ଭୁବନେଶ୍ୱର,୮।୫(ବ୍ୟୁରୋ): ବର୍ତ୍ତମାନ ସୁଦ୍ଧା ଓଡ଼ିଶା ଭଲ ପରିସ୍ଥିତିରେ ରହିଛି। ଏହାର ଶ୍ରେୟ ଜନସାଧାରଣଙ୍କର। ରାଜ୍ୟକୁ ଫେରୁଥିବା ବ୍ୟକ୍ତିମାନେ ଏହାକୁ ଦୃଷ୍ଟିରେ ରଖି ନିଜକୁ ଶୃଙ୍ଖଳିତ ରଖିବା ଆବଶ୍ୟକ। ସେମାନେ ୨୮ ଦିନ ସଂଗରୋଧକୁ ସମ୍ପୂର୍ଣ୍ଣ ପାଳନ କରିବା ଉଚିତ୍। ଯଦି କେହି ଏଥିପାଇଁ ପ୍ରସ୍ତୁତ ନୁହନ୍ତି ତେବେ ସେ ଓଡ଼ିଶା ଫେରିବାର ଆବଶ୍ୟକତା ନାହିଁ। ସଂଗରୋଧରେ ରହୁଥିବା ବ୍ୟକ୍ତିଙ୍କର ଯେକୌଣସି କ୍ୱାରାଣ୍ଟାଇନ୍ ସେଣ୍ଟରରେ ସୁପରିଚାଳନାରେ ସମାନଭାବେ ଭାଗ ନେବାକୁ ପଡ଼ିବ। ଏହାକୁ ଏନ୍ଏସ୍ଏସ୍ କ୍ୟାମ୍ପ ବୋଲି ଭାବିବାକୁ ପଡ଼ିବ। ନିଜକୁ ଜଣେ ଯତ୍ନବାନ ନାଗରିକ ଭାବେ ନିଜର, ପରିବାରର ତଥା ସମାଜର ମଙ୍ଗଳକୁ ଦୃଷ୍ଟିରେ ରଖି ସମସ୍ତ କଟକଣା ମାନିବାକୁ ପଡ଼ିବ। ତେବେ ଆଗକୁ ପଜିଟିଭ୍ ଚିହ୍ନଟର ସଂଖ୍ୟା ବଢ଼ିବ। ଏଥିରେ ବିଚଳିତ ନ ହୋଇ ଅଧିକ ପଜିଟିଭ୍ ବ୍ୟକ୍ତିଙ୍କୁ ଶୀଘ୍ର ଚିହ୍ନଟ କରିବାକୁ ପଡ଼ିବ। ଏହାଦ୍ୱାରା ସଂକ୍ରମଣ କମାଯାଇପାରିବ ବୋଲି ସେ କହିଛନ୍ତି।
