ନୂଆଦିଲ୍ଲୀ,୨୯।୫: ଆଗାମୀ ଅଷ୍ଟ୍ରେଲିଆ ଗସ୍ତରେ ଭାରତ ଆଡିଲେଡ୍ ଓଭାଲ ଗ୍ରାଉଣ୍ଡରେ ଦିବାରାତ୍ର ତଥା ପିଙ୍କ୍ବଲ୍ ଟେଷ୍ଟ ଖେଳିବା ନିଶ୍ଚିତ ହୋଇଛି। କ୍ରିକେଟ ଅଷ୍ଟ୍ରେଲିଆ (ସିଏ) ଉଭୟ ପୁରୁଷ ଓ ମହିଳା ଦଳ ପାଇଁ ୨୦୨୦-୨୧ ବର୍ଷର ଅନ୍ତର୍ଜାତୀୟ କାର୍ଯ୍ୟସୂଚୀ ଘୋଷଣା କରିଛି। ଏଥିରେ ଭାରତ ବିପକ୍ଷରେ ଅଷ୍ଟ୍ରେଲିଆ ଖେଳିବାକୁ ଥିଲା ୪ ଟେଷ୍ଟ, ୩ ଟି୨୦ ଅନ୍ତର୍ଜାତୀୟ ଓ ୩ଟି ଦିନିକିଆ ମ୍ୟାଚ୍ ସାମିଲ ରହିଛି। ଡିସେମ୍ବର ୧୧ରୁ ୧୫ ତାରିଖ ମଧ୍ୟରେ ଖେଳାଯିବାକୁ ଥିବା ଦ୍ୱିତୀୟ ଟେଷ୍ଟ ମ୍ୟାଚ୍ ଦିବାରାତ୍ର ଭିତ୍ତିକ ହେବ ବୋଲି ସିଏ ନିଶ୍ଚିତ କରିଛି। ତେବେ ପାରମ୍ପରିକ ଭାବେ ଦିବାରାତ୍ର ଟେଷ୍ଟ ଖେଳାଯାଉଥିବା ସିଡ୍ନୀ କ୍ରିକେଟ ଗ୍ରାଉଣ୍ଡ (ଏସ୍ସିଜି)ରେ ଏହି ମ୍ୟାଚ୍ ଖେଳାଯିବ ନାହିଁ। ଏଠାରେ ଦିନ ଟେଷ୍ଟ ଖେଳାଯିବ। ଆଡିଲେଡରେ ପିଙ୍କ୍ ବଲ୍ରେ ଦିବାରାତ୍ର ଟେଷ୍ଟ ଖେଳାଯିବ ବୋଲି ସିଏ ମୁଖପାତ୍ର କହିଛନ୍ତି।
ଡିସେମ୍ବର ୩ରୁ ଏହି ଟେଷ୍ଟ ସିରିଜ ବ୍ରିସ୍ବେନର ଗାବା ଗ୍ରାଉଣ୍ଡରୁ ଆରମ୍ଭ ହେବ। ସେହିପରି ଡିସେମ୍ବର ୨୬ରେ ମେଲ୍ବୋର୍ନରେ ବକ୍ସିଂ ଡେ ଟେଷ୍ଟ ଆୟୋଜନ କରାଯିବ। ଜାନୁୟାରୀ ୩ରୁ ସିଡ୍ନୀରେ ଚତୁର୍ଥ ଟେଷ୍ଟ ଖେଳାଯିବ। ଅଷ୍ଟ୍ରେଲିଆ ଗସ୍ତ କରିବାକୁ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ମଧ୍ୟ ସମ୍ମତି ପ୍ରକାଶ କରିଛି। ତେବେ କୋଭିଡ୍-୧୯ ମହମାରୀର ଆତଙ୍କ ବଜାୟ ରହିଛି। ଏପରିସ୍ଥଳେ ବିଦେଶ ଗସ୍ତ ନେଇ ବିସିସିଆଇ ଭାରତ ସରକାରଙ୍କ ନିର୍ଦ୍ଦେଶନାମା ପାଳନ କରିବ। ଫଳରେ ଅନ୍ତିମ କାର୍ଯ୍ୟସୂଚୀରେ ସାମାନ୍ୟ ପରିବର୍ତ୍ତନ ହେବ ବୋଲି ସିଏ ମୁଖ୍ୟ କାର୍ଯ୍ୟନିର୍ବାହୀ କେଭିନ ରବଟର୍ସ ସ୍ବୀକାର କରିଛନ୍ତି।
ଭାରତ ଏହି ଗସ୍ତରେ ୩ଟି ଟି୨୦ ମ୍ୟାଚ୍ ବ୍ରିସ୍ବେନ, କାନବେରା ଓ ଆଡିଲେଡରେ ଯଥାକ୍ରମେ ଅକ୍ଟୋବର ୧୧, ୧୪ ଓ ୧୭ ତାରିଖରେ ଖେଳିବ। ସେହିପରି ୩ଟି ଦିନିକିଆ ପର୍ଥ, ମେଲବୋର୍ନ ଓ ସିଡ୍ନୀ ଯଥାକ୍ରମେ ଜାନୁୟାରୀ ୧୨, ୧୫ ଓ ୧୭ ତାରିଖରେ ଖେଳାଯିବା କାର୍ଯ୍ୟକ୍ରମ ରହିଛି।
