ଲଣ୍ଡନ,୧୧।୪(ଏଏଫ୍ପି)- ସ୍କଟଲାଣ୍ଡ ଷ୍ଟ୍ରାଇକର ତଥା ଲିଭରପୁଲ କିମ୍ବଦନ୍ତୀ ଫୁଟବଲର କେନ୍ନି ଡାଲଗ୍ଲିଶ୍ କରୋନ ଭାଇରସ ସଂକ୍ରମଣ କାରଣରୁ ପଜିଟିଭ ବୋଲି ଜଣାପଡିଛି। ତାଙ୍କ ପରିବାର ସୂତ୍ରର ଏ ନେଇ ସୂଚନା ଦିଆଯାଇଛି। ୬୯ ବର୍ଷୀୟ ଏହି ପୂର୍ବତନ ଫୁଟବଲର ତଥା ଅନ୍ତର୍ଜାଜୀତୟ ଷ୍ଟ୍ରାଇକର ସେଲ୍ଟିକ କ୍ଲବ ତରଫରୁ ଖେଳି କ୍ୟାରିୟର ଆରମ୍ଭ କରିଥିଲେ। ବୁଧବାର ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିଲା। ତାଙ୍କର କୌଣସି ଲକ୍ଷଣ ଦେଖାଯାଇ ନ ଥିଲା ଓ ସେ ମଧ୍ୟ ଆଦୌ ଅସୁସ୍ଥ ନ ଥିଲେ। ତେବେ ଏହା ସତ୍ତ୍ୱେ ସେ କରୋନ ପଜିଟିଭ ଥିବା ଜଣାପଡିଥିଲା। ହସ୍ପିଟାଲରେ ଭର୍ତ୍ତି ହେବା ପୂର୍ବରୁ ସେ ସେଲ୍ଫ ଆସୋଲେଶନ ନିଜକୁ ରଖି ସାମାଜିକ ଦୂରତ୍ୱ ରକ୍ଷା କରିଥିଲେ। ଡଲଗ୍ଲିଶ୍ ୧୯୭୭ରେ ଲିଭରପୁଲ କ୍ଲବ୍ରେ ଯୋଗ ଦେଇଥିଲେ। ତେବେ ଏହାପୂର୍ବରୁ ସେ ସେଲଟିକ ତରଫରୁ ଖେଳି ୪ଥର ସ୍କଟିଶ ଲିଗ୍ ଟାଇଟଲ ଜିତିଥିଲେ। ନିଜର ସ୍ବର୍ଣ୍ଣିମ ୧୩ ବର୍ଷର କ୍ୟାରିୟରରେ ସେ ୮ଟି ଇଂଲିଶ ଲିଗ୍ ଟାଇଟଲ, ୩ ଫା କପ୍ ଓ ୩ ୟୁରୋପିଆନ୍ କପ୍ ଟାଇଟଲ ହାସଲ କରିଥିଲେ। ଲିଭରପୁଲ ତରଫରୁ ସେ ୫୧୫ଟି ମ୍ୟାଚ୍ ଖେଳି ୧୭୨ଟି ଗୋଲ ସ୍କୋର କରିଥିଲେ।
କୋଚ୍ ହିସାବରେ ତାଙ୍କ ତତ୍ତ୍ୱାବଧାନରେ ବ୍ଲାକ୍ବର୍ନ ରୋଭର୍ସ ୧୯୯୫ରେ ପ୍ରିମିୟର ଲିଗ୍ ଟାଇଟଲ ହାସଲ କରିଥିଲା। ଡଲ୍ଗ୍ଲିସ୍ ମଧ୍ୟ ସ୍କଟଲାଣ୍ଡ ତରଫରୁ ୧୦୦ରୁ ଅଧିକ ଅନ୍ତର୍ଜାତୀୟ ମ୍ୟାଚ୍ ଖେଳିଛନ୍ତି। ୨୦୧୮ରେ ତାଙ୍କୁ ମହାରାଣୀ ଏଲିଜାବେଥ-୨ ନାଇଟ୍ ଉପାଧିରେ ଭୁଷିତ କରିଥିଲେ। କରୋନା ଭାଇରସ୍ରୁ ମୁକ୍ତ ହୋଇ ସେ ଖୁବ୍ଶୀଘ୍ର ଘରକୁ ଫେରିବେ ବୋଲି ଆଶା କରାଯାଉଛି। ଏହି ଭାଇରସ୍ରେ ସଂକ୍ରମିତ ହୋଇ ବ୍ରିଟେନରେ ୯,୦୦୦ ଲୋକ ପ୍ରାଣ ହରାଇଲେଣି।
