ଉଲୁଣ୍ଡା, ୮ା୧(ଡି.ଏନ.ଏ.) – ସୁବର୍ଣ୍ଣପୁର ଜିଲା ଉଲୁଣ୍ଡା ବ୍ଲକ ଏସ.ପତ୍ରାପାଲି ପଞ୍ଚାୟତର ଗିନ୍ଦିଲ୍ଲାମାଲଠାରେ ଉଲୁଣ୍ଡା ଯୁବ ମହାସଂଘ ଏବଂ ଆଦିବାସୀ ବିକାଶ କ୍ଲବ ମିଳିତ ଆନୁକୂଲ୍ୟରେ ଗତ ଚାରଦିନ ଧରି ଚାଲିଥିବା ଆନ୍ତଃରାଜ୍ୟ ହକି ଟୁର୍ନାମେଣ୍ଟ ମଙ୍ଗଳବାର ଉଦ୍ଯାପିତ ହୋଇଯାଇଛି। ଫାଇନାଲ ଖେଳରେ ସୁନ୍ଦରଗଡ ଦଳ ରେଢାଖୋଲକୁ ଟାଇବ୍ରେକର ୭-୬ ଗୋଲରେ ପରାସ୍ତ କରି ଚାମ୍ପିୟନ ହୋଇଛି। ପ୍ରଥମ ସେମିଫାଇନାଲରେ ସୁନ୍ଦରଗଡ ଦଳ ସମ୍ବଲପୁରକୁ ୩-୧ ଗୋଲରେ ହରାଇଥିବା ବେଳେ ଦ୍ୱିତୀୟ ସେମିରେ ରେଢାଖୋଲ ଦଳ ୨-୧ଗୋଲରେ ଝାରସୁଗୁଡାକୁ ପରାସ୍ତ କରି ଫାଇନାଲରେ ପ୍ରବେଶ କରିଥିଲା। ଫାଇନାଲ ଖେଳ ସଂଘର୍ଷପୂର୍ଣ୍ଣ ହୋଇଥିଲା। ନିର୍ଦ୍ଧାରିତ ସମୟରେ ଖେଳ ଗୋଲଶୂନ୍ୟ ଭାବରେ ସମାପ୍ତ ହେବାରୁ ମ୍ୟାଚ ରେଫରି ଟାଇବ୍ରେକରର ସହାୟତା ନେଇଥିଲେ। ଖେଳକୁ ଜୋହନ ବାରଲା, ଜୋଲସେନ ହର, ସୁଲେମାନ ଲମଙ୍ଗା, ଜସେବ ବାର୍ଯ୍ୟୋ ପରିଚାଳନା କରିଥିଲେ। ଆଦିବାସୀ କ୍ଲବ ଗିନ୍ଦିଲ୍ଲାମାଲର ସଭାପତି ନିଲାନ କୁର୍ତ୍ତୀଙ୍କ ଅଧ୍ୟକ୍ଷତା ଏବଂ ଉଲୁଣ୍ଡା ଯୁବମହାସଂଘ ସଭାପତି ପ୍ରମୋଦ ପଧାନଙ୍କ ସଂଯୋଜନାରେ ହୋଇଥିବା ପୁରସ୍କାର ବିତରଣ ଉତ୍ସବରେ ସାମାଜିକ କର୍ମୀ ସନାତନ ମହାଲିଗ, ବ୍ଲକ କ୍ରୀଡା ସଂଯୋଜକ ଉରୁକ୍ରମ ପାଣ୍ଡିଆ, କମଳ ରଞ୍ଜନ ପରିଛା, ସଞ୍ଜୀବ କୁମାର ପାଣିଗ୍ରାହୀ, କୁଶ ବଘାର ପ୍ରମୁଖ ଅତିଥିଭାବେ ଯୋଗଦେଇ ବିଜେତା ସୁନ୍ଦରଗଡ ଏବଂ ଉପବିଜେତା ରେଢାଖୋଲକୁ ଟ୍ରଫିସହ ପୁରସ୍କାର ପ୍ରଦାନ କରିଥିଲେ। ମ୍ୟାନ ଅଫ ଦ ମ୍ୟାଚ ଭାବେ ରେଢାଖୋଲର ପ୍ରସନ୍ନ ବିଲୁଙ୍ଗ ଓ ମ୍ୟାନ ଅଫ ଦ ଟୁର୍ନାମେଣ୍ଟଭାବେ ସୁନ୍ଦରଗଡର ରତିଆ ସୋରେନଙ୍କୁ ପୁରସ୍କାର ପ୍ରଦାନ କରାଯାଇଥିଲା। ଏହି ଅବସରରେ ସ୍ଥାନୀୟ ଆଦିବାସୀ ଝିଅମାନେ ପାରମ୍ପରିକ ଆଦିବାସୀ ନୃତ୍ୟ ପରିବେଷଣ କରିଥିଲେ। ଚାରିଦିନ ଧରି ଚାଲିଥିବା ଟୁର୍ନାମେଣ୍ଟରେ ଉଲୁଣ୍ଡା ଯୁବ ମହାସଂଘ ଏବଂ ଆଦିବାସୀ ବିକାଶ କ୍ଲବର ସମସ୍ତ ସଦସ୍ୟ ସହଯୋଗ କରିଥିଲେ।
