ଓ୍ବାଶିଂଟନ,୩୧।୩: ସାରା ପୃଥିବୀରେ କରୋନା ସଂକ୍ରମଣ ନେଇ ଭୟଙ୍କର ସ୍ଥିତି ଦେଖାଦେଇଛି। ଏପରିସ୍ଥଳେ ସାମାଜିକ ଦୂରତା, ହାତ ଧୋଇବା ଏବଂ ସାନିଟାଇଜର ବ୍ୟବହାର କରିବା ଉପରେ ବିଶ୍ୱ ସ୍ବାସ୍ଥ୍ୟ ସଂଗଠନ ପକ୍ଷରୁ ଗୁରୁତ୍ୱାରୋପ କରାଯାଇଛି। ବହୁ ଲୋକ ସାନିଟାଇଜର ବ୍ୟବହାର କରିବାକୁ ଏବେ ପସନ୍ଦ କରୁଛନ୍ତି। ବଜାରରେ ସାଧାରଣତଃ ୨ ପ୍ରକାର ସାନିଟାଇଜର ମିଳିଥାଏ। ଗୋଟିଏ ଆଲକୋହଲ ଯୁକ୍ତ ସାନିଟାଇଜର ହୋଇଥିବାବେଳେ ଅନ୍ୟଟି ବିନା ଆଲକୋହଲ ଯୁକ୍ତ ସାନିଟାଇଜର। ବିନା ଆଲକୋହଲ ଯୁକ୍ତ ସାନିଟାଇଜରରେ କ୍ୱାଟେନାରୀ ଆମୋନିୟମ୍ ଯୌଗିକ ରହିଥାଏ। ସାଧାରଣତଃ ଏଥିରେ ବେଞ୍ଜାଲକୋନିୟମ୍ କ୍ଲୋରାଇଡ୍ର ବ୍ୟବହାର କରାଯାଇଥାଏ। ଏହା କିଛି ଅଣୁଜୀବ ନଷ୍ଟ କରିବାକୁ ସକ୍ଷମ ହୋଇଥାଏ। ଅପରପକ୍ଷରେ ଆଲକୋହଲ ଯୁକ୍ତ ସାନିଟାଇଜରରେ ୬୦ରୁ ୯୫ ପ୍ରତିଶତ ପର୍ଯ୍ୟନ୍ତ ଆଲକୋହଲ(ଆଇସୋପ୍ରୋପାଇଲ୍ ଆଲକୋହଲ, ଇଥାନଲ୍) ରହିଥାଏ। ଆଲକୋହଲ ଯୁକ୍ତ ସାନିଟାଇଜରବ୍ୟବହାର ଦ୍ୱାରା ହାତରେ ଲାଗି ରହିଥିବା ବହୁ ଅଣୁଜୀବ, ତଥା ରୋଗ ସୃଷ୍ଟି କରୁଥିବା ଭୂତାଣୁ ସହଜରେ ନଷ୍ଟ ହୋଇଯାଇଥାନ୍ତି। କରୋନା ସଂକ୍ରମଣରୁ ଦୂରେଇ ରହିବା ପାଇଁ ବିଶ୍ୱ ସ୍ବାସ୍ଥ୍ୟ ସଂଗଠନ ପକ୍ଷରୁ ୬୦ ପ୍ରତିଶତରୁ ଅଧିକ ଆଲକୋହଲ ଥିବା ସାନିଟାଇଜର ବ୍ୟବହାର ଉପରେ ଗୁରୁତ୍ୱାରୋପ କରାଯାଇଛି। ଆଲକୋହଲ କରୋନା ଭୂତାଣୁ ଉପରେ ଥିବା ପ୍ରୋଟିନ୍ସ୍ତରକୁ ନଷ୍ଟ କରିଥାଏ। ଏହି ପ୍ରୋଟିନ୍ସ୍ତର କରୋନା ଭୂତାଣୁର ସୁରକ୍ଷା କବଚ ଭାବେ କାର୍ଯ୍ୟ କରିଥାଏ। ମାତ୍ର ଆଲକୋହଲ ଏହି ବାହ୍ୟ ଆବରଣକୁ ଦ୍ରବିଭୁତ କରି ଦିଏ। ଫଳରେ କରୋନା ଭୂତାଣୁ ବିନା ଆବରଣରେ ନିଷ୍କ୍ରିୟ ହୋଇଯାଇଥାଏ। କିନ୍ତୁ ସାନିଟାଇଜର ଅପେକ୍ଷା ୨୦ ସେକେଣ୍ଡ ପର୍ଯ୍ୟନ୍ତ ସାବୁନରେ ହାତ ଧୋଇଲେ କରୋନା ଭୂତାଣୁ ସମ୍ପୂର୍ଣ୍ଣ ନଷ୍ଟ ହୋଇଯାଇଥାଏ ବୋଲି ବିଶ୍ୱ ସ୍ବାସ୍ଥ୍ୟ ସଂଗଠନ ପକ୍ଷରୁ କୁହାଯାଇଛି।
