ନୂଆଦିଲ୍ଲୀ,୧୨।୮: ଭାରତ ଆଜି ମହାକାଶ ଗବେଷଣା କ୍ଷେତ୍ରରେ ବହୁ ଆଗକୁ ଚାଲି ଯାଇଛି। ନିକଟରେ ଚନ୍ଦ୍ରୟାନ-୨ ପରୀକ୍ଷଣ କରି ଭାରତ ନିଜପାଇଁ ସୃଷ୍ଟି କରିଛି ଏକ ଭିନ୍ନ ପରିଚୟ। ହେଲେ ଏହାର ଜନକ ଡା.ବିକ୍ରମ ସାରାଭାଇଙ୍କ ବିଷୟରେ ହୁଏତ ସମସ୍ତଙ୍କୁ ଜଣା ନ ଥିବ। ସାରାଭାଇଙ୍କୁ ଇସ୍ରୋ ବା ଭାରତ ମହାକାଶ ଗବେଷଣାର ଜନକ ବୋଲି କୁହାଯାଏ। ସେ ହିଁ ଭାରତରତ୍ନ ତଥା ପୂର୍ବତନ ରାଷ୍ଟ୍ରପତି ଅବଦୁଲ କଲାମଙ୍କୁ ମିଶାଇଲ ମ୍ୟାନ ଭାବେ ଗଢି ତୋଳିଥିଲେ। ସୋମବାର ସାରାଭାଇଙ୍କ ୧୦୦ତମ ଜୟନ୍ତୀ। କେମ୍ବ୍ରିଜ ବିଶ୍ୱବିଦ୍ୟାଳୟରେ ଅଧ୍ୟୟନ କରିବା ପରେ ସାରାଭାଇ ଅହମ୍ମଦାବାଦରେ ଫିଜିକାଲ ରିସର୍ଚ୍ଚ ଲାବୋରୋଟୋରୀ ପ୍ରତିଷ୍ଠା କରିଥିଲେ। ୧୨ ଅଗଷ୍ଟ ୧୯୧୯ରେ ଗୁଜରାଟର ଅହମ୍ମଦାବଦରେ ଜନ୍ମ ନେଇଥିବା ସାରାଭାଇ ମାତାପିତାଙ୍କ ପ୍ରେରଣାରେ ହିଁ ଉଚ୍ଚଶିକ୍ଷା ଲାଭ କରିଥିଲେ। ସାରାଭାଇ ପ୍ରଥମେ କଲାମଙ୍କ ସାକ୍ଷାତ୍କାର ନେବା ସହ ତାଙ୍କ ଭିତରେ ଥିବା ଗୁଣକୁ ଚିହ୍ନି ପାରିଥିଲେ ବୋଲି କୁହନ୍ତି ମିଶାଇଲ ମ୍ୟାନ। ତେଣୁ ସାରାଭାଇଙ୍କ ସହଯୋଗରେ ହିଁ ସେ ପାଲଟିଗଲେ ଭାରତର ମିଶାଇଲ ମ୍ୟାନ୍।
