ନୂଆଦିଲ୍ଲୀ,୧୨।୩ : ପୃଥିବୀର ୧୨୧ଟି ଦେଶରେ କରୋନା ସଂକ୍ରମଣ ହୋଇଛି। ଦିନକୁ ଦିନ ଏଥିରେ ଗୋଟିଏ ପରେ ଗୋଟିଏ ଦେଶ ଯୋଡ଼ି ହେବାରେ ଲାଗିଛନ୍ତିି। ଭାରତରେ ସନ୍ଦିଗ୍ଧଙ୍କ ନମୂନା ଯାଞ୍ଚ୍ ପାଇଁ ୫୨ଟି କେନ୍ଦ୍ର ସ୍ଥାପିତ ହୋଇଛି। ଏସବୁ କେନ୍ଦ୍ରରେ ୫ଟି ନମୂନା ଯାଞ୍ଚ୍ କରାଯାଉଛି। ସେଥିମଧ୍ୟରେ ଗଳା ଅବା ନାଶାପଥର ସ୍ବାବ୍ ତୁଳା ସହାୟତାରେ ସଂଗ୍ରହ କରାଯାଇ ପରୀକ୍ଷା କରାଯାଇଥାଏ। ସେହିପରି ନାଜାଲ ଅସପିରେଶନ ପରୀକ୍ଷାରେ ବିଶେଷଜ୍ଞ ନାଶାପଥରେ ସାଲାଇନ୍ ସଲ୍ୟୁସନ ପ୍ରବେଶ କରାଇ ଏହା ସଂଗ୍ରହ କରି ପରୀକ୍ଷା କରିଥାନ୍ତି। ଅପରପକ୍ଷରେ ଟ୍ରାଚିଆଲ୍ ଆସପିରେଶନ ପରୀକ୍ଷାରେ ଏକ ପ୍ରକାର ପତଳା ହାଲକା ଟ୍ୟୁବ୍ ବ୍ରାଙ୍କୋସ୍କୋପ୍କୁ ଫୁସଫୁସ୍ରେ ପ୍ରବେଶ କରାଯାଇ ନମୂନା ସଂଗ୍ରହ କରାଯାଇଥାଏ। ସେହିପରି ସନ୍ଦିଗ୍ଧଙ୍କ ଛେପଖଙ୍କା ନମୂନା ସଂଗ୍ରହ କରାଯାଇ ପରୀକ୍ଷା ହୋଇଥାଏ। ଏହା ସହିତ ସନ୍ଦିଗ୍ଧଙ୍କ ରକ୍ତ ନମୂନା ସଂଗ୍ରହ କରି ଏହାର ପରୀକ୍ଷା କରାଯାଇ କରୋନା ସଂକ୍ରମଣ ସମ୍ପର୍କରେ ଜଣାପଡ଼ିଥାଏ।
