ଓଡ଼ଗାଁ,୨୨ା୬(ସ୍ବ.ପ୍ର.): ଶୁକ୍ରବାର ଓଡଗାଁ ଏନ୍ଏସି ତରଫରୁ ଆନୁଷ୍ଠାନିକ ଭାବେ ପଲିଥିନ ବ୍ୟବହାର ଉପରେ କଟକଣା ଲାଗିଛି। ଏଥିନିମନ୍ତେ ସ୍ଥାନୀୟ ବାସିନ୍ଦା ଓ ବ୍ୟବସାୟୀମାନଙ୍କ ମଧ୍ୟରେ ସଚେତନତା ସୃଷ୍ଟି କରିବାକୁ ଏକ ସଚେତନତା ରଥକୁ ନୟାଗଡ଼ ଉପଜିଲାପାଳ ଜିତେନ୍ଦ୍ର କୁମାର ସାହୁ ନୀଳ ପତାକା ଦେଖାଇ ଶୁଭାରମ୍ଭ କରିଥିଲେ। ଏଥିରେ ସମସ୍ତଙ୍କୁ ପଲିଥିନ ବିକ୍ରି ଓ ବ୍ୟବହାରରୁ ନିବୃତ୍ତ ରହିବାକୁ ଚେତାବନୀ ଦିଆଯାଇଥିଲା। ଏହି ଘୋଷଣାର ୧୫ଦିନ ପରେ ପଲିଥିନ ବିକ୍ରି ଓ ମହଜୁଦକାରୀଙ୍କଠାରୁ ସମସ୍ତ ପଲିଥିନ ଜବତ କରାଯିବା ସହିତ ସେମାନଙ୍କୁ ୨୦୦ରୁ ୨୦ ହଜାର ଟଙ୍କା ପର୍ଯ୍ୟନ୍ତ ଜରିମାନା ଆଦାୟ କରିବାକୁ ମାଇକ୍ ଦ୍ୱାରା ପ୍ରଚାର କରାଯାଇଥିଲା ା ଜାତୀୟ ଗ୍ରୀନ ଟ୍ରିବ୍ୟୁନାଲ ଦ୍ୱାରା କଡାକଡି ଭାବେ ଏହାକୁ ପାଳନ କରିବାକୁ ଚେତାବାନୀ ମିଳିବାପରେ ଏପରି ପଦକ୍ଷେପ ନିଆଯାଇଥିବା ଏନ୍ଏସି ନିର୍ବାହୀ ଅଧିକାରୀ ପ୍ରଫୁଲ୍ଲ କୁମାର ମହାପାତ୍ର ସୂଚନା ଦେଇଛନ୍ତି। ଏହା ସହିତ ଶୁକ୍ରବାର ଗୃହ ନିର୍ମାଣ ଓ ନଗର ଉନ୍ନୟନ ବିଭାଗ ଆନୁକୂଲ୍ୟରେ ୨ୟ ପର୍ଯ୍ୟାୟ ବର୍ଜ୍ୟବସ୍ତୁ ପରିଚାଳନା ସମ୍ପର୍କିତ କର୍ମଶାଳା ଅନୁଷ୍ଠିତ ହୋଇଯାଇଛି। ପରିଷଦ ସଭାଗୃହରେ ଅନୁଷ୍ଠିତ କର୍ମଶାଳାରେ ଉପଜିଲାପାଳ ସାହୁ ଅଧ୍ୟକ୍ଷତା କରିଥିଲେ। ଏଥିରେ ସୁସ୍ଥ ଓଡିଶା ଗଠନ ନିମନ୍ତେ ସମସ୍ତ ସଫେଇ କର୍ମଚାରୀ ଓ ସ୍ବୟଂ ସହାୟିକା ଗୋଷ୍ଠୀର କର୍ମକର୍ତ୍ତାଙ୍କୁ ବିଭିନ୍ନ କିସମର ବର୍ଜ୍ୟବସ୍ତୁ ସୁପରିଚାଳନା ସଙ୍କ୍ରାନ୍ତୀୟ ତାଲିମ ସହିତ ସଚେତନତା କରାଯାଇଥିଲା। ସହର ବାସିନ୍ଦା ଓ ବ୍ୟବସାୟୀଙ୍କୁ ଦୁଇଟି ଡଷ୍ଟବିନ୍ ବ୍ୟବହାର କରିବାକୁ ଅନୁରୋଧ କରିବା ନିମନ୍ତେ ସମସ୍ତଙ୍କୁ କୁହାଯାଇଥିଲା। ନୀଳ ରଙ୍ଗର ଡଷ୍ଟବିନ୍ରେ ଶୁଖିଲା ଓ ସବୁ ରଙ୍ଗର ଡଷ୍ଟବିନ୍ରେ ଓଦା ବର୍ଜ୍ୟବସ୍ତୁ ପକାଇବା ନିମନ୍ତେ କୁହାଯାଇଥିଲା। ନିର୍ବାହୀ ଅଧିକାରୀ ମହାପାତ୍ରଙ୍କ ସମେତ ସ୍ବଚ୍ଛ ଭାରତ ମିଶନର ନୋଡାଲ ଅଫିସର ସୁବ୍ରତ କୁମାର ମହାପାତ୍ର, କମ୍ୟୁନିଟି ଅର୍ଗାନାଇଜର ଅନିତା ବଳିଆରସିଂ ପ୍ରମୁଖ ଯୋଗଦେଇ କାର୍ଯ୍ୟକ୍ରମ ପରିଚାଳନା କରିଥିଲେ ା
