ଏମିତି ଗାଁ ଅଛି ଯେଉଁଠି ଜଣେ ବ୍ୟକ୍ତି ନବମ ଯାଏ ପଢିଛନ୍ତି, ଅନେକେ ବି ସ୍କୁଲ ଦେଖିନାହାନ୍ତି। ଏହି ଗାଁଟି ହେଉଛି ଆନ୍ଧ୍ରପ୍ରଦେଶର ଗୋଦାବରୀ ଜିଲାର ମାଡ଼ିବନ୍ଧ। ଚିନ୍ତୁରୁ ବ୍ଲକ ଅନ୍ତର୍ଗତ ଉକ୍ତ ଗାଁରେ ୧୬୭ କୋଣ୍ଡାରେଡି ସମ୍ପ୍ରଦାୟର ଆଦିବାସୀ ପରିବାର ପାହାଡ଼ ଉପରେ ୨୧ଟି ପଡ଼ାରେ ରହୁଛନ୍ତି ।
ମାଡିବନ୍ଧରେ ପହଞ୍ଚିବାକୁ ହେଲେ ଅନେକ ପାହାଡ଼ ଚଢି ଯିବାକୁ ପଡ଼େ। ଏଥିତ୍ପାଇଁ ଦୀର୍ଘ ୨୦ ବର୍ଷ ମଧ୍ୟରେ ମାଡ଼ିବନ୍ଧକୁ କୌଣସି ଅଧିକାରୀ ଯାଇ ନ ଥିଲେ। କିନ୍ତୁ ଇଣ୍ଟଗ୍ରେଟେଡ୍ ଟ୍ରାଇବାଲ ଡେଭଲପ୍ମେଣ୍ଟ ପ୍ରୋଜେକ୍ଟ(ଆଇଟିଡିଏ)ର ପ୍ରୋଜେକ୍ଟ ଅଫିସର ୩୭ ବର୍ଷୀୟ ଆଇଏଏସ୍ ଅଧିକାରୀ ଭେଙ୍କଟ ରମଣ ଅକାଳୁ ଘଣ୍ଟା ଘଣ୍ଟା ଧରି ଚାଲି ଚାଲି ଯାଇ ସେଠାରେ ପହଞ୍ଚି ଶିକ୍ଷା ବ୍ୟବସ୍ଥା କରିଛନ୍ତି। ପ୍ରଥମେ ୨୦୨୦ ଫେବୃୟାରୀରେ ସେଠାରେ ପହଞ୍ଚି ପିଲାମାନଙ୍କୁ ପଢ଼ାଇବା ଲାଗି ସ୍କୁଲ ନିର୍ମାଣ କରିବାକୁ ଗ୍ରାମବାସୀଙ୍କୁ ରାଜି କରାଇଥିଲେ। ପରେ ଲକ୍ଡାଉନ ଯୋଗୁ ତାହା ବନ୍ଦ ରହିଥିଲା। ପୁଣି ଗତବର୍ଷ ଅକ୍ଟୋବରରେ ସେଠାରେ ପହଞ୍ଚି ଗ୍ରାମବାସୀଙ୍କ ସହାୟତାରେ ଜଙ୍ଗଲରୁ ବାଉଁଶ ଓ ଘାସ ସଂଗ୍ରହ କରି ଏକ ରେସିଡେନ୍ସିଆଲ୍ ସ୍କୁଲ ନିର୍ମାଣ କରିଛନ୍ତି। ଗାଁର ବିଭିନ୍ନ ପଡ଼ାରେ ରହିଥିବା ୮୦ ଜଣ ପିଲାଙ୍କ ମଧ୍ୟରୁ ଏବେ ୨୮ ଜଣ ସ୍କୁଲ ଆସିବାକୁ ସକ୍ଷମ ହୋଇଛନ୍ତି। ଜଣେ ଶିକ୍ଷକଙ୍କୁ ନିଯୁକ୍ତି ଦିଆଯାଇଛି। ପିଲାମାନଙ୍କ ପାଇଁ ସାପ୍ତାହିକ ରାଶନ ପଠାଯାଉଛି। ମଝିରେ ମଝିରେ ଭେଙ୍କଟ ରମଣ ସ୍କୁଲ ପରିଦର୍ଶନରେ ଯାଉଛନ୍ତି ଓ ଅବଶିଷ୍ଟ ପିଲାମାନେ ଶୀଘ୍ର ସ୍କୁଲରେ ଯୋଗଦେବେ ବୋଲି ସେ କହନ୍ତି ।
