ନୂଆଦିଲ୍ଲୀ,୨୮।୪ (ପି.ଟି.): ଆସନ୍ତା ଡିସେମ୍ବର- ଜାନୁୟାରୀରେ ୪ ଲକ୍ଷ ଆମେରିକୀୟ ଡଲାର ପୁରସ୍କାର ରାଶି ବିଶିଷ୍ଟ ଟୁର୍ନାମେଣ୍ଟ ଇଣ୍ଡିଆ ଓପନ ଆୟୋଜନ କରିବାକୁ ପ୍ରସ୍ତୁତ ବୋଲି ବ୍ୟାଡମିଣ୍ଟନ ଆସୋସିଏଶନ ଅଫ ଇଣ୍ଡିଆ (ବିଏଆଇ) କହିଛି। ତେବେ କୋଭିଡ-୧୯ ମହାମାରୀ ନିୟନ୍ତ୍ରଣକୁ ଆସିବା ନିହାତି ଆବଶ୍ୟକ ଓ ସରକାର ଏହି ଟୁର୍ନାମେଣ୍ଟ ଆୟୋଜନ କରିବାକୁ ଅନୁମତି ଦେବା ଆବଶ୍ୟକ ବୋଲି ବିଏଆଇ ତରଫରୁ କୁହାଯାଇଛି। ଇଣ୍ଡିଆ ଓପନ ମଧ୍ୟ ଅଲିମ୍ପିକ କ୍ୱାଲିଫାୟର ରୂପେ ବିବେଚିତ ହେଉଛି।
ଗତ ସପ୍ତାହରେ ବ୍ୟାଡମିଣ୍ଟନ ଓ୍ବାଲର୍ଡ ଫେଡେରେଶନ (ବିଡବ୍ଲ୍ୟୁଏଫ୍) ବିଏଆଇକୁ ଏ ନେଇ ଏକ ଚିଠି ଲେଖିଥିଲା। କରୋନା ଭାଇରସ କାରଣରୁ ଗତମାସ ବାତିଲ ହୋଇଥିବା ବିଡବ୍ଲ୍ୟୁଏଫ୍ ଓ୍ବାଲର୍ଡ ଟୁର ସୁପର ୫୦୦ ଟୁର୍ନାମେଣ୍ଟ ଆୟୋଜନ କରିବାକୁ ବିଏଆଇକୁ ନିର୍ଦ୍ଧାରିତ ସମୟ ବା ସ୍ଲଟ୍ ସ୍ଥିର କରିବାକୁ ନିର୍ଦ୍ଦେଶ ଦିଆଯାଇଥିଲା। ଜବାବରେ ବିଏଆଇ ଦୁଇଟି ସ୍ଲଟ୍ ସମ୍ପର୍କରେ ଅବଗତ କରାଇଥିଲା। ଡିସେମ୍ବର କିମ୍ବା ଜାନୁୟାରୀରେ ଟୁର୍ନାମେଣ୍ଟ ଆୟୋଜନ କରିବାକୁ ବିଏଆଇ ବିଡବ୍ଲ୍ୟୁଏଫ୍କୁ ଜଣାଇଥିଲା। ତେବେ ଏଥିପାଇଁ ସରକାରଙ୍କ ଅନୁମୋଦନ ଆବଶ୍ୟକ ବୋଲି ବିଏଆଇ ସାଧାରଣ ସମ୍ପାଦକ ଅଜୟ କୁମାର ସିଙ୍ଗାଣିଆ କହିଛନ୍ତି।
