ବାରିପଦା ଅଫିସ, ୨୩ା୪- ଦ୍ୱିତୀୟ ପର୍ଯ୍ୟାୟ ଲକ୍ ଡାଉନ ଆରମ୍ଭ ହେବା ପରେ ଗତ ୨୦ ତାରିଖଠାରୁ ଏହାକୁ କିଛି ମାତ୍ରାରେ କୋହଳ କରାଯାଇଛି। ଯାହାର ଫାଇଦା ଉଠାଇ ଲୋକେ ସହରରେ ବିନା କାରଣରେ ଯାତାୟତ କରୁଛନ୍ତି। ଏଭଳି ସ୍ଥଳେ ବାରିପଦା ସହରରେ ଚେକିଂ ପାଇଁ ହୋଇଥିବା ବିଭିନ୍ନ ପୋଲିସ କ୍ୟାମ୍ପରେ ଯାଞ୍ଚ କରାଯିବା ବଦଳରେ ଏହା ଖାଲି ପଡୁଥିବା ଦେଖିବାକୁ ମିଳିଛି। ଲୋକେ କିପରି ସୁରକ୍ଷିତ ରହିବେ ସେଥି ପ୍ରତି ଦୃଷ୍ଟି ନ ଦେଇ ପୋଲିସ କୋହଳ ମନୋଭାବ ଆପଣାଇଥିବା ଦେଖିବାକୁ ମିଳିଛି। ଗୁରୁବାର ଅପରାହ୍ନରେ ସହରର ବିଭିନ୍ନ ଛକରେ ଥିବା ପୋଲିସ କ୍ୟାମ୍ପ ଖାଲି ପଡ଼ିଥିବା ଦେଖିବାକୁ ମିଳିଥିଲା। ଷ୍ଟିଲ ଗୋଲେଇଠାରେ ହୋଇଥିବା ପୋଲିସ କ୍ୟାମ୍ପରେ କାହାର ଦେଖା ମିଳି ନ ଥିଲା। ଅନ୍ୟପଟେ ବାଇକ୍ରେ ଜଣଙ୍କରୁ ଅଧିକ ଲୋକ ନ ବସିବା ପାଇଁ ନିୟମ ଜାରି ହୋଇଥିବା ବେଳେ ସହରରେ ଯାତାୟତ କରୁଥିବା ବାଇକ୍ରେ ଦୁଇରୁ ଅଧିକ ଜଣ ବସି ଯାଉଥିବା ଦେଖିବାକୁ ମିଳୁଛି। ପଡ଼ୋଶୀ ଜିଲା ବାଲେଶ୍ୱର, ଭଦ୍ରକ ଓ ଯାଜପୁରରେ କରୋନା କାୟା ବିସ୍ତାର କରିଥିବାରୁ ମୟୂରଭଞ୍ଜ ଜିଲାବାସୀ ଏହାକୁ ନେଇ ଆଶଙ୍କାରେ ରହିଛନ୍ତି। ଜିଲାର ମୋରଡ଼ା, ରାସଗୋବିନ୍ଦପୁର, ଶୁଳିଆପଦା, କୁଳିଅଣା ଓ ଝାରପୋଖରିଆ ବ୍ଲକ ପଶ୍ଚିମବଙ୍ଗ ସୀମାକୁ ଲାଗିଛି। ଦୁଇ ଦିନ ତଳେ ପୋଲିସ ମହାନିର୍ଦ୍ଦେଶକ ଅଭୟ ଚକାଶୁଳିଆପଦା ଗେଟ୍ଠାରେ ସ୍ଥିତି ସମୀକ୍ଷା କରିଥିଲେ। ଏହା ପରେ ଜିଲାର ସମସ୍ତ ସୀମାରେ ୪ ପ୍ଲାଟୁନ ପୋଲିସ ଫୋର୍ସ ପୂର୍ବରୁ ମୁତୟନ ହୋଇଥିବା ବେଳେ ଆଉ ୨ ପ୍ଲାଟୁନ ପୋଲିସ ଫୋର୍ସଙ୍କୁ ସୀମାରେ ନିୟୋଜିତ କରାଯାଇଛି। ତେବେ ସୀମା ସୁରକ୍ଷାକୁ ପୋଲିସ ଗୁରୁତ୍ୱ ଦେଉଥିବା ବେଳେ ସହରରେ ସୁରକ୍ଷା ବ୍ୟବସ୍ଥାକୁ ଭୁଲି ଯାଇଥିବା ଦେଖିବାକୁ ମିଳିଛି। ଜିଲାର ବିଭିନ୍ନ ଗ୍ରାମରେ ଅଧିକ ଗଳାବାଟ ରହୁଥିବାରୁ ଉକ୍ତ ରାସ୍ତା ଦେଇ ପଶ୍ଚିମବଙ୍ଗରୁ ଶ୍ରମିକମାନେ ଆସୁଥିବା ଅଭିଯୋଗ ହେଉଛି। ପ୍ରଶାସନ ଏହି ଦିଗ ପ୍ରତି ଗୁରୁତ୍ୱ ଦେବା ପାଇଁ ସାଧାରଣରେ ଦାବି ହେଉଛି। ଉଲ୍ଲେଖଯୋଗ୍ୟ ଯେ, କରୋନା ସନ୍ଦେହରେ ମୟୂରଭଞ୍ଜ ଜିଲାରୁ ୭୨୬ ଜଣ ସନ୍ଦିଗ୍ଧଙ୍କ ସ୍ବାବ ପରୀକ୍ଷା ପାଇଁ ପଠାଯାଇଥିବା ବେଳେ ସେମାନଙ୍କ ମଧ୍ୟରୁ ୪୭୨ ଜଣଙ୍କ ରିପୋର୍ଟ ନେଗେଟିଭ୍ ଆସିଛି। ଅବଶିଷ୍ଟ୨୫୪ ଜଣଙ୍କ ରିପୋର୍ଟ ଅପେକ୍ଷାରେ ଥିବା ଜିଲା ପ୍ରଶାସନ ପକ୍ଷରୁ ସୂଚନା ଦିଆଯାଇଛି।
