ମୁମ୍ବାଇ: ବଲିଉଡ୍ପ୍ରେମୀଙ୍କ ପାଇଁ ଏକ ଦୁଃଖ ଖବର। ଓସ୍କାର ଆଓ୍ବାର୍ଡ ପ୍ରତିଯୋଗିତାରୁ ବାଦ୍ ପଡ଼ିଲା ଫିଲ୍ମ ‘ଗଲି ବୟ’। ଜୋୟା ଅଖ୍ତରଙ୍କ ଫିଲ୍ମ ‘ଗଲି ବୟ’ ଚଳିତବର୍ଷ ଓସ୍କାର ଆଓ୍ବାର୍ଡ ପାଇଁ ବେଷ୍ଟ ଇଣ୍ଟରନ୍ୟାଶନାଲ ଫିଚର୍ ଫିଲ୍ମ କ୍ୟାଟେଗୋରିରେ ଭାରତ ପକ୍ଷରୁ ଅଫିସିଆଲ ଏଣ୍ଟ୍ରି ଥିଲା। ୯୨ତମ ଏକାଡେମୀ ଆଓ୍ବାର୍ଡ ପାଇଁ ମଙ୍ଗଳବାର ଚୂଡ଼ାନ୍ତ ତାଲିକା ଘୋଷଣା କରାଯାଇଥିବାବେଳେ ଏଥିରେ ‘ଗଲି ବୟ’ର ନାମ ନ ଥିଲା। ଏହାପରେ ଫିଲ୍ମଟି ପ୍ରତିଯୋଗିତାରୁ ବାଦ୍ ପଡ଼ିଥିବା ସ୍ପଷ୍ଟ ହୋଇଛି।
ଚଳିତବର୍ଷ ଫେବୃୟାରୀ ୧୪ରେ ‘ଗଲି ବୟ’ ରିଲିଜ୍ ହୋଇଥିଲା। ଫିଲ୍ମରେ ରଣବୀର ସିଂ, ଆଲିୟା ଭଟ୍ଟ ଏବଂ ସିଦ୍ଧାନ୍ତ ଚତୁର୍ବେଦୀଙ୍କ ଅଭିନୟକୁ ଚାରିଆଡ଼ୁ ଖୁବ୍ ପ୍ରଶଂସା ମିଳିଥିଲା। ସିନେ-ସମୀକ୍ଷକ ଓ ଦର୍ଶକ ଉଭୟେ ଫିଲ୍ମକୁ ପସନ୍ଦ କରିଥିଲେ। ଫିଲ୍ମର କାହାଣୀ ସହିତ ଗୀତ ମଧ୍ୟ ସୁପର୍ହିଟ୍ ରହିଥିଲା। ବସ୍ତି ଅଞ୍ଚଳର ଏକ ଯୁବ ରାପର୍ଙ୍କ କାହାଣୀକୁ ଫିଲ୍ମରେ ଦେଖିବାକୁ ମିଳିଥିଲା। ତେବେ ଅନେକ ବିଚାରବିମର୍ଶ ପରେ ଫିଲ୍ମକୁ ଓସ୍କାର ଆଓ୍ବାର୍ଡ ଲାଗି ଭାରତ ପକ୍ଷରୁ ପଠାଇବାକୁ ସ୍ଥିର କରାଗଲା। ଏଥିପାଇଁ ସିନେପ୍ରେମୀ ଆଶାବାଦୀ ଥିବା ସହ ଉତ୍ସାହିତ ମଧ୍ୟ ଥିଲେ। ହେଲେ ମଙ୍ଗଳବାର ଚୂଡ଼ାନ୍ତ ତାଲିକା ପ୍ରକାଶ ପାଇବା ପରେ ଭାରତୀୟ ସିନେପ୍ରେମୀଙ୍କୁ ନିରାଶ ହେବାକୁ ପଡ଼ିଛି। ଅନ୍ୟପକ୍ଷରେ ‘ଓସ୍କାର ଆଓ୍ବାର୍ଡ’ର ବେଷ୍ଟ ଇଣ୍ଟରନ୍ୟାଶନାଲ ଫିଚର୍ ଫିଲ୍ମ କ୍ୟାଟେଗୋରିରେ ମୋଟ ୯୧ଟି ଫିଲ୍ମ ଏଣ୍ଟ୍ରି ହୋଇଥିବାବେଳେ ଚୂଡ଼ାନ୍ତ ତାଲିକାରେ କେବଳ ୧୦ଟି ଫିଲ୍ମକୁ ଚୟନ କରାଯାଇଛି।
