ହରିୟାଣା,୧୪।୧୧: ହରିୟାଣାରେ ଭାଜପା-ଜେଜେପି ମେଣ୍ଟ ସରକାର ଗଠନର ୧୭ ଦିନ ପରେ ଅର୍ଥାତ୍ ଗୁରୁବାର ମନୋହର ଲାଲ ଖଟ୍ଟରଙ୍କ ମନ୍ତ୍ରିମଣ୍ଡଳର ସମ୍ପ୍ରସାରଣ ହେବ। ଗତ ଅକ୍ଟୋବର ୨୪ରେ ହରିୟାଣା ବିଧାନସଭା ନିର୍ବାଚନର ଫଳାଫଳ ଆସିଥିବା ବେଳେ ୨୭ ଅକ୍ଟୋବରରେ ଜନନାୟକ ଜନତା ପାର୍ଟି(ଜେଜେପି) ସହ ମିଶି ଭାରତୀୟ ଜନତା ପାର୍ଟି(ଭାଜପା) ସରକାର ଗଠନ କରିଥିଲା। ଏଥିରେ ମନୋହର ଲାଲ ଖଟ୍ଟର ମୁଖ୍ୟମନ୍ତ୍ରୀ ଭାବେ ଶପଥ ଗ୍ରହଣ କରିଥିବା ବେଳେ ଜେଜେପିର ଦୁଷ୍ୟନ୍ତ ଚୌତାଲା ଉପ ମୁଖ୍ୟମନ୍ତ୍ରୀ ଭାବେ ଶପଥ ଗ୍ରହଣ କରିଥିଲେ। ସେବେଠାରୁ ଅନ୍ୟ କୌଣସି ମନ୍ତ୍ରୀ ଶପଶ ନେଇ ନ ଥିବା ବେଳେ ଏବେ ମନ୍ତ୍ରିମଣ୍ଡଳ ସମ୍ପ୍ରସାରଣ କରାଯିବାର ଯୋଜନା ରହିଛି। ଏଥିରେ ଅନିଲ ବିଜ୍, କନଓ୍ବର ପଲ, ମୁଲଚନ୍ଦ ଶର୍ମା, ରଣଜିତ ସିଂ, ଜୟପ୍ରକାଶ ଦଲାଲ ଓ ବନଓ୍ବାରୀ ଲାଲଙ୍କୁ ମନ୍ତ୍ରୀ ପଦ ମିଳିବ ବୋଲି ବିଶେଷ ସୂତ୍ରରୁ ଜଣାପଡିଛି। ସେହିପରି ରାଜ୍ୟମନ୍ତ୍ରୀ(ସ୍ବାଧିନ) ଭାବେ ଓମ ପ୍ରକାଶ ଯାଦବ, କମଲେଶ ଧଣ୍ଡା, ଅନୁପ ଧନକ ଓ ସନ୍ଦିପ ସିଂଙ୍କୁ ଖଟ୍ଟରଙ୍କ କ୍ୟାବିନେଟରେ ସାମିଲ କରାଯିବ ବୋଲି ଆଲୋଚନା ହେଉଛି।
