ଗୋପ,୩ା୧୨(ଡି.ଏନ.ଏ.): ଗୋପ ଅଞ୍ଚଳରେ ଘରୋଇ ଶିକ୍ଷାନୁଷ୍ଠାନଗୁଡ଼ିକ ପ୍ରାୟ ସମୟରେ ନାନା ଘଟଣା ଯୋଗୁ ପ୍ରଶାସନ ପକ୍ଷରୁ ତାଗିଦ ହେଉଥିବା କଥା ନଜରକୁ ଆସିଛି। ଏବେ ପୁଣି ଏକ ଏଭଳି ଘଟଣା ଘରୋଇ ଶିକ୍ଷାନୁଷ୍ଠାନର ବେନାମ କାରନାମା ପଦାରେ ପଡ଼ିଛି। କୋଣାର୍କର ଏକ ଘରୋଇ ଶିକ୍ଷାନୁଷ୍ଠାନରେ ଅଷ୍ଟମ ଓ ନବମ ଶ୍ରେଣୀ ଉପସ୍ଥାନରେ ଛାତ୍ରୀଛାତ୍ରଙ୍କ ନାମ ରହିଥିବାବେଳେ ଏହି ଛାତ୍ରୀଛାତ୍ର ଗୋପର ସ୍ବୀକୃତି ନ ଥିବା ଏକ ଘରୋଇ ଶିକ୍ଷାନୁଷ୍ଠାନରେ ମଧ୍ୟ ପାଠ ପଢ଼ିବା ଘଟଣା ସମସ୍ତଙ୍କୁ ଚକିତ କରିଛି। ଏହି ଘଟଣା ପଦାକୁ ଆସିବା ପରେ ଚାରିଜଣ ଛାତ୍ର ବେସରକାରୀ ସ୍କୁଲ ଛାଡ଼ି ସରକାରୀ ସ୍କୁଲକୁ ଯାଇଥିବା ଜଣାପଡ଼ିଛି। ଯାହାକି ଶିକ୍ଷା ଅଧିକାର ଆଇନ୍ର ଉଲ୍ଲଂଘନ କରୁଥିଲେ ମଧ୍ୟ ଗୋପ ବ୍ଲକ୍ ଶିକ୍ଷାଧିକାରୀ ଓ ଜିଲା ଶିକ୍ଷାଧିକାରୀଙ୍କ ନୀରବତାକୁ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି।
ସୂଚନାଯୋଗ୍ୟ, କୋଣାର୍କର ଏକ ଘରୋଇ ଶିକ୍ଷାନୁଷ୍ଠାନରେ ଗୋପ ଅଞ୍ଚଳର ୨୭ରୁ ଊର୍ଦ୍ଧ୍ୱ ଛାତ୍ରୀଛାତ୍ରଙ୍କ ନାମ ଉପସ୍ଥାନରେ ରହିଛି। କିନ୍ତୁ ଏମାନଙ୍କ ମଧ୍ୟରୁ ୪ଜଣ ଛାତ୍ରଙ୍କ ନାମ ଗୋପର ଏକ ଘରୋଇ ଶିକ୍ଷାନୁଷ୍ଠାନରେ ମଧ୍ୟ ବେଆଇନ ଭାବେ ପାଠପଢ଼ିବା ସହ ହଷ୍ଟେଲରେ ରହୁଛନ୍ତି। ଏହି ଘଟଣା ସମ୍ପର୍କରେ ଅଭିଯୋଗ ମିଳିବା ପରେ କେତେକ ଗଣମାଧ୍ୟମ ପ୍ରତିନିଧି ବେରସକାରୀ ସ୍କୁଲରେ ପହଞ୍ଚି ଘଟଣାର ସତ୍ୟତା ଜଣାଇଥିଲେ। ଫଳରେ ଉକ୍ତ ଛାତ୍ରର ଅଭିଭାବକମାନେ ନିଜ ପିଲାଙ୍କ ଭବିଷ୍ୟତକୁ ଦୃଷ୍ଟିରେ ରଖି ସରକାରୀ ସ୍କୁଲରେ ନାମ ଲେଖାଇଥିଲେ। ଏ ନେଇ ଗୋପ ବ୍ଲକ୍ ଶିକ୍ଷାଧିକାରୀ ବସନ୍ତ କୁମାର ମିଶ୍ର କୁହନ୍ତି, ମୋ ନିକଟରେ ଅଭିଯୋଗ ହେବା ପରେ ଏ ସମ୍ପର୍କରେ ମୁଁ ଜିଲା ଶିକ୍ଷାଧିକାରୀଙ୍କୁ ଅବଗତ କରିଛି। ନିଶ୍ଚିତ ଏହି ଘରୋଇ ଶିକ୍ଷାନୁଷ୍ଠାନ ଉପରେ କାର୍ଯ୍ୟାନୁଷ୍ଠାନ ନିଆଯିବ।
