ବେଙ୍ଗାଲୁରୁ,୨୭।୪: ଭାରତର ଦକ୍ଷିଣରେ ଥିବା ରାଜ୍ୟ ଗୁଡିକରେ ପ୍ରାୟ ୭ଟି ସ୍ଥାନରେ ଆତଙ୍କବାଦୀ ଆକ୍ରମଣ ଯୋଜନା କରୁଥିବା ଏକ ଫୋନ୍ କଲ୍ ପାଇବା ପରେ ସବୁଠି କଡା ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଥିଲା। ଏହାର ଯାଞ୍ଚ କରିବା ସମୟରେ ବେଙ୍ଗାଲୁରୁ (ରୁରାଲ) ପୋଲିସ ଆଶ୍ଚର୍ଯ୍ୟ ହୋଇ ଯାଇଥିଲା। କାରଣ ଏହା ଥିଲା ଏକ ମିଥ୍ୟା ଫୋନ୍ କଲ୍। ସୁନ୍ଦର ମୁର୍ତ୍ତି ନାମକ ଜଣେ ଅବସରପ୍ରାପ୍ତ ସେନା କର୍ମଚାରୀଙ୍କୁ ଏହି ମିଥ୍ୟା କଲ୍ ଅଭିଯୋଗରେ ପୋଲିସ ଗିରଫ କରିଥିବା ସୂଚନା ମିଳିଛି। ବେଙ୍ଗାଲୁରୁ (ରୁରାଲ) ଏସ୍ପି ରାମ ନିବାସ ସେପାତ ସୂଚନା ଦେଇ କହିଛନ୍ତି ମୁର୍ତ୍ତି ଭାରତୀୟ ସେନାରେ ଜଣେ ଡ୍ରାଇଭର ଭାବେ କାର୍ଯ୍ୟ କରୁଥିଲେ। ସେ ୧୯୯୫ରେ ଅବସର ଗ୍ରହଣ କରିଛନ୍ତି। ତେବେ ଶ୍ରୀଲଙ୍କା ବିସ୍ଫୋରଣ ପରେ ସୁରକ୍ଷା ଦୃଷ୍ଟିରୁ ପୋଲିସ ପକ୍ଷରୁ ୭ଟି ରାଜ୍ୟ ଓ ଗୋଟିଏ କେନ୍ଦ୍ର ଶାସିତ ଅଞ୍ଚଳରେ ହାଇ ଆଲର୍ଟ ଜାରି କରାଯିବାର ଗୋଟିଏ ଦିନ ପରେ ମୁର୍ତ୍ତି ଫୋନ୍ କରି ଏକ ମିଥ୍ୟା ସୂଚନା ଦେଇଥିଲେ।