ଡିସେମ୍ବର କିମ୍ବା ଜାନୁୟାରୀ ଟୁର୍ନାମେଣ୍ଟ ଆୟୋଜନ କରିବାକୁ ଆମେ ପ୍ରସ୍ତୁତ ବୋଲି ଜଣାଇଛୁ। ତେବେ ବିଶ୍ୱରେ ଦେଖାଦେଇଥିବା ସ୍ବାସ୍ଥ୍ୟଗତ ସମସ୍ୟା ଓ ସରକାରଙ୍କ ଅନୁମୋଦନ ଉପରେ ସବୁ କିଛି ନିର୍ଭର କରେ ବୋଲି ସିଙ୍ଗାଣିଆ ସ୍ପଷ୍ଟ କରିଛନ୍ତି। ଗତ ସପ୍ତାହରେ ଆମେ ବିଡବ୍ଲ୍ୟୁଏଫ୍ଠାରୁ ମେଲ୍ ପାଇଥିଲୁ। ସେପ୍ଟେମ୍ବରରେ ଟୁର୍ନାମେଣ୍ଟ ଆୟୋଜନ କରିବାକୁ ଆମକୁ କୁହାଯାଇଥିଲା। ତେବେ ଡିସେମ୍ବରକୁ ପ୍ରଥମ ବିକଳ୍ପ ଓ ଜାନୁୟାରୀକୁ ଦ୍ୱିତୀୟ ବିକଳ୍ପ ଭାବେ ବିଚାର କରୁଥିବା କଥା ଆମେ ବିଡବ୍ଲ୍ୟୁଏଫ୍କୁ ଜଣାଇଛୁ। ଏହା ଏବେ ବିଭିନ୍ନ ସ୍ଥିତି ଉପରେ ନିର୍ଭର କରୁଛି। ଅନ୍ତର୍ଜାତୀୟ ଯାତ୍ରାକୁ ଏବେ ବାସନ୍ଦ କରାଯାଇଛି। ଇଣ୍ଡିଆ ଓପନ ନୂଆ ଦିଲ୍ଲୀରେ ମାର୍ଚ୍ଚ ୨୪ରୁ ୨୯ ତାରିଖ ମଧ୍ୟରେ ଆୟୋଜନ ହେବାର କାର୍ଯ୍ୟକ୍ରମ ଥିଲା।
ଏପ୍ରିଲ ୨୮ ଅଲିମ୍ପିକ୍ କ୍ୱାଲିଫିକେଶନ ଡେଡ୍ ଲାଇନ୍ ମଧ୍ୟରେ ସାମିଲଥିବା ଓ ବାତିଲ ହୋଇଥିବା ଟୁର୍ନାମେଣ୍ଟଗୁଡିକ ହେଲା ସୁଇସ୍ ଓପନ ସୁପର ୩୦୦ (ମାର୍ଚ୍ଚ ୧୭-୨୨), ମାଲେସିଆ ଓପନ ସୁପର ୭୫୦ (ମାର୍ଚ୍ଚ ୩୧- ଏପ୍ରିଲ ୫), ସିଙ୍ଗାପୁର ଓପନ ସୁପର ୫୦୦ (ମାର୍ଚ୍ଚ ୭- ୧୨) ଓ ବ୍ୟାଡମିଣ୍ଟନ ଏସିଆ ଚାମ୍ପିୟନଶିପ୍ (ଏପ୍ରିଲ ୨୧-୨୬)। ସେହିପରି ଇଣ୍ଡୋନେସିଆ ଓପନ ସୁପର ୧୦୦୦ ଓ ବିଭିନ୍ନ ଜୁନିୟର ଓ ପାରାବ୍ୟାଡମିଣ୍ଟନ ଚାମ୍ପିୟନଶିପ୍ ମଧ୍ୟ କରୋନା ଭାଇରସ କାରଣରୁ ପ୍ରଭାବିତ ହୋଇଛି। ଟୋକିଓ ଅଲିମ୍ପିକ୍ସ ଘୁଞ୍ଚାଇ ଦିଆଯାଇଥିବାରୁ ବିଡବ୍ଲ୍ୟୁଏଫ୍ ଓ୍ବାଲର୍ଡ ର଼୍ୟାଙ୍ଗିଙ୍ଗ୍କୁ ମଧ୍ୟ ବାତିଲ କରିଛି।
