କଣ୍ଟାପଡା,୧୭।୫(ଡି.ଏନ୍.ଏ.): ଜନପ୍ରତିନିଧିଙ୍କ ଆନ୍ଦୋଳନ ଓ ସ୍ଥାନୀୟ ବାତ୍ୟା ପ୍ରଭାବିତଙ୍କ ଦାବି ପରେ ଗୁରୁବାର ରାଜ୍ୟସରକାରଙ୍କ ସ୍ବତନ୍ତ୍ର ରିଲିଫ କମିଶନର କଣ୍ଟାପଡା ଓ ନିଆଳି ବ୍ଲକକୁ ସମ୍ପୂର୍ଣ୍ଣ ଫନୀ ପ୍ରଭାବିତ ବୋଲି ଘୋଷଣା କରିଛନ୍ତି। ଉଭୟ ବ୍ଲକର ବାତ୍ୟା ପ୍ରଭାବିତଙ୍କୁ ରିଲିଫ କୋଡ୍ ଅନୁଯାୟୀ ଯୁଦ୍ଧକାଳୀନ ଭିତ୍ତିରେ ରିଲିଫ ବଣ୍ଟନ କରିବାକୁ କମିଶନରଙ୍କ କାର୍ଯ୍ୟାଳୟ ଚିଠି ନଂ. ୨୯୬୦ରେ କଟକ ଜିଲାପାଳଙ୍କୁ ଜଣାଇ ଦିଆଯାଇଛି। ଚିଠି ଅନୁଯାୟୀ ବ୍ଲକର ରାଶନ କାର୍ଡଥିବା ବାତ୍ୟା ପ୍ରଭାବିତଙ୍କୁ ୫୦ କିଲୋ ଚାଉଳ, ୨ ହଜାର ଟଙ୍କା ଓ ପଲିଥିନ ଯୋଗାଇ ଦେବାକୁ ନିର୍ଦ୍ଦେଶ ରହିଛି। ତେବେ ପଲିଥିନ୍ ପାଇଁ ୫ ଶହ ଟଙ୍କା ଦେବାକୁ କୁହାଯାଇଛି। ସେହିପରି ରାଶନ କାର୍ଡ ନ ଥିବା ବାତ୍ୟା ପ୍ରଭାବିତଙ୍କୁ ୫୦ କିଲୋ ଚାଉଳ ଦେବାକୁ କମିଶନର ଜିଲାପାଳଙ୍କୁ ନିର୍ଦ୍ଦେଶ ଦେଇଛନ୍ତି।
ତେବେ ସରକାରଙ୍କ ତ୍ରୁଟିିପୂର୍ଣ୍ଣ ଚୟନ ଯୋଗୁ ବହୁ ଗରିବ ପରିବାର ରାଶନ କାର୍ଡ ପାଇପାରି ନାହାନ୍ତି। ଫଳରେ ସେମାନଙ୍କ ପାଇଁ ସରକାରଙ୍କ ରିଲିଫ ପରିଚାଳନା ମାନଦଣ୍ଡ ଏକପ୍ରକାର ଅଭିଶାପ ପାଲଟିଛି।
ସୂଚନାଯୋଗ୍ୟ, ବାଲିଅନ୍ତା-ବାଲିପାଟଣା ସୀମାନ୍ତକୁ ଲାଗି ରହିଥିବା କଣ୍ଟାପଡା ଓ ନିଆଳି ବ୍ଲକକୁ ସମ୍ପୂର୍ଣ୍ଣ ବାତ୍ୟା ପ୍ରଭାବିତ ଅଞ୍ଚଳରୁ ବାଦ ଦିଆଯାଇଥିଲା। ଏ ନେଇ ୮ ତାରିଖଠାରୁ କଣ୍ଟାପଡା ପଞ୍ଚାୟତ ସମିତି ଅଧ୍ୟକ୍ଷା ସ୍ମିତାରାଣୀ ସ୍ବାଇଁଙ୍କ ନେତୃତ୍ୱରେ କଣ୍ଟାପଡା ବ୍ଲକର ସମସ୍ତ ଲୋକ ପ୍ରତିନିଧି ଓ ସମସ୍ତ ରାଜନୈତିକ ଦଳ କଣ୍ଟାପଡା ବ୍ଲକକୁ ସମ୍ପୂର୍ଣ୍ଣ ବାତ୍ୟା ପ୍ରଭାବିତ ଅଞ୍ଚଳ ଭାବେ ଘେଷଣା ପାଇଁ ଜିଲା ଓ ରାଜ୍ୟ ପ୍ରଶାସନ ନିକଟରେ ଦାବି କରି ଆସୁଥିଲେ। ଲୋକ ପ୍ରତିନିଧିଙ୍କ ଦାବିକୁ ଭିତ୍ତିକରି ଗତ ୧୪ ତାରିଖରେ କେନ୍ଦ୍ରୀୟ ପ୍ରତିନିଧିଦଳ କଣ୍ଟାପଡା ଓ ନିଆଳି ବ୍ଲକର ବାତ୍ୟା ପ୍ରଭାବିତ ଅଞ୍ଚଳ ଗସ୍ତକରି ସ୍ଥିତି ସମୀକ୍ଷା କରିଥିଲେ।
