ଭୁବନେଶ୍ୱର, ୧୦ା୬ (ସ୍ପୋଟର୍ସ ବ୍ୟୁରୋ): ଭାରତୀୟ ଗୋଲକିପର କମଲଜିତ୍ ସିଂ ହିରୋ ଇଣ୍ଡିଆନ ସୁପର ଲିଗ୍ (ଆଇଏସ୍ଏଲ୍)ର ୭ମ ସଂସ୍କରଣରେ ଓଡ଼ିଶା ଏଫ୍ସି ତରଫରୁ ଖେଳିବେ। ଏଥିପାଇଁ ସେ ଦଳ ସହିତ ୨ବର୍ଷିଆ ଚୁକ୍ତି କରିଛନ୍ତି। ୨୪ ବର୍ଷୀୟ ଏହି ଅଭିଜ୍ଞ ଗୋଲକିପର ପୂର୍ବରୁ ହାଇଦ୍ରାବାଦ ଏଫ୍ସି ତରଫରୁ ଖେଳୁଥିଲେ। ଜାତୀୟ ସିନିୟର ଦଳ ତରଫରୁ କୋଚ୍ ଇଗୋର ଷ୍ଟିମାକ୍ଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ସେ କିଙ୍ଗ୍ସ କପ୍ ଇଣ୍ଟରନ୍ୟାଶନାଲ କପ୍ ଏବଂ ଗତବର୍ଷ ବାଂଲାଦେଶ ବିପକ୍ଷରେ ଫିଫା ବିଶ୍ୱକପ୍ ଯୋଗ୍ୟତାପର୍ଯ୍ୟାୟ ମ୍ୟାଚ ଖେଳିଛନ୍ତି। ମୋ ପ୍ରତି ଆଗ୍ରହ ଦେଖାଇଥିବାରୁ କ୍ଲବ ମ୍ୟାନେଜମେଣ୍ଟ ନିକଟରେ ମୁଁ କୃତଜ୍ଞ। ଭୁବନେଶ୍ୱରରେ ଖେଳିବା ପାଇଁ ମୋର ଆଗ୍ରହ ରହିଛି। ଦଳ ପ୍ରତି ଯଥା ସମ୍ଭବ ମୋର ଅବଦାନ ରହିବ ବୋଲି କମଲଜିତ୍ କହିଛନ୍ତି। ଆଇଏସ୍ଏଲ୍ରେ ଏଫ୍ସି ପୁଣେ ସିଟି ( ବର୍ତ୍ତମାନ ହାଇଦ୍ରାବାଦ ଏଫ୍ସି) ପାଇଁ ଖେଳିବା ପୂର୍ବରୁ ସେ ସ୍ପୋର୍ଟିଂ କ୍ଲବ ଡି’ ଗୋଆ ଏବଂ ମିନର୍ଭା ପଞ୍ଜାବ ଏଫ୍ସି ତରଫରୁ ପ୍ରତିନିଧିତ୍ୱ କରିସାରିଛନ୍ତି। ଓଡ଼ିଶା ଏଫ୍ସି ସଭାପତି ରୋହନ ଶର୍ମା କହିଛନ୍ତି କମଲଜିତ ଜଣେ ଅଭିଜ୍ଞ ଗୋଲ୍କିପର। ଗତ ସିଜନରେ ତାଙ୍କର ପ୍ରଦର୍ଶନ ଯଦିଓ ଭଲ ରହି ନ ଥିଲା, ତାଙ୍କ ସାମର୍ଥ୍ୟ ଉପରେ ଆମର ଖୁବ୍ ଭରସା ରହିଛି। ସେ ଖୁବ୍ ଶୀଘ୍ର ଫର୍ମ ଫେରିପାଇବା ସହ ଜାତୀୟ ଦଳକୁ ପ୍ରତ୍ୟାବର୍ତ୍ତନ କରିବେ ବୋଲି ଆମର ଦୃଢ ବିଶ୍ୱାସ ରହିଛି ବୋଲି ଶର୍ମା ପ୍ରକାଶ କରିଛନ୍ତି।
