ଝୁମ୍ପୁରା, ୨୪।୬ (ଡି.ଏନ.ଏ.)-କେନ୍ଦୁଝର ଜିଲାର ଝୁମ୍ପୁରା ବଜରା, ପରିବା ମାର୍କେଟ, ସାପ୍ତାହିକ ହାଟ ବସୁଥିବା ଜାଗା, ଝୁମ୍ପୁରା ବଜାରକୁ ସଂଯୋଗ କରୁଥିବା ସମସ୍ତ ରାସ୍ତାରେ କୁଢ କୁଢ ଆବର୍ଜନା ଭର୍ତ୍ତି ହୋଇଛି। ବର୍ଷା ହେଲେ ଏହି ଆବର୍ଜନା ରାସ୍ତାରେ ଭାସୁଛି। ଖରାହେଲେ ଆବର୍ଜନା ପବନରେ ଉଡୁଛି। ଗନ୍ଧରେ ନାକ ଫାଟି ପଡୁଥିବା ଯୋଗୁଁ ଯାତାୟତରେ ଘୋର ଅସୁବିଧା ସୃଷ୍ଟି ହେଉଛି। କିଛିଦିନ ହେବ ସମୟ ସମୟରେ ବର୍ଷା ହେଉଥିବାରୁ ଆବର୍ଜନା ପଚି ଶଢି ବିଷାକ୍ତ ପରିବେଶ ସୃଷ୍ଟି କରିଛି। ଅନ୍ୟ ପକ୍ଷରେ ମଶା, ମାଛିଙ୍କ ପ୍ରାଦୂର୍ଭାବ ମଧ୍ୟ ବଢ଼ି ଚାଲିଛି। ଆବର୍ଜନା ସଫା କରାଯିବା ସହିତ, ଡ୍ରେନ ଗୁଡିକର ସଫେଇ ମଧ୍ୟ ଜରୁରୀ ହୋଇ ପଡିଛି। ଏହାର ପଦକ୍ଷେପ ନିଆ ନ ଗଲେ, ଯେ କୌଣସି ସମୟରେ ସାହି, ବସ୍ତୀ ଅଞ୍ଚଳରେ ଡାଇରିଆ ବ୍ୟାପିବାର ସମ୍ଭାବନା ସୃଷ୍ଟି ହୋଇଛି।
ସୂଚନା ଯୋଗ୍ୟ ଯେ, ଝୁମ୍ପୁରା ବଜାର ଅଞ୍ଚଳର କିଛିକାଂଶ ଆରଏମସିର ନିୟନ୍ତ୍ରଣରେ ରହିଥିବାବେଳେ, ଅନ୍ୟ କିଛି ଅଂଶ ଝୁମ୍ପୁରା ପଞ୍ଚାୟତ ଅଧୀନରେ ରହିଛି। ଆରଏମସି ଅଧୀନରେ ଥିବା ଦୋକାନ ଘର ଗୁଡିକରୁ ଘରଭଡା ଆଦାୟ ସହିତ, ଡେଲି ମାର୍କେଟ ଏବଂ ସାପ୍ତାହିକ ହାଟରୁ ମହାସୁଲ ଆଦାୟ କରାଯାଇଥାଏ। ସେହିପରି ପଞ୍ଚାୟତ ଅଧୀନରେ ଥିବା ଦୋକାନ ଘର ଗୁଡିକରୁ ପଞ୍ଚାୟତ ଘର ଭଡା ଆଦାୟ କରିଥାଏ। ନିୟମ ଅନୁଯାୟୀ ଝୁମ୍ପୁରା ବଜାର ଉପରେ ଆରଏମସି ଏବଂ ପଞ୍ଚାୟତର ନିୟନ୍ତ୍ରଣ ରହିଥିବାରୁ, ବଜାରକୁ ଆସୁଥିବା ଚାଷୀ, ଗ୍ରାମାଞ୍ଚଳ ବାସିନ୍ଦାଙ୍କୁ ବ୍ୟବସାୟ ପାଇଁ ସୁବ୍ୟବସ୍ଥା କରିବା, ପାନୀୟ ଜଳ ଯୋଗଇ ଦେବା, ପରିବେଶ, ପରିମଳର ସ୍ବଚ୍ଛତା ପାଇଁ ବିଶେଷ ଧ୍ୟାନ ଦେବା ଆରଏମସି ଏବଂ ପଞ୍ଚାୟତର କାର୍ଯ୍ୟ ହେଲେ ବାରମ୍ବାର ଅଭିଯୋଗ ପରେ ମଧ୍ୟ କେବଳ ପ୍ରତିଶ୍ରୁତିରେ କାମ ଚଳାଇ ରଖିଛନ୍ତି। ଏହି ବିଭାଗ ଦ୍ୱୟ, ସମନ୍ବୟ ଅଭାବରୁ କାମ ହୋଇ ପାରୁ ନ ଥିବାବେଳେ, ପରସ୍ପର ଉପରେ ବିଭାଗ ଦ୍ୱୟ ଦୋଷ ଲଦୁଛନ୍ତି।
ଏସମ୍ପର୍କରେ ଚମ୍ପୁଆସ୍ଥିତ ଆରଏମସି ସେକ୍ରେଟାରୀ ତଥା ଡେପୁଟି ଉପଜିଲାପାଳ ସପନ କୁମାର ସାହୁଙ୍କୁ ପଚାରିବାରୁ ଝୁମ୍ପୁରା ବଜାର, ହାଟ ମହାସୁଲ ଆଦାୟର ସିଂହଭାଗ ଝୁମ୍ପୁରା ପଞ୍ଚାୟତକୁ ଦିଆଯାଉଛି। ଚଳିତ ବର୍ଷ ୩ ଲକ୍ଷରୁ ଊର୍ଦ୍ଧ୍ୱ ଟଙ୍କା ଆରଏମସି ପକ୍ଷରୁ ଝୁମ୍ପୁରା ପଞ୍ଚାୟତକୁ ଦେବା ସହିତ ବଜାର ଏବଂ ବଜାରକୁ ସଂଯୋଗ କରୁଥିବା ରାସ୍ତା ଗୁଡିକରୁ ଆବର୍ଜନା ସଫା କରିବା ପାଇଁ ମଧ୍ୟ କୁହାଯାଇଛି। ଅନ୍ୟପକ୍ଷରେ ଝୁମ୍ପୁରା ପଞ୍ଚାୟତ କାର୍ଯ୍ୟ ନିର୍ବାହୀ ଅଧିକାରୀ ରାମଚନ୍ଦ୍ର ମହାନ୍ତ କହିଛନ୍ତି ଯେ, ରାସ୍ତା ବଜାର ସଫା ବେଳେ ବେଳେ କରାଯାଉଛି। ରାସ୍ତା ଉପର ଆବର୍ଜନା ମଧ୍ୟ ସଫା କରାଯିବ। କାମର ବ୍ୟସ୍ତତା ନେଇ ଆବର୍ଜନା ସଫା ହୋଇ ପାରିନାହିଁ। ସରପଞ୍ଚ ବୈଜୟନ୍ତୀ ନାଏକ ମଧ୍ୟ ଏସମ୍ପର୍କରେ ଅନୁରୁପ ମନ୍ତବ୍ୟ ଦେଇଛନ୍ତି।
