ରୋମ୍, ୪।୭ : ଇଟାଲୀର ଆଲପାଇନ ପର୍ବତମାଳାରେ ଏକ ବିଶାଳ ହିମଖଣ୍ଡ ଭାଙ୍ଗିଯାଇଛି। ଏହି ଘଟଣା ରବିବାର ଅପରାହ୍ନରେ ଘଟିଛି। ଏଥିରେ ବରଫ ତଳେ ଦବି ହୋଇ ପାଞ୍ଚ ଜଣଙ୍କର ମୃତ୍ୟୁ ଘଟିଥିବା ବେଳେ ଆଠ ଜଣ ଆହତ ହୋଇଛନ୍ତି। ସ୍ଥାନୀୟ ଅଧିକାରୀମାନେ ଏହି ସୂଚନା ପ୍ରଦାନ କରିଛନ୍ତି।
ଇଟାଲୀର ରାଷ୍ଟ୍ରାୟତ୍ତ ଟେଲିଭିଜନ ଚ୍ୟାନେଲ ରାୟ କହିଛି ଯେ ବରଫ ଓ ପଥର ଆବର୍ଜନାରେ ୬ ଜଣ ଆହତ ହୋଇଥିଲେ ମଧ୍ୟ ମୃତ୍ୟୁସଂଖ୍ୟା ନିଶ୍ଚିତ ହୋଇପାରି ନାହିଁ। ବହୁ ଲୋକ ନିଖୋଜ ଅଛନ୍ତି । ତେଣୁ ମୃତାହତଙ୍କ ସଂଖ୍ୟା ବଢ଼ିବାର ଆଶଙ୍କା ରହିଛି।
ଜାତୀୟ ଆଲପାଇନ ଏବଂ ଗୁମ୍ଫା ଉଦ୍ଧାରକାରୀ ଦଳ ଟୁଇଟ କରି କହିଛନ୍ତି ଯେ ମାରମୋଲାଡା ଶିଖର ଅଞ୍ଚଳରେ ଚାଲିଥିବା ଉଦ୍ଧାର କାର୍ଯ୍ୟରେ ପାଞ୍ଚଟି ହେଲିକପ୍ଟର ଏବଂ ସ୍ନିଫର୍ କୁକୁର ବ୍ୟବହାର କରାଯାଉଛି। ଜରୁରୀକାଳୀନ ସେବା ବିଭାଗ ପକ୍ଷରୁ ଏକ ଟୁଇଟରେ କୁହାଯାଇଛି ଯେ,ଗ୍ଲେସିୟର ଭୁଶୁଡ଼ିବା ପରେ ୫ ଜଣଙ୍କର ମୃତ୍ୟୁ ହୋଇଛି। ଏହି ଘଟଣାରେ ଆଠ ଜଣ ଆହତ ହୋଇଛନ୍ତି, ଯେଉଁଥିରୁ ଦୁଇଜଣଙ୍କ ଅବସ୍ଥା ଗୁରୁତର ରହିଛି।
ଭେନେଟୋ ଅଞ୍ଚଳରେ ଅବସ୍ଥିତ ଏସୟୁଇଏମ ଡିସପ୍ୟାଚ୍ ସର୍ଭିସ୍ କହିଛି ଯେ ବରଫ ଏବଂ ପଥର ଆବର୍ଜନା ମଧ୍ୟରେ ୧୮ ଜଣ ଅଟକି ରହିଥିଲେ। ସେମାନଙ୍କୁ ଆଲପାଇନ ରେସକ୍ୟୁ କର୍ପସ କର୍ମଚାରୀ ଉଦ୍ଧାର କରିବାକୁ ଚେଷ୍ଟା କରୁଥିଲେ। ଡୋଲୋମାଇଟ୍ସ ମାର୍ମୋଲାଡାର ସର୍ବୋଚ୍ଚ ଶିଖର। ଏହାର ଉଚ୍ଚତାପ୍ରାୟ ୧୧,୦୦୦ ଫୁଟ। ଆଲପାଇନ ରେସକ୍ୟୁ ସର୍ଭିସର ମୁଖପାତ୍ର ୱାଲ୍ଟର ମିଲାନ ରାୟ ଚ୍ୟାନେଲକୁ କହିଛନ୍ତି ଯେ ଗ୍ଲାସିଅରର ଏକ ବଡ଼ ଅଂଶ ଭାଙ୍ଗିଯିବା କାରଣ ସମ୍ପର୍କରେ କିଛି ଜଣା ପଡି ନାହିଁ। ସେ କହିଛନ୍ତି ଯେ ଜୁନ ମାସରୁ ଇଟାଲୀରେ ପ୍ରବଳ ଗରମ ହେବାରେ ଲାଗିଛି। ଗ୍ଲେସିୟର ଭାଙ୍ଗିବାର ଉତ୍ତାପ ମଧ୍ୟ ମୁଖ୍ୟ କାରଣ ହୋଇପାରେ ବୋଲି ସେ କହିଛନ୍ତି।
