ନୂଆଦିଲ୍ଲୀ,୧୫ା୬(ଆଇଏଏନ୍ଏସ୍): କଂଗ୍ରେସରେ ନେତୃତ୍ୱ ସଙ୍କଟ ଜାରି ରହିଥିବାବେଳେ ପୂର୍ବତନ ପ୍ରତିରକ୍ଷାମନ୍ତ୍ରୀ ଏ.କେ. ଆଣ୍ଟୋନୀ ଏବଂ ଦଳର ସାଧାରଣ ସମ୍ପାଦକ କେ.ସି. ବେଣୁଗୋପାଳ ଅଧ୍ୟକ୍ଷ ପଦ ଗ୍ରହଣ କରିବାକୁ ମନା କରିଦେଇଛନ୍ତି। ସ୍ବାସ୍ଥ୍ୟଗତ କାରଣ ଦର୍ଶାଇ ଆଣ୍ଟୋନୀ ଅଧ୍ୟକ୍ଷ ପଦ ଭାର ନେବାକୁ ଅକ୍ଷମତା ପ୍ରକାଶ କରିଥିବାବେଳେ ଦଳକୁ ମଜଭୁତ କରିବା ଲାଗି ତାଙ୍କର ଅନ୍ୟ ଭୂମିକା ରହିଛି ବୋଲି ବେଣୁଗୋପାଳ କହିଛନ୍ତି। ବେଣୁଗୋପାଳ କର୍ନାଟକରେ ଦଳର ପ୍ରଭାରୀ ମଧ୍ୟ ଅଛନ୍ତି। ଗାନ୍ଧୀ ପରିବାର ବାହାରେ କୌଣସି ନେତାଙ୍କ ହାତରେ କଂଗ୍ରେସର ଲଗାମ ଧରାଇବାକୁ ଉଦ୍ୟମ ହେଉଥିବାବେଳେ ଏନେଇ ଆଣ୍ଟୋନି ଓ ବେଣୁଗୋପାଳଙ୍କ ମତାମତ ଲୋଡାଯାଇଥିଲା। ଏହାବ୍ୟତୀତ ଅହମଦ ପଟେଲ ଓ ଗୁଲାମ ନବି ଆଜାଦଙ୍କ ଉପରେ ମଧ୍ୟ ଦଳର ନଜର ରହିଛି। ଗତ ଲୋକ ସଭା ନିର୍ବାଚନରେ କଂଗ୍ରେସର ନୈରାଶ୍ୟଜନକ ପ୍ରଦର୍ଶନ ପାଇଁ ନିଜକୁ ଦାୟୀ କରି ଦଳ ଅଧ୍ୟକ୍ଷ ପଦରୁ ଇସ୍ତଫା ଦେବା ପାଇଁ ମେ ୨୫ରେ କାର୍ଯ୍ୟକାରୀ କମିଟି ବୈଠକରେ ରାହୁଲ ଗାନ୍ଧୀ ପ୍ରସ୍ତାବ ରଖିଥିଲେ।
