ନୂଆଦିଲ୍ଲୀ,୧୭-୭: ମୋଦି ସରକାର ପ୍ରଥମ କାର୍ଯ୍ୟକାଳ ବେଳେ ରାଷ୍ଟ୍ରାୟତ୍ତ ଏୟାରଲାଇନ୍ସ କମ୍ପାନୀ ଏୟାର ଇଣ୍ଡିଆକୁ ବିକ୍ରି ପାଇଁ ଉଦ୍ୟମ କରି ବିଫଳ ହୋଇଥିଲେ। ତେବେ ଦ୍ୱିତୀୟ କାର୍ଯ୍ୟକାଳରେ ଏହି କମ୍ପାନୀକୁ ବିକ୍ରି କରିବାକୁ ସରକାର ନୂଆ ପନ୍ଥା ଆପଣାଇବାକୁ ଯାଉଛନ୍ତି। ପ୍ରାପ୍ତ ସୂଚନାରୁ ଜଣାପଡିଛି ଯେ, ଏୟାର ଇଣ୍ଡିଆର ବିକ୍ରି ପାଇଁ ସରକାର ଆସନ୍ତା ମାସରେ ଏକ୍ସପ୍ରେଶନ ଅଫ୍ ଇଣ୍ଟ୍ରେଷ୍ଟ ବା ଆଗ୍ରହପତ୍ର ଜାରି କରିବାକୁ ଯାଉଛନ୍ତି। ଆଗ୍ରହପତ୍ର ଜାରି କରିବା ପୂର୍ବରୁ ସମ୍ଭାବ୍ୟ କ୍ରେତାଙ୍କ ସହ ସରକାର ଆଲୋଚନା କରିବାକୁ ଆଗ୍ରହୀ। ଏହା ପରେ ରୋଡ ସୋ’ ଆୟୋଜନ କରିବାକୁ ସରକାରଙ୍କ ଯୋଜନା ରହିଛି। କିଛି ଗୋପନୀୟ ତଥ୍ୟକୁ ବାଦ୍ ଦେଲେ ଆଗ୍ରହୀ କ୍ରେତା ଏୟାର ଇଣ୍ଡିଆର ଖାତାବହି ଯାଞ୍ଚ କରିପାରିବେ ଏବଂ ଶେୟାର କ୍ରୟ ଚୁକ୍ତିକୁ ମଧ୍ୟ ପରଖି ପାରିବେ ବୋଲି ଜଣେ ଅଧିକାରୀ ନାମ ଗୋପନ ରଖିବା ସର୍ତ୍ତରେ କହିଛନ୍ତି। ଏ ସମ୍ପର୍କରେ ଅର୍ଥ ମନ୍ତ୍ରଣାଳୟର ମୁଖପାତ୍ର ଡି.ଏସ୍.ମାଲିକ ଏବଂ ଏୟାର ଇଣ୍ଡିଆର ମୁଖପାତ୍ର ଧନଞ୍ଜୟ କୁମାରଙ୍କ ଠାରୁ କୌଣସି ପ୍ରତିକ୍ରିୟା ମିଳିପାରିନାହିଁ। ଚଳିତ ଆର୍ଥିକ ବର୍ଷରେ ଏୟାର ଇଣ୍ଡିଆର ବିକ୍ରି ଶେଷ କରାଯିବ ବୋଲି ଅର୍ଥମନ୍ତ୍ରୀ ନିର୍ମଳା ସୀତାରାମନ୍ ତାଙ୍କ ବଜେଟ ଭାଷଣରେ ଉଲ୍ଲେଖ କରିଥିଲେ। ଟିକସଦାତାଙ୍କ ପ୍ରାୟ ୩୦,୦୦୦ କୋଟି ଟଙ୍କାରେ ଏବେ ଏୟାର ଇଣ୍ଡିଆ ବଜାରରେ ତିଷ୍ଠି ରହିଛି। ବିମାନ ସେକ୍ଟରରେ ଘରୋଇ କମ୍ପାନୀଙ୍କ ପ୍ରତିଯୋଗିତାର ସମ୍ମୁଖୀନ ହୋଇ ନ ପାରିବା ଯୋଗୁ ଏୟାର ଇଣ୍ଡିଆ କ୍ରମାଗତ କ୍ଷତି ସହିଚାଲିଛି। କମ୍ପାନୀ ଉପରେ ବର୍ତ୍ତମାନ ୮.୪ ବିଲିୟନ ଡଲାର ଋଣ ରହିଥିବା ବେଳେ ଗତ ଆର୍ଥିକ ବର୍ଷ ସୁଦ୍ଧା ଏହା ୭୬୦୦ କୋଟି ଟଙ୍କାରୁ ଅଧିକ କ୍ଷତି ସହିଛି।
ଦିଲ୍ଲୀ-ଟରଣ୍ଟୋ ମଧ୍ୟରେ ସିଧା ଫ୍ଲାଇଟ୍
ଘରୋଇକରଣର ଦ୍ୱାରଦେଶରେ ପହଞ୍ଚତ୍ବା ସତ୍ତ୍ୱେ ଏୟାର ଇଣ୍ଡିଆ ବିଶ୍ୱ ପର୍ଯ୍ୟଟନ ଦିବସ(ସେପ୍ଟେମ୍ବର ୨୭)ଠାରୁ ଦିଲ୍ଲୀ-ଟରଣ୍ଟୋ ସିଧାସଳଖ ଫ୍ଲାଇଟ ଚଳାଇବ ବୋଲି ସିଏମ୍ଡି ଅଶ୍ୱିନୀ ଲୋହାନୀ ପ୍ରକାଶ କରିଛନ୍ତି। ଇନ୍ଦୋର-ଦୁବାଇ ମଧ୍ୟରେ ଆରମ୍ଭ ହୋଇଥିବା ପ୍ରଥମ ଫ୍ଲାଇଟରେ ଯାତ୍ରା କରିବା ଅବସରରେ ସେ କହିଛନ୍ତି ଯେ, ପର୍ଯ୍ୟଟନ କ୍ଷେତ୍ରରେ ଅପାର ସମ୍ଭାବନାକୁ ଦୃଷ୍ଟିରେ ରଖି ଏୟାର ଇଣ୍ଡିଆ ପକ୍ଷରୁ ଅକ୍ଟୋବର ଠାରୁ ନାଇରୋବିକୁ ସିଧାସଳଖ ଫ୍ଲାଇଟ ଚଳାଇବାର ଯୋଜନା ରହିଛି। ଏହାଛଡ଼ା ଅକ୍ଟୋବରରୁ ଭୋପାଳ-ବାଙ୍ଗାଲୋର ମଧ୍ୟରେ ବିମାନ ଚଳାଚଳ କରାଯିବ। ଜନସାଧାରଣଙ୍କ ଦାବି ଅନୁଯାୟୀ କମ୍ପାନୀ ଇନ୍ଦୋରରୁ ବ୍ୟାଙ୍କକ ମଧ୍ୟରେ ଏକ ବିମାନ ଉଡ଼ାଣ କରିବ।
