ମୁମ୍ବାଇ,୧୮।୭- ଅଭିଜ୍ଞ ଉଇକେଟକିପର ବ୍ୟାଟ୍ସମ୍ୟାନ ମହେନ୍ଦ୍ର ସିଂ ଆଗାମୀ ଓ୍ବେଷ୍ଟଇଣ୍ଡିଜ ଗସ୍ତରେ ଭାରତୀୟ ଦଳ ସହ ଯିବେନାହିଁ। ଏହି ଗସ୍ତରେ ଭାରତ ଓ ଓ୍ବେଷ୍ଟଇଣ୍ଡିଜ ୩ଟି ଦିନିକିଆ ଓ ୩ଟି ଟି୨୦ ମ୍ୟାଚ୍ ଖେଳିବେ। ସଦ୍ୟ ସମାପ୍ତ ବିଶ୍ୱକପ୍ରେ ଧୋନୀ ଅବସର ଘୋଷଣା କରିବେ ବୋଲି ଆଶା କରାଯାଉଥିଲା। ତେବେ ସେ ଏହି ଗସ୍ତରେ ସାମିଲ ହେବେ ନାହିଁ ବୋଲି ବିଶ୍ୱସ୍ତ ସୂତ୍ରରୁ ଜଣାଯାଇଛି। ତାଙ୍କ ସ୍ଥାନରେ ଯୁବ ଉଇକେଟକିପର ବ୍ୟାଟ୍ସମ୍ୟାନ ରିଷଭ ପନ୍ତ ଦଳରେ ସାମିଲ ହେବେ। ଫଳରେ ସେ ପରିପକ୍ୱ ହେବାକୁ ସୁଯୋଗ ପାଇବେ। ତେବେ ଧୋନୀ ଦଳ ସହ ପ୍ରତ୍ୟକ୍ଷ ଓ ପରୋକ୍ଷ ଭାବେ ଜଡିତ ରହିବେ ଓ ଖେଳାଳିମାନଙ୍କୁ ଗାଇଡ କରିବେ। ଓ୍ବେଷ୍ଟଇଣ୍ଡିଜ ଗସ୍ତ ପାଇଁ ଦଳ ଚୟନ ନିମନ୍ତେ ଶୁକ୍ରବାର ଚୟନ କମିଟିର ବୈଠକ ବସିବ। ଏହାପରେ ଯାଇ ସ୍ଥିତି ସ୍ପଷ୍ଟ ହେବ। ୩୫ ବର୍ଷୀୟ ଅଭିଜ୍ଞ ଦୀନେଶ କାର୍ତ୍ତିକ ଦଳରେ ସାମିଲ ରହିବେ ବୋଲି ଆଶା କରାଯାଉଛି। ଆସନ୍ତା ଅକ୍ଟୋବରରେ ପନ୍ତ ୨୨ ବର୍ଷରେ ପଦାର୍ପଣ କରିବେ। ଆସନ୍ତାବର୍ଷରେ ଅଷ୍ଟ୍ରେଲିଆରେ ଟି୨୦ ବିଶ୍ୱକପ୍ ଖେଳାଯିବ। ଫଳରେ ନିଜ ପ୍ରଦର୍ଶନକୁ ଶାଣିତ କରିବା ପାଇଁ ପନ୍ତ ଗୋଟିଏ ବର୍ଷ ସମୟ ପାଇବେ। ଅନ୍ୟପଟେ ଚେନ୍ନାଇ ସୁପରକିଙ୍ଗ୍ସ ପାଇଁ ଧୋନୀ ଆହୁରି ଗୋଟିଏ ବର୍ଷ ଖେଳିବେ। ତେଣୁ ସେ ପର୍ଯ୍ୟନ୍ତ ସେ ଅବସର ନେବାକୁ ଚାହାନ୍ତି ନାହିଁ ବୋଲି କୁହାଯାଉଛି।
