ନୂଆଦିଲ୍ଲୀ, ୧ା୪ (ପି.ଟି.)- କରୋନା ଭାଇରସ ସଂକ୍ରମଣ ଜନିତ କାରଣ ଯୋଗୁ ଏବେ ଭାରତରେ ୨୧ ଦିନିଆ ଲକ୍ଡାଉନ୍ ଲାଗୁ ହୋଇଛି। ଫଳରେ ଅନ୍ୟ କ୍ରୀଡ଼ା ଭଳି ୧୭ ବର୍ଷରୁ କମ୍ ଭାରତୀୟ ମହିଳା ଫୁଟବଲ ଦଳର ଟ୍ରେନିଂ ମଧ୍ୟ ବନ୍ଦ ରହିଛି। ତେଣୁ ଭାରତୀୟ ଦଳର ସ୍ବିଡିଶ୍ କୋଚ୍ ଥୋମାସ ଡେନର୍ବି ବୁଧବାର ସ୍ବଦେଶ ଫେରିବା ପାଇଁ ବ୍ୟବସ୍ଥା ହୋଇଛି। ଭାରତରେ ଥିବା ସେମାନଙ୍କ ନାଗରିକଙ୍କୁ ଫେରାଇ ନେବାପାଇଁ ସ୍ବିଡେନ ସରକାରଙ୍କ ପକ୍ଷରୁ ବିମାନ ବ୍ୟବସ୍ଥା କରାଯାଇଛି। ସେଥିରେ ଡେନର୍ବି ଏବଂ ତାଙ୍କ ସାଥି ଫିଟ୍ନେସ୍ କୋଚ୍ ପେର କାର୍ଲସନ ସ୍ବଦେଶ ଫେରିବେ। ନଭେମ୍ବରରେ ହେବାକୁଥିବା ୧୭ ବର୍ଷରୁ କମ୍ ମହିଳା ଫିଫା ବିଶ୍ୱକପ ପାଇଁ ଡେନର୍ବି ଭାରତୀୟ ଦଳର ଦାୟିତ୍ୱରେ ଅଛନ୍ତି। ” ବର୍ତ୍ତମାନ ଟ୍ରେନିଂ ବନ୍ଦ। ଖେଳାଳିମାନେ ସେମାନଙ୍କ ଘରକୁ ଫେରି ଯାଇଛନ୍ତି। ତେଣୁ ମୁଖ୍ୟ କୋଚ୍ ଡେନର୍ବି ବୁଧବାର ସ୍ବିଡେନ ଫେରିଯିବେ“ ବୋଲି ସର୍ବଭାରତୀୟ ଫୁଟବଲ ଫେଡେରେଶନ ସାଧାରଣ ସମ୍ପାଦକ କୁଶାଲ ଦାସ ପ୍ରକାଶ କରିଛନ୍ତି। ୧୭ ବର୍ଷରୁ କମ୍ ମହିଳା ଫିଫା ବିଶ୍ୱକପ ନଭେମ୍ବର ୨ରୁ ୨୧ ପର୍ଯ୍ୟନ୍ତ ଭାରତର ୫ଟି ଭେନ୍ୟୁରେ ହେବାର କାର୍ଯ୍ୟସୂଚୀ ରହିଛି।
୬୦ ବର୍ଷୀୟ ଅଭିଜ୍ଞ ଡେନର୍ବି ଗତବର୍ଷ ନଭେମ୍ବରରେ ୧୭ ବର୍ଷରୁ କମ୍ ମହିଳା ଫୁଟବଲ ଦଳ ପାଇଁ କୋଚ୍ ନିଯୁକ୍ତ ହୋଇଥିଲେ। ପୂର୍ବରୁ ତାଙ୍କ ପ୍ରଶିକ୍ଷଣରେ ସ୍ବିଡେନ ମହିଳା ଫୁଟବଲ ଦଳ ୨୦୧୧ରେ ଜର୍ମାନୀରେ ଅନୁଷ୍ଠିତ ମହିଳା ଫିଫା ବିଶ୍ୱକପରେ ତୃତୀୟ ସ୍ଥାନ ଅଧିକାର କରିଥିଲା। ୨୦୧୨ ଲଣ୍ଡନ ଅଲିମ୍ପିକ୍ସରେ ତାଙ୍କ ପ୍ରଶିକ୍ଷଣପ୍ରାପ୍ତ ଦଳ କ୍ୱାର୍ଟର ଫାଇନାଲ ପର୍ଯ୍ୟନ୍ତ ଉନ୍ନୀତ ହୋଇଥିଲା। ୨୦୧୯ରେ ଫ୍ରାନ୍ସରେ ଅନୁଷ୍ଠିତ ମହିଳା ଫିଫା ବିଶ୍ୱକପ ସମୟରେ ଡେନର୍ବି ନାଇଜେରିଆ ସିନିୟର ଦଳର କୋଚ୍ ଥିଲେ। ଭାରତରେ ଟ୍ରେନିଂ ପ୍ରକ୍ରିୟା ଆରମ୍ଭ ପାଇଁ ସ୍ଥିତି ଉପୁଜିଲେ ଡେନର୍ବି ପ୍ରତ୍ୟାବର୍ତ୍ତନ କରିବେ ବୋଲି କୁଶାଲ କହିଛନ୍ତି। ପ୍ରକାଶଯୋଗ୍ୟ ଯେ, ଭାରତରେ ମାର୍ଚ୍ଚ ୨୫ରେ ୨୧ ଦିନିଆ ଲକ୍ଡାଉନ୍ ଆରମ୍ଭ ହୋଇଛି। ମାର୍ଚ୍ଚ ୨୨ରୁ ଅନ୍ତର୍ଜାତୀୟ ବିମାନ ଉଡାଣ ଉପରେ କଟକଣା ଲଗାଯାଇଛି। ଏହା ଏପ୍ରିଲ ୧୪ ପର୍ଯ୍ୟନ୍ତ ଚାଲିବ। କରୋନା ଭାଇରସ ସଂକ୍ରମଣ ଯୋଗୁ ଅନେକ ପ୍ରତିଯୋଗିତା ସ୍ଥଗିତ କିମ୍ବା ବାତିଲ ହୋଇଥିଲେ ହେଁ ୧୭ ବର୍ଷରୁ କମ୍ ମହିଳା ଫିଫା ବିଶ୍ୱକପ ହେବାନେଇ କୁଶାଲ ଆଶାବାଦୀ ଅଛନ୍ତି।
