ନୂଆଦିଲ୍ଲୀ,୧୯-୬- କେନ୍ଦ୍ରର ମୋଦି ସରକାର ନିଜର ଦ୍ୱିତୀୟ କାର୍ଯ୍ୟକାଳରେ ଦ୍ରୁତଗତିରେ ବଡ଼ ନିଷ୍ପତ୍ତି ନେବା ଆରମ୍ଭ କରିଛନ୍ତି। ଏହିକ୍ରମରେ ଗାଡ଼ିରେ ପେଟ୍ରୋଲ ଓ ଡିଜେଲ ଭର୍ତ୍ତି କରିବା ଲାଗି ଆଉ ପେଟ୍ରୋଲ ପମ୍ପରେ ଚକ୍କର କାଟିବାକୁ ପଡିବ ନାହିଁ। ଗ୍ରାହକଙ୍କୁ ସୁପର ମାର୍କେଟରେ ହିଁ ତେଲ ମିଳିଯିବ।
ମିଡିଆ ରିପୋର୍ଟ ଅନୁଯାୟୀ, ପେଟ୍ରୋଲିୟମ ଓ ପ୍ରାକୃତିକ ଗ୍ୟାସ୍ ମନ୍ତ୍ରଣାଳୟ ଏକ କ୍ୟାବିନେଟ ପ୍ରସ୍ତାବ ପ୍ରସ୍ତୁତ କରୁଛନ୍ତି। ତଦନୁଯାୟୀ, ରିଟେଲ ଦୋକାନରେ କାରବାର କରିବାକୁ ବଡ଼ ବଡ଼ କମ୍ପାନୀଙ୍କୁ ସୁଯୋଗ ମିଳିଯିବ। ବର୍ତ୍ତମାନ ନିୟମ ଅନୁଯାୟୀ, ତେଲର ଖୁଚୁରା ବ୍ୟବସାୟ କରିବାକୁ ହେଲେ କମ୍ପାନୀଙ୍କ ନିକଟରେ ଘରୋଇ ବଜାରରେ ଢାଞ୍ଚାଗତ ନିବେଶ ଲାଗି ୨୦୦୦ କୋଟି ଟଙ୍କା ରହିଥିବା ଆବଶ୍ୟକ। ସେହିପରି ୩୦ ଲକ୍ଷ ଟନ ତେଲ କିଣିବା ଲାଗି ଆବଶ୍ୟକ ରାଶି ସମାନ ବ୍ୟାଙ୍କ ଗ୍ୟାରେଣ୍ଟି ଦେବାକୁ ହେବ। ତେବେ ସରକାର ଏହି ନିୟମକୁ ଅଧିକ କୋହଳ କରିବାକୁ ଯାଉଛନ୍ତି। ସରକାରୀ ସ୍ତରରେ ଚୂଡାନ୍ତ ନିଷ୍ପତ୍ତି ନିଆଗଲେ, ଫ୍ୟୁଚର ଗ୍ରୁପ୍, ଓ୍ବାଲମାର୍ଟ ଭଳି ମଲ୍ଟି ବ୍ରାଣ୍ଡ ରିଟେଲ କମ୍ପାନୀ ପେଟ୍ରୋଲ ଓ ଡିଜେଲ ବିକିବେ। ସୂଚନାଯୋଗ୍ୟ ଯେ, ତେଲର ରିଟେଲ ବିକ୍ରିକୁ ନେଇ ନିୟମରେ ସଂଶୋଧନ କରିବା ଲାଗି ପରାମର୍ଶ ଦେବା ଉଦ୍ଦେଶ୍ୟରେ ପେଟ୍ରୋଲିୟମ ମନ୍ତ୍ରଣାଳୟ ପକ୍ଷରୁ ଗତବର୍ଷ ଅକ୍ଟୋବରରେ ଏକ ଏକ୍ସପର୍ଟ କମିଟି ଗଠନ କରାଯାଇଥିଲା। ତେଲର ରିଟେଲ ମାର୍କେଟରେ ପ୍ରତିଯୋଗିତା ବଢ଼ାଇବା ସରକାରଙ୍କ ଲକ୍ଷ୍ୟ ରହିଛି। ଏଥିପାଇଁ କମିଟି ସୁପାରିସ କରିବେ। ଏହି କମିଟିରେ ପୂର୍ବତନ ପେଟ୍ରୋଲିୟମ ସଚିବ ଜି.ସି.ଚତୁର୍ବେଦୀ, ପେଟ୍ରୋଲିୟମ ମନ୍ତ୍ରଣାଳୟର ଯୁଗ୍ମ ସଚିବ ଆଶୁତୋଷ ଜିନ୍ଦଲ, ଅର୍ଥନୀତିଜ୍ଞ କିରୀଟ ପାରିଖ ଏବଂ ଏମ.ଏ. ପ୍ରଧାନ ସାମିଲ ହୋଇଛନ୍ତି। ନିୟମ କୋହଳ ହେଲେ ସୌଦି ଆରାମକୋ ଭଳି ବିଶ୍ୱସ୍ତରର ତେଲ କମ୍ପାନୀ ଭାରତରେ ତେଲ ରିଟେଲ କାରବାରେ ପ୍ରବେଶ କରିବାକୁ ସୁଯୋଗ ପାଇବେ। ପୂର୍ବରୁ ଏହା ଭାରତର ତେଲର ରିଟେଲ ସେକ୍ଟରରେ ପ୍ରବେଶ କରିବାକୁ ଆଗ୍ରହ ପ୍ରକାଶ କରିସାରିଛି। ବ୍ରିଟେନ ଭଳି ଦେଶରେ ଏଭଳି ପ୍ରୟୋଗ ସଫଳ ହୋଇଛି। ସେଠାରୁ ହିଁ କେନ୍ଦ୍ର ସରକାର ଏହି ଆଇଡିଆ ପାଇଛନ୍ତି। ବ୍ରିଟେନର ପେଟ୍ରୋଲ ରିଟେଲର୍ସ ଆସୋସିଏଶନର ଅନୁମାନ ଅନୁଯାୟୀ, ଏପ୍ରିଲରେ ଦେଶରେ ବିକ୍ରି ହୋଇଥିବା ମୋଟ ପେଟ୍ରୋଲ ମଧ୍ୟରୁ କେବଳ ସୁପର ମାର୍କେଟରେ ହିଁ ୪୯ ପ୍ରତିଶତ ବିକ୍ରି ହୋଇଛି। ସେହିପରି ୪୩ ପ୍ରତିଶତ ଡିଜେଲ ବିକ୍ରି ହୋଇଥିଲା।
