ଚେନ୍ନାଇ,୨୧।୪: ସାରା ବିଶ୍ୱ ଏବେ ଲଢୁଛି ଅଦୃଶ୍ୟ ଯୁଦ୍ଧରେ। ଆଉ ଏହାର ଯୋଦ୍ଧା ସାଜିଛନ୍ତି ଦ୍ୱିତୀୟ ଈଶ୍ୱର କୁହାଯାଉଥିବା ଡାକ୍ତର। ହେଲେ ଯେତେବେଳେ ଏହି ଯୋଦ୍ଧାଙ୍କ କରୋନା ସଂକ୍ରମଣରେ ମୃତ୍ୟୁ ହେଉଛି ସେତେବେଳେ ମଣିଷ ପାଖରେ ମରିଯାଉଛି ମାନବିକତା। ଏହାର ଏକ ଉଦାହରଣ ଦେଖିବାକୁ ମିଳିଛି ଚେନ୍ନାଇରେ। ସେଠାରେ ଜଣେ ୫୫ ବର୍ଷୀୟ ଡାକ୍ତରଙ୍କର ମୃତ୍ୟୁକୁ ନେଇ ଏବେ ଚର୍ଚ୍ଚା ଯୋର ଧରିଛି। ଚେନ୍ନାଇର ଡାକ୍ତର ସିମୋନ ହର୍କୁଲେସ କରୋନା ସଂକ୍ରମିତଙ୍କ ଚିକିତ୍ସା କରିବା ପରେ ସେ ନିଜେ ଏଥିରେ ସଂକ୍ରମିତ ହୋଇଥିଲେ। ଡାକ୍ତର କରୋନାରେ ପୀଡ଼ିତ ହେବା ପରେ ତାଙ୍କୁ ଏକ ଘରୋଇ ହସ୍ପିଟାଲରେ ଭର୍ତ୍ତି କରାଯାଇଥିଲା। ହେଲେ ରବିବାର ତାଙ୍କର ମୃତ୍ୟୁହେବା ପରେ ପରିବାର ଲୋକେ ଓ ସାଥି ଡାକ୍ତର ତାଙ୍କ ମୃତ ଶରୀରକୁ କବର ଦେବାକୁ ନେବା ସମୟରେ ଡାକ୍ତର ରହୁଥିବା କଲୋନିର ଲୋକେ ଏହାକୁ ବିରୋଧ କରିବା ସହ ଡାକ୍ତର ସିମୋନଙ୍କ ମୃତଦେହକୁ ନେଇ ଯାଉଥିବା ଆମ୍ବୁଲାନ୍ସ ଉପରକୁ ପଥରମାଡ କରିଥିଲେ। ଫଳରେ ଆମ୍ବୁଲାନ୍ସ ଡ୍ରାଇଭର ଆହତ ମଧ୍ୟ ହୋଇଥିଲେ। ଫଳରେ ତାଙ୍କୁ କବର ଦେବାକୁ ପରିବାର ଲୋକେ କିଛି ସମୟ ଏଣେ ତେଣେ ବୁଲିଥିଲେ। ଏହାପରେ ମୃତ ଡାକ୍ତରଙ୍କ ପରିବାର ଲୋକେ ପୋଲିସର ସହାୟତା ନେବାରୁ ରାତି ପ୍ରାୟ ୧ଟା ୩୦ ମିନିଟରେ ପୂର୍ବ ନିର୍ଦ୍ଧାରିତ କବରସ୍ଥାନରେ ତାଙ୍କୁ କବର ଦିଆଯାଇଥିବା ସୂଚନା ମିଳିଛି। ଏହି ମାମଲାରେ ପୋଲିସ ୨୦ ଜଣଙ୍କୁ ଗିରଫ କରିଥିବା ଜଣାପଡିଛି।
