ଭୁବନେଶ୍ୱର,୧୯।୬(ବ୍ୟୁରୋ)- ଅଖିଳ ଭାରତୀୟ ଆୟୁର୍ବିଜ୍ଞାନ ସଂସ୍ଥାନ (ଏମ୍ସ)ର ସର୍ବଭାରତୀୟ ପିଜି ପ୍ରବେଶିକା ପରୀକ୍ଷା ଫଳ ଶୁକ୍ରବାର ନୂଆଦିଲ୍ଲୀ ଏମ୍ସ ପକ୍ଷରୁ ଘୋଷଣା କରାଯାଇଛି। ଶ୍ରେଷ୍ଠ ୧୦୦ରେ ଏମ୍ସର ୨୯ଜଣ ଛାତ୍ରୀଛାତ୍ର ରହିଥିବାବେଳେ ଭୁବନେଶ୍ୱର ଏମ୍ସର ଏମ୍ବିବିଏସ୍ ଛାତ୍ରୀ ଡା. ଭିନିଥା କେ ଟପ୍ପର ହୋଇଛନ୍ତି। ଭିନିଥା ୧୦୦ ପର୍ସେଣ୍ଟାଇଲ ରଖି ସର୍ବଭାରତୀୟ ସ୍ତରରେ ର଼୍ୟାଙ୍କ ୧ରେ ରହିଛନ୍ତି। ଭିନିଥାଙ୍କୁ ମିଶାଇ ଶ୍ରେଷ୍ଠ ୧୦୦ରେ ଭୁବନେଶ୍ୱର ଏମ୍ସର ୬ଜଣ ରହିଥିବାବେଳେ ମୋଟ ୭୪ଜଣଙ୍କୁ ର଼୍ୟାଙ୍କ୍ ମିଳିଛି। ସେହିଭଳି ଯୋଧପୁର ଓ ଋଷିକେଶ ଏମ୍ସର ୬ଜଣ, ଭୋପାଳ ଏମ୍ସର ୫, ନୂଆଦିଲ୍ଲୀ ଏମ୍ସର ୪, ପାଟଣା ଓ ରାୟପୁର ଏମ୍ସର ଜଣେ ଲେଖାଏ ଛାତ୍ରୀଛାତ୍ର ରହିଛନ୍ତି। ତେବେ ଭିନିଥାଙ୍କ ସଫଳତା ପରେ ଭୁବନେଶ୍ୱର ଏମ୍ସ ନିର୍ଦ୍ଦେଶିକା ଗୀତାଞ୍ଜଳି ବାଟମାନବେନ ତାଙ୍କ ସମେତ ସମସ୍ତ କୃତି ଛାତ୍ରୀଛାତ୍ରଙ୍କୁ ଶୁଭେଚ୍ଛା ଜଣାଇଛନ୍ତି। ଏଥିସହ ଅଧ୍ୟାପକଙ୍କ ପରାମର୍ଶ ଓ ଶିକ୍ଷାଦାନକୁ ମଧ୍ୟ ପ୍ରଶଂସା କରିଛନ୍ତି। ଭବିଷ୍ୟତରେ ଡାକ୍ତରୀ ବିଜ୍ଞାନରେ ଭୁବନେଶ୍ୱର ଏମ୍ସ ଦେଶର ସର୍ବୋତ୍ତମ ଏକାଡେମିକ ଅନୁଷ୍ଠାନ ହେବ ବୋଲି ଗୀତାଞ୍ଜଳୀ କହିଛନ୍ତି। ଅନ୍ୟପକ୍ଷରେ ନିଜର ସଫଳତା ସମ୍ପର୍କରେ ଭିନିଥା କହିଛନ୍ତି, କୌଣସି ପରୀକ୍ଷା ଦେବାବେଳେ ମୁଁ ମୋର ପୂର୍ବ ପରୀକ୍ଷାକୁ ତର୍ଜମା କରିଥାଏ। ଆଉ କ’ଣ ଅଧିକ କଲେ ଆଗାମୀ ପରୀକ୍ଷା ଭଲ ହେବ ସେହି ଦିଗରେ ଗୁରୁତ୍ୱ ଦିଏ। ତେବେ ଯେଉଁମାନେ ପ୍ରବେଶିକା ପରୀକ୍ଷା ଦେବାକୁ ଚାହୁଁଛନ୍ତି ସେମାନଙ୍କୁ କହିବି ଯେ, ସେମାନେ ପରୀକ୍ଷାରେ କେଉଁ ର଼୍ୟାଙ୍କରେ ରହିବେ ଚିନ୍ତା ନ କରି ଜଣେ ଭଲ ଡାକ୍ତର ହେବାକୁ ଲକ୍ଷ୍ୟ ରଖିଲେ ନିଶ୍ଚିତ ସଫଳତା ପାଇପାରିବେ ବୋଲି ସେ କହିଛନ୍ତି।
