ତ୍ରୀ ସ୍ବାଇଁ କହିଛନ୍ତି, ଏବେସୁଦ୍ଧା ରାଜ୍ୟର ୧୭ ଜିଲାରେ ୫୨,୦୨୧ ଚାଷୀଙ୍କଠାରୁ ସମୁଦାୟ ୪ଲକ୍ଷ ୩୦ହଜାର ୩୦୦ ଟନ ଧାନ ସଂଗ୍ରହ ହୋଇଛି। ଗତବର୍ଷ ଏହି ତାରିଖରେ ୨ଲକ୍ଷ ୯୩ ହଜାର ୪୮୯ ଟନ ଧାନ ସଂଗ୍ରହ ହୋଇଥିଲା। ୬୨୭ ଧାନ ସଂଗ୍ରହ କେନ୍ଦ୍ରରେ ଧାନ କିଣିବା କାର୍ଯ୍ୟ ଆରମ୍ଭ ହୋଇଛି। ପି-ପାସ୍ ଏବଂ ଆଗୁଆ ଟୋକନ୍ ଜରିଆରେ ପଞ୍ଜୀକୃତ ଚାଷୀଙ୍କଠାରୁ ଧାନ ସଂଗ୍ରହ କରାଯାଇଛି। ରବିଧାନ ବିକ୍ରି ନିମନ୍ତେ ମୋଟ ୨ଲକ୍ଷ ୫୮ହଜାର ୧୧୭ ଚାଷୀ ନାମ ପଞ୍ଜୀକରଣ କରିଥିଲେ। ବର୍ତ୍ତମାନ ପର୍ଯ୍ୟନ୍ତ ୨ଲକ୍ଷ ୨୭ ହଜାର ୧୨୨ ଜଣ ଚାଷୀଙ୍କ ନାମ ପଞ୍ଜୀକରଣ ତଥ୍ୟକୁ ଯାଞ୍ଚ କରାଯାଇଛି। ଗତବର୍ଷ ତୁଳନାରେ ଚଳିତ ରବିଧାନ ସଂଗ୍ରହ ନିମନ୍ତେ ୨୦ ପ୍ରତିଶତ ଅଧିକ ଚାଷୀ ସେମାନଙ୍କ ନାମ ପଞ୍ଜୀକରଣ କରିଛନ୍ତି। ଅଧିକ ଧାନ ସଂଗ୍ରହ ହୋଇଥିବା ଜିଲାଗୁଡ଼ିକ ମଧ୍ୟରେ ବରଗଡ଼ରେ ୨ଲକ୍ଷ ୨୮ ହଜାର ୩୦୨ ଟନ୍ ଧାନ ସଂଗ୍ରହ ହୋଇଥିବା ବେଳେ ସୁବର୍ଣ୍ଣପୁର ଜିଲାରୁ ୫୪ ହଜାର ୯୧୬ ଟନ୍, ସମ୍ବଲପୁରରୁ ୫୦ହଜାର ୮୩୯ଟନ୍, କଳାହାଣ୍ଡିରେ ୩୧ହଜାର ୯୩୩ ଟନ୍, ନୂଆପଡ଼ାରେ ୧୬ହଜାର ୨୪୮ଟନ୍ ଏବଂ ପୁରୀ ଜିଲାରୁ ୧୧ହଜାର ୯୮୯ଟନ୍ ଧାନ ସଂଗ୍ରହ କରାଯାଇଛି।
